৪৮০. অকিত্তিজাতকং (৭)

৮৩. অকিত্তিং [অকত্তিং (ক.)] দিস্ৰা সম্মন্তং, সক্কো ভূতপতী ব্রৰি;

কিং পত্থযং মহাব্রহ্মে, একো সম্মসি ঘম্মনি.

৮৪. দুক্খো পুনব্ভৰো সক্ক, সরীরস্স চ ভেদনং;

সম্মোহমরণং দুক্খং, তস্মা সম্মামি ৰাসৰ.

৮৫. এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

৮৬. ৰরং চে মে অদো সক্ক, সব্বভূতানমিস্সর;

যেন পুত্তে চ দারে চ, ধনধঞ্ঞং পিযানি চ;

লদ্ধা নরা ন [লদ্ধা নঞ্ঞানি (ক.)] তপ্পন্তি, সো লোভো ন মযী ৰসে.

৮৭. এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

৮৮. ৰরং চে মে অদো সক্ক, সব্বভূতানমিস্সর;

খেত্তং ৰত্থুং হিরঞ্ঞঞ্চ, গৰস্সং দাসপোরিসং;

যেন জাতেন জীযন্তি, সো দোসো ন মযী ৰসে.

৮৯. এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

৯০. ৰরং চে মে অদো সক্ক, সব্বভূতানমিস্সর;

বালং ন পস্সে ন সুণে, ন চ বালেন সংৰসে;

বালেনল্লাপ [বালেনা’লাপ (?)] সল্লাপং, ন করে ন চ রোচযে.

৯১. কিং নু তে অকরং বালো, ৰদ কস্সপ কারণং;

কেন কস্সপ বালস্স, দস্সনং নাভিকঙ্খসি.

৯২. অনযং নযতি দুম্মেধো, অধুরাযং নিযুঞ্জতি;

দুন্নযো সেয্যসো হোতি, সম্মা ৰুত্তো পকুপ্পতি;

ৰিনযং সো ন জানাতি, সাধু তস্স অদস্সনং.

৯৩. এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

৯৪. ৰরং চে মে অদো সক্ক, সব্বভূতানমিস্সর;

ধীরং পস্সে সুণে ধীরং, ধীরেন সহ সংৰসে;

ধীরেনল্লাপসল্লাপং, তং করে তঞ্চ রোচযে.

৯৫. কিং নু তে অকরং ধীরো, ৰদ কস্সপ কারণং;

কেন কস্সপ ধীরস্স, দস্সনং অভিকঙ্খসি.

৯৬. নযং নযতি মেধাৰী, অধুরাযং ন যুঞ্জতি;

সুনযো সেয্যসো হোতি, সম্মা ৰুত্তো ন কুপ্পতি;

ৰিনযং সো পজানাতি, সাধু তেন সমাগমো.

৯৭. এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

৯৮. ৰরং চে মে অদো সক্ক, সব্বভূতানমিস্সর;

ততো রত্যা ৰিৰসানে [ৰিৰসনে (সী. স্যা. পী.)], সূরিযুগ্গমনং [সুরিযস্সুগ্গমনং (সী. স্যা. পী.)] পতি;

দিব্বা ভক্খা পাতুভৰেয্যুং, সীলৰন্তো চ যাচকা.

৯৯. দদতো মে [দদতো চ মে (পী.)] ন খীযেথ, দত্ৰা নানুতপেয্যহং;

দদং চিত্তং পসাদেয্যং, এতং সক্ক ৰরং ৰরে.

১০০. এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

১০১. ৰরং চে মে অদো সক্ক, সব্বভূতানমিস্সর;

ন মং পুন উপেয্যাসি, এতং সক্ক ৰরং ৰরে.

১০২. বহূহি ৰতচরিযাহি [ৰত্তচরিযাহি (সী. স্যা. ক.)], নরা চ অথ নারিযো;

দস্সনং অভিকঙ্খন্তি, কিং নু মে দস্সনে ভযং.

১০৩. তং তাদিসং দেৰৰণ্ণং [দেৰৰণ্ণিং (পী.)], সব্বকামসমিদ্ধিনং;

দিস্ৰা তপো পমজ্জেয্য [দিস্ৰা তপো পমজ্জেয্যং (সী. স্যা. পী.), দিস্ৰানহং পমজ্জেয্যং (চরিযাপিটকট্ঠকথা)], এতং তে দস্সনে ভযন্তি.

অকিত্তিজাতকং সত্তমং.