৪৮৬. মহাউক্কুসজাতকং (৩)

৪৪. উক্কা চিলাচা [মিলাচা (সী. স্যা. পী.)] বন্ধন্তি দীপে [বন্ধন্তি লুদ্দা, দীপে (ক.)], পজা মমং খাদিতুং পত্থযন্তি;

মিত্তং সহাযঞ্চ ৰদেহি সেনক, আচিক্খ ঞাতিব্যসনং দিজানং.

৪৫. দিজো দিজানং পৰরোসি পক্খিম [পক্খি (সী. পী.), পক্খি চ (স্যা.)], উক্কুসরাজ সরণং তং উপেম [উপেমি (সী. স্যা. পী.)];

পজা মমং খাদিতুং পত্থযন্তি, লুদ্দা চিলাচা [মিলাচা (সী. স্যা. পী.)] ভৰ মে সুখায.

৪৬. মিত্তং সহাযঞ্চ করোন্তি পণ্ডিতা, কালে অকালে সুখমেসমানা [মাসযানা (পী.)];

করোমি তে সেনক এতমত্থং, অরিযো হি অরিযস্স করোতি কিচ্চং.

৪৭. যং হোতি কিচ্চং অনুকম্পকেন, অরিযস্স অরিযেন কতং তযীদং [তৰ যিদং (সী. পী.)];

অত্তানুরক্খী ভৰ মা অদয্হি [অডয্হ (সী. পী.)], লচ্ছাম পুত্তে তযি জীৰমানে.

৪৮. তৰেৰ [তমেৰ (স্যা. ক.)] রক্খাৰরণং করোন্তো, সরীরভেদাপি ন সন্তসামি;

করোন্তি হেকে [হেতে (ক. সী. স্যা. পী.)] সখীনং সখারো, পাণং চজন্তা [চজন্তি (সী. পী.)] সতমেস [সতানেস (পী.)] ধম্মো.

৪৯. সুদুক্করং কম্মমকাসি [মকা (সী. পী.)], অণ্ডজাযং ৰিহঙ্গমো;

অত্থায কুররো পুত্তে, অড্ঢরত্তে অনাগতে.

৫০. চুতাপি হেকে [একে (সী. পী.)] খলিতা সকম্মুনা, মিত্তানুকম্পায পতিট্ঠহন্তি;

পুত্তা মমট্টা গতিমাগতোস্মি, অত্থং চরেথো [চরেথ (সী. স্যা. পী.)] মম ৰারিচর [ৰারিছন্ন (সী. পী.)].

৫১. ধনেন ধঞ্ঞেন চ অত্তনা চ, মিত্তং সহাযঞ্চ করোন্তি পণ্ডিতা;

করোমি তে সেনক এতমত্থং, অরিযো হি অরিযস্স করোতি কিচ্চং.

৫২. অপ্পোস্সুক্কো তাত তুৰং নিসীদ, পুত্তো পিতু চরতি অত্থচরিযং;

অহং চরিস্সামি তৰেতমত্থং, সেনস্স পুত্তে পরিতাযমানো.

৫৩. অদ্ধা হি তাত সতমেস ধম্মো, পুত্তো পিতু যং চরে [পিতুনং চরে (ক.), পিতু যঞ্চরেথ (সী. পী.)] অত্থচরিযং;

অপ্পেৰ মং দিস্ৰান পৰড্ঢকাযং, সেনস্স পুত্তা ন ৰিহেঠযেয্যুং.

৫৪. পসূ মনুস্সা মিগৰীরসেট্ঠ [মিগৰিরিযসেট্ঠ (সী. পী.)], ভযট্টিতা [ভযদ্দিতা (সী. পী.)] সেট্ঠমুপব্বজন্তি;

পুত্তা মমট্টা গতিমাগতোস্মি, ত্ৰং নোসি রাজা ভৰ মে সুখায.

৫৫. করোমি তে সেনক এতমত্থং, আযামি তে তং দিসতং ৰধায;

কথঞ্হি ৰিঞ্ঞূ পহু সম্পজানো, ন ৰাযমে অত্তজনস্স গুত্তিযা.

৫৬. মিত্তঞ্চ কযিরাথ সুহদযঞ্চ [সুহদ্দযঞ্চ (সী.), সখাঘরঞ্চ (পী.)], অযিরঞ্চ কযিরাথ সুখাগমায;

নিৰত্থকোচোৰ [কোজোৰ (সী. পী.)] সরেভিহন্ত্ৰা, মোদাম পুত্তেহি সমঙ্গিভূতা.

৫৭. সকমিত্তস্স কম্মেন, সহাযস্সাপলাযিনো;

কূজন্তমুপকূজন্তি, লোমসা হদযঙ্গমং.

৫৮. মিত্তং সহাযং অধিগম্ম পণ্ডিতো, সো ভুঞ্জতী পুত্ত পসুং ধনং ৰা;

অহঞ্চ পুত্তা চ পতী চ ময্হং, মিত্তানুকম্পায সমঙ্গিভূতা.

৫৯. রাজৰতা সূরৰতা চ অত্থো, সম্পন্নসখিস্স ভৰন্তি হেতে;

সো মিত্তৰা যসৰা উগ্গতত্তো, অস্মিংধলোকে [অস্মিঞ্চ লোকে (সী. স্যা. পী.)] মোদতি কামকামী.

৬০. করণীযানি মিত্তানি, দলিদ্দেনাপি সেনক;

পস্স মিত্তানুকম্পায, সমগ্গম্হা সঞাতকে [সঞাতকা (?)].

৬১. সূরেন বলৰন্তেন, যো মিত্তে [মেত্তে (সী.), মিত্তং (স্যা.)] কুরুতে দিজো;

এৰং সো সুখিতো হোতি, যথাহং ত্ৰঞ্চ সেনকাতি.

মহাউক্কুসজাতকং ততিযং.