৪৮১. তক্কারিযজাতকং (৮)

১০৪. অহমেৰ দুব্ভাসিতং ভাসি বালো, ভেকোৰরঞ্ঞে অহিমৰ্হাযমানো [মৰ্হযানো (সী. পী.)];

তক্কারিযে সোব্ভমিমং [সোব্ভম্হি অহং (ক.)] পতামি, ন কিরেৰ সাধু অতিৰেলভাণী [সাধূত্যতিৰেলভাণী (ক.)].

১০৫. পপ্পোতি মচ্চো অতিৰেলভাণী, বন্ধং ৰধং সোকপরিদ্দৰঞ্চ;

অত্তানমেৰ গরহাসি এত্থ, আচের যং তং নিখণন্তি সোব্ভে.

১০৬. কিমেৰহং তুণ্ডিলমনুপুচ্ছিং, করেয্য সং [করেয্যাসং (স্যা.), করেয্য স (ক.), ভরেয্য সং (?)] ভাতরং কাল়িকাযং [কাল়িকায (স্যা. ক.)];

নগ্গোৰহং [নগ্গোচ’হং (?)] ৰত্থযুগঞ্চ জীনো, অযম্পি অত্থো বহুতাদিসোৰ.

১০৭. যো যুজ্ঝমানানমযুজ্ঝমানো [যুজ্ঝমানেন অযুজ্ঝমানো (ক.)], মেণ্ডন্তরং অচ্চুপতী কুলিঙ্গো;

সো পিংসিতো মেণ্ডসিরেহি তত্থ, অযম্পি অত্থো বহুতাদিসোৰ.

১০৮. চতুরো জনা পোত্থকমগ্গহেসুং, একঞ্চ পোসং অনুরক্খমানা;

সব্বেৰ তে ভিন্নসিরা সযিংসু, অযম্পি অত্থো বহুতাদিসোৰ.

১০৯. অজা যথা ৰেল়ুগুম্বস্মিং বদ্ধা [বন্ধং (স্যা. ক.)], অৰক্খিপন্তী অসিমজ্ঝগচ্ছি;

তেনেৰ তস্সা গলকাৰকন্তং [গলযা ৰিকন্তুং (ক.), গলকং ৰিকন্তা (স্যা.)], অযম্পি অত্থো বহুতাদিসোৰ.

১১০. ইমে ন দেৰা ন গন্ধব্বপুত্তা, মিগা ইমে অত্থৰসং গতা মে [অত্থৰসাভতা ইমে (সী. স্যা. পী.)];

একঞ্চ নং সাযমাসে পচন্তু, একং পুনপ্পাতরাসে [একঞ্চ নং পাতরাসে (ক. সী. পী.)] পচন্তু.

১১১. সতং সহস্সানি দুভাসিতানি, কলম্পি নাগ্ঘন্তি সুভাসিতস্স;

দুব্ভাসিতং সঙ্কমানো কিলেসো [কিলিস্সতি (?)], তস্মা তুণ্হী কিম্পুরিসা [কিংপুরিসো (সী. স্যা.)] ন বাল্যা.

১১২. যা মেসা ব্যাহাসি [ব্যাকাসি (সী. স্যা. পী.)] পমুঞ্চথেতং, গিরিঞ্চ নং [গিরিং ৰরং (ক.)] হিমৰন্তং নযন্তু;

ইমঞ্চ খো দেন্তু মহানসায, পাতোৰ নং পাতরাসে পচন্তু.

১১৩. পজ্জুন্ননাথা পসৰো, পসুনাথা অযং পজা;

ত্ৰং নাথোসি [ত্ৰং-নাথো’স্মি (সী. স্যা. পী.)] মহারাজ, নাথোহং ভরিযায মে [অম্হ-নাথা মম ভরিযা (ক. সী. স্যা.)];

দ্ৰিন্নমঞ্ঞতরং ঞত্ৰা, মুত্তো গচ্ছেয্য পব্বতং.

১১৪. ন ৰে নিন্দা সুপরিৰজ্জযেথ [সুপরিৰজ্জযাথ (স্যা.)], নানা জনা সেৰিতব্বা জনিন্দ;

যেনেৰ একো লভতে পসংসং, তেনেৰ অঞ্ঞো লভতে নিন্দিতারং.

১১৫. সব্বো লোকো পরিচিত্তো অতিচিত্তো [পরচিত্তেন অতিচিত্তো (সী. স্যা.), পরচিত্তেন অচিত্তো (সী. অট্ঠ.)], সব্বো লোকো চিত্তৰা সম্হি চিত্তে;

পচ্চেকচিত্তা পুথু সব্বসত্তা, কস্সীধ চিত্তস্স ৰসে ন ৰত্তে.

১১৬. তুণ্হী অহূ কিম্পুরিসো সভরিযো [অভাণী (ক.)], যো দানি ব্যাহাসি ভযস্স ভীতো;

সো দানি মুত্তো সুখিতো অরোগো, ৰাচাকিরেৰত্তৰতী নরানন্তি.

তক্কারিযজাতকং অট্ঠমং.