৪৮৭. উদ্দালকজাতকং (৪)

৬২. খরাজিনা জটিলা পঙ্কদন্তা, দুম্মক্খরূপা [দুম্মুধরূপা (সী. পী. ক.)] যে মন্তং জপ্পন্তি [যেমে জপন্তি (সী. পী.), যে’মে জপ্পন্তি মন্তে (জা. ১.৬.১০)];

কচ্চিন্নু তে মানুসকে পযোগে, ইদং ৰিদূ পরিমুত্তা অপাযা.

৬৩. পাপানি কম্মানি করেথ [করেয্য (স্যা.), কত্ৰান (জা. ১.৬.১১)] রাজ, বহুস্সুতো চে ন চরেয্য ধম্মং;

সহস্সৰেদোপি ন তং পটিচ্চ, দুক্খা পমুচ্চে [পমুঞ্চে (স্যা.)] চরণং অপত্ৰা.

৬৪. সহস্সৰেদোপি ন তং পটিচ্চ, দুক্খা পমুচ্চে চরণং অপত্ৰা;

মঞ্ঞামি ৰেদা অফলা ভৰন্তি, সসংযমং চরণঞ্ঞেৰ সচ্চং.

৬৫. ন হেৰ ৰেদা অফলা ভৰন্তি, সসংযমং চরণঞ্ঞেৰ সচ্চং;

কিত্তিঞ্হি [কিত্তিঞ্চ (স্যা.)] পপ্পোতি অধিচ্চ ৰেদে, সন্তিং পুণাতি [পুনোতি (সী. অট্ঠ.), পুণেতি (স্যা. জা. ১.৬.১৩), পুনেতি (পী.)] চরণেন দন্তো.

৬৬. ভচ্চা মাতা পিতা বন্ধূ, যেন জাতো সযেৰ সো;

উদ্দালকো অহং ভোতো [ভোতি (ক.)], সোত্তিযাকুলৰংসকো [ৰংসতো (ক.)].

৬৭. কথং ভো ব্রাহ্মণো হোতি, কথং ভৰতি কেৰলী;

কথঞ্চ পরিনিব্বানং, ধম্মট্ঠো কিন্তি ৰুচ্চতি.

৬৮. নিরংকত্ৰা অগ্গিমাদায ব্রাহ্মণো, আপো সিঞ্চং যজং উস্সেতি যূপং;

এৰংকরো ব্রাহ্মণো হোতি খেমী, ধম্মে ঠিতং তেন অমাপযিংসু.

৬৯. ন সুদ্ধি সেচনেনত্থি, নাপি কেৰলী ব্রাহ্মণো;

ন খন্তী নাপি সোরচ্চং, নাপি সো পরিনিব্বুতো.

৭০. কথং সো [ভো (স্যা. ক.)] ব্রাহ্মণো হোতি, কথং ভৰতি কেৰলী;

কথঞ্চ পরিনিব্বানং, ধম্মট্ঠো কিন্তি ৰুচ্চতি.

৭১. অখেত্তবন্ধূ অমমো নিরাসো, নিল্লোভপাপো ভৰলোভখীণো;

এৰংকরো ব্রাহ্মণো হোতি খেমী, ধম্মে ঠিতং তেন অমাপযিংসু.

৭২. খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

সব্বেৰ সোরতা দন্তা, সব্বেৰ পরিনিব্বুতা;

সব্বেসং সীতিভূতানং, অত্থি সেয্যোথ [সেয্যোৰ (সী. পী.)] পাপিযো.

৭৩. খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

সব্বেৰ সোরতা দন্তা, সব্বেৰ পরিনিব্বুতা;

সব্বেসং সীতিভূতানং, নত্থি সেয্যোথ পাপিযো.

৭৪. খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

সব্বেৰ সোরতা দন্তা, সব্বেৰ পরিনিব্বুতা.

৭৫. সব্বেসং সীতিভূতানং, নত্থি সেয্যোথ পাপিযো;

পনত্থং [পসত্থং (স্যা.), পসট্ঠং (ক.)] চরসি ব্রহ্মঞ্ঞং, সোত্তিযাকুলৰংসতং.

৭৬. নানারত্তেহি ৰত্থেহি, ৰিমানং ভৰতি ছাদিতং;

ন তেসং ছাযা ৰত্থানং, সো রাগো অনুপজ্জথ.

৭৭. এৰমেৰ [এৰমেৰং (পী.)] মনুস্সেসু, যদা সুজ্ঝন্তি মাণৰা;

তে সজাতিং পমুঞ্চন্তি [ন তেসং জাতিং পুচ্ছন্তি (সী. স্যা. পী.), ন তেসং জাতি সুজ্ঝতি (ক.)], ধম্মমঞ্ঞায সুব্বতাতি.

উদ্দালকজাতকং চতুত্থং.