৪৯২. তচ্ছসূকরজাতকং (৯)

১৬০. যদেসমানা ৰিচরিম্হ, পব্বতানি ৰনানি চ;

অন্ৰেসং ৰিচরিং [ৰিপুলে (স্যা. ক.)] ঞাতী, তেমে অধিগতা মযা.

১৬১. বহুঞ্চিদং মূলফলং, ভক্খো চাযং অনপ্পকো;

রম্মা চিমা গিরীনজ্জো [গিরিনদিযো (সী. পী.)], ফাসুৰাসো ভৰিস্সতি.

১৬২. ইধেৰাহং ৰসিস্সামি, সহ সব্বেহি ঞাতিভি;

অপ্পোস্সুক্কো নিরাসঙ্কী, অসোকো অকুতোভযো.

১৬৩. অঞ্ঞম্পি [অঞ্ঞং হি (সী. পী.)] লেণং পরিযেস, সত্তু নো ইধ ৰিজ্জতি;

সো তচ্ছ সূকরে হন্তি, ইধাগন্ত্ৰা ৰরং ৰরং.

১৬৪. কো নুম্হাকং [কো নম্হাকং (সী. পী.)] ইধ সত্তু, কো ঞাতী সুসমাগতে;

দুপ্পধংসে [অপ্পধংসে (সী. পী.)] পধংসেতি, তং মে অক্খাথ পুচ্ছিতা.

১৬৫. উদ্ধগ্গরাজী মিগরাজা, বলী দাঠাৰুধো মিগো;

সো তচ্ছ সূকরে হন্তি, ইধাগন্ত্ৰা ৰরং ৰরং.

১৬৬. ন নো দাঠা ন ৰিজ্জন্তি [নু ৰিজ্জন্তি (ক.)], বলং কাযে সমোহিতং;

সব্বে সমগ্গা হুত্ৰান, ৰসং কাহাম এককং.

১৬৭. হদযঙ্গমং কণ্ণসুখং, ৰাচং ভাসসি তচ্ছক;

যোপি যুদ্ধে পলাযেয্য, তম্পি পচ্ছা হনামসে.

১৬৮. পাণাতিপাতা ৰিরতো নু অজ্জ, অভযং নু তে সব্বভূতেসু দিন্নং;

দাঠা নু তে মিগৰধায [মিগ ৰিরিযং (সী. স্যা. পী.)] ন সন্তি, যো সঙ্ঘপত্তো কপণোৰ ঝাযসি.

১৬৯. ন মে দাঠা ন ৰিজ্জন্তি, বলং কাযে সমোহিতং;

ঞাতী চ দিস্ৰান সামগ্গী একতো, তস্মা চ ঝাযামি ৰনম্হি এককো.

১৭০. ইমস্সুদং যন্তি দিসোদিসং পুরে, ভযট্টিতা লেণগৰেসিনো পুথু;

তে দানি সঙ্গম্ম ৰসন্তি একতো, যত্থট্ঠিতা দুপ্পসহজ্জ তে মযা.

১৭১. পরিণাযকসম্পন্না, সহিতা একৰাদিনো;

তে মং সমগ্গা হিংসেয্যুং, তস্মা নেসং ন পত্থযে [অপত্থৰে (পী.)].

১৭২. একোৰ ইন্দো অসুরে জিনাতি, একোৰ সেনো হন্তি দিজে পসয্হ;

একোৰ ব্যগ্ঘো মিগসঙ্ঘপত্তো, ৰরং ৰরং হন্তি বলঞ্হি তাদিসং.

১৭৩. ন হেৰ ইন্দো ন সেনো, নপি ব্যগ্ঘো মিগাধিপো;

সমগ্গে সহিতে ঞাতী, ন ব্যগ্ঘে [ব্যগ্ঘে চ (সী. পী.), ব্যগ্ঘো ন (স্যা.)] কুরুতে ৰসে.

১৭৪. কুম্ভীলকা সকুণকা, সঙ্ঘিনো গণচারিনো;

সম্মোদমানা একজ্ঝং, উপ্পতন্তি ডযন্তি চ.

১৭৫. তেসঞ্চ ডযমানানং, একেত্থ অপসক্কতি [অপৰত্ততি (সী. পী.)];

তঞ্চ সেনো নিতাল়েতি, ৰেয্যগ্ঘিযেৰ সা গতি.

১৭৬. উস্সাহিতো জটিলেন, লুদ্দেনামিসচক্খুনা;

দাঠী দাঠীসু পক্খন্দি, মঞ্ঞমানো যথা পুরে.

১৭৭. সাধু সম্বহুলা ঞাতী, অপি রুক্খা অরঞ্ঞজা;

সূকরেহি সমগ্গেহি, ব্যগ্ঘো একাযনে হতো.

১৭৮. ব্রাহ্মণঞ্চেৰ ব্যগ্ঘঞ্চ, উভো হন্ত্ৰান সূকরা.

আনন্দিনো পমুদিতা, মহানাদং পনাদিসুং.

১৭৯. তে সু উদুম্বরমূলস্মিং, সূকরা সুসমাগতা;

তচ্ছকং অভিসিঞ্চিংসু, ‘‘ত্ৰং নো রাজাসি ইস্সরো’’তি.

তচ্ছসূকরজাতকং নৰমং.