৪৯১. মহামোরজাতকং (৮)

১৪৩. সচে হি ত্যাহং ধনহেতু গাহিতো, মা মং ৰধী জীৰগাহং গহেত্ৰা;

রঞ্ঞো চ [রঞ্ঞোৰ (সী. পী.)] মং সম্ম উপন্তিকং [উপন্তি (সী. স্যা. পী.)] নেহি, মঞ্ঞে ধনং লচ্ছসিনপ্পরূপং.

১৪৪. ন মে অযং তুয্হ ৰধায অজ্জ, সমাহিতো চাপধুরে [চাপৰরে (সী. পী.), চাপৰরো (স্যা.)] খুরপ্পো;

পাসঞ্চ ত্যাহং অধিপাতযিস্সং, যথাসুখং গচ্ছতু মোররাজা.

১৪৫. যং সত্ত ৰস্সানি মমানুবন্ধি, রত্তিন্দিৰং খুপ্পিপাসং সহন্তো;

অথ কিস্স মং পাসৰসূপনীতং, পমুত্তৰে ইচ্ছসি বন্ধনস্মা.

১৪৬. পাণাতিপাতা ৰিরতো নুসজ্জ, অভযং নু তে সব্বভূতেসু দিন্নং;

যং মং তুৰং পাসৰসূপনীতং, পমুত্তৰে ইচ্ছসি বন্ধনস্মা.

১৪৭. পাণাতিপাতা ৰিরতস্স ব্রূহি, অভযঞ্চ যো সব্বভূতেসু দেতি;

পুচ্ছামি তং মোররাজেতমত্থং, ইতো চুতো কিং লভতে সুখং সো.

১৪৮. পাণাতিপাতা ৰিরতস্স ব্রূমি, অভযঞ্চ যো সব্বভূতেসু দেতি;

দিট্ঠেৰ ধম্মে লভতে পসংসং, সগ্গঞ্চ সো যাতি সরীরভেদা.

১৪৯. ন সন্তি দেৰা ইতি আহু [ইচ্চাহু (সী. পী.)] একে, ইধেৰ জীৰো ৰিভৰং উপেতি;

তথা ফলং সুকতদুক্কটানং, দত্তুপঞ্ঞত্তঞ্চ ৰদন্তি দানং;

তেসং ৰচো অরহতং সদ্দহানো, তস্মা অহং সকুণে বাধযামি.

১৫০. চন্দো চ সুরিযো চ উভো সুদস্সনা, গচ্ছন্তি ওভাসযমন্তলিক্খে;

ইমস্স লোকস্স পরস্স ৰা তে, কথং নু তে আহু মনুস্সলোকে.

১৫১. চন্দো চ সুরিযো চ উভো সুদস্সনা, গচ্ছন্তি ওভাসযমন্তলিক্খে;

পরস্স লোকস্স ন তে ইমস্স, দেৰাতি তে আহু মনুস্সলোকে.

১৫২. এত্থেৰ তে নীহতা হীনৰাদা, অহেতুকা যে ন ৰদন্তি কম্মং;

তথা ফলং সুকতদুক্কটানং, দত্তুপঞ্ঞত্তং যে চ ৰদন্তি দানং.

১৫৩. অদ্ধা হি সচ্চং ৰচনং তৰেদং [তৰেতং (সী. স্যা. পী.)], কথঞ্হি দানং অফলং ভৰেয্য [ৰদেয্য (সী. পী.)];

তথা ফলং সুকতদুক্কটানং, দত্তুপঞ্ঞত্তঞ্চ কথং ভৰেয্য.

১৫৪. কথংকরো কিন্তিকরো কিমাচরং, কিং সেৰমানো কেন তপোগুণেন;

অক্খাহি [অক্খাহি তং দানি (ক.)] মে মোররাজেতমত্থং, যথা অহং নো নিরযং পতেয্যং.

১৫৫. যে কেচি অত্থি সমণা পথব্যা, কাসাযৰত্থা অনগারিযা তে;

পাতোৰ পিণ্ডায চরন্তি কালে, ৰিকালচরিযা ৰিরতা হি সন্তো.

১৫৬. তে তত্থ কালেনুপসঙ্কমিত্ৰা, পুচ্ছাহি যং তে মনসো পিযং সিযা;

তে তে পৰক্খন্তি যথাপজানং, ইমস্স লোকস্স পরস্স চত্থং.

১৫৭. তচংৰ জিণ্ণং উরগো পুরাণং, পণ্ডূপলাসং হরিতো দুমোৰ;

এসপ্পহীনো মম লুদ্দভাৰো, জহামহং লুদ্দকভাৰমজ্জ.

১৫৮. যে চাপি মে সকুণা অত্থি বদ্ধা, সতানিনেকানি নিৰেসনস্মিং;

তেসম্পহং [তেসং অহং (স্যা. ক.)] জীৰিতমজ্জ দম্মি, মোক্খঞ্চ তে পত্তা [পত্তো (সী.), অচ্ছ (স্যা.)] সকং নিকেতং.

১৫৯. লুদ্দো চরী পাসহত্থো অরঞ্ঞে, বাধেতু মোরাধিপতিং যসস্সিং;

বন্ধিত্ৰা [বন্ধিত্ৰ (সী. পী.)] মোরাধিপতিং যসস্সিং, দুক্খা স পমুচ্চি [দুক্খা পমুচ্চি (সী.), দুক্খা পমুঞ্চি (স্যা. পী.)] যথাহং পমুত্তোতি.

মহামোরজাতকং অট্ঠমং.