৪৭৯. কালিঙ্গবোধিজাতকং (৬)

৬৭. রাজা কালিঙ্গো চক্কৰত্তি, ধম্মেন পথৰিমনুসাসং [মনুসাসি (স্যা. ক.)];

অগমা [অগমাসি (স্যা. ক.)] বোধিসমীপং, নাগেন মহানুভাৰেন.

৬৮. কালিঙ্গো ভারদ্ৰাজো চ, রাজানং কালিঙ্গং সমণকোলঞ্ঞং;

চক্কং ৰত্তযতো পরিগ্গহেত্ৰা [পরিণেত্ৰা (পী.)], পঞ্জলী ইদমৰোচ.

৬৯. পচ্চোরোহ মহারাজ, ভূমিভাগো যথা সমণুগ্গতো [সমনুগীতো (সী. স্যা. পী.)];

ইধ অনধিৰরা বুদ্ধা, অভিসম্বুদ্ধা ৰিরোচন্তি.

৭০. পদক্খিণতো আৰট্টা, তিণলতা অস্মিং ভূমিভাগস্মিং;

পথৰিযা নাভিযং [পুথুৰিযা অযং (সী.), পঠৰিযা অযং (স্যা.), পুথৰিযা’যং (পী.)] মণ্ডো, ইতি নো সুতং মন্তে মহারাজ [সুতং মহারাজ (সী. স্যা. পী.)].

৭১. সাগরপরিযন্তায, মেদিনিযা সব্বভূতধরণিযা;

পথৰিযা অযং মণ্ডো, ওরোহিত্ৰা নমো করোহি.

৭২. যে তে ভৰন্তি নাগা চ, অভিজাতা চ কুঞ্জরা;

এত্তাৰতা পদেসং তে, নাগা নেৰ মুপযন্তি.

৭৩. অভিজাতো নাগো [অভিজাতো তে নাগো (সী. পী. অট্ঠ.)] কামং, পেসেহি কুঞ্জরং দন্তিং;

এত্তাৰতা পদেসো [পদেসো চ (স্যা. ক.)], সক্কা [ন সক্কা (স্যা.)] নাগেন মুপগন্তুং.

৭৪. তং সুত্ৰা রাজা কালিঙ্গো, ৰেয্যঞ্জনিকৰচো নিসামেত্ৰা;

সম্পেসেসি নাগং ঞস্সাম, মযং যথিমস্সিদং [যথা ইদং (সী. স্যা. পী.)] ৰচনং.

৭৫. সম্পেসিতো চ রঞ্ঞা, নাগো কোঞ্চোৰ অভিনদিত্ৰান;

পটিসক্কিত্ৰা [পটিওসক্কিত্ৰা (ক.)] নিসীদি, গরুংৰ ভারং অসহমানো.

৭৬. কালিঙ্গভারদ্ৰাজো, নাগং খীণাযুকং ৰিদিত্ৰান;

রাজানং কালিঙ্গং, তরমানো অজ্ঝভাসিত্থ;

অঞ্ঞং সঙ্কম নাগং, নাগো খীণাযুকো মহারাজ.

৭৭. তং সুত্ৰা কালিঙ্গো, তরমানো সঙ্কমী নাগং;

সঙ্কন্তেৰ রঞ্ঞে, নাগো তত্থেৰ পতি [পতিতো (ক.)] ভুম্যা;

ৰেয্যঞ্জনিকৰচো, যথা তথা অহু নাগো.

৭৮. কালিঙ্গো রাজা কালিঙ্গং, ব্রাহ্মণং এতদৰোচ;

ত্ৰমেৰ অসি সম্বুদ্ধো, সব্বঞ্ঞূ সব্বদস্সাৰী.

৭৯. তং অনধিৰাসেন্তো কালিঙ্গং [কালিঙ্গো (সী. স্যা. পী.)], ব্রাহ্মণো ইদমৰোচ;

ৰেয্যঞ্জনিকা হি মযং, বুদ্ধা সব্বঞ্ঞুনো মহারাজ.

৮০. সব্বঞ্ঞূ সব্বৰিদূ চ, বুদ্ধা ন লক্খণেন জানন্তি;

আগমবলসা [আগমপুরিসা (পী.)] হি মযং, বুদ্ধা সব্বং পজানন্তি.

৮১. মহযিত্ৰা সম্বোধিং [মহাযিত্ৰান সম্বোধিং (সী. পী.), পহংসিত্ৰান সম্বোধিং (স্যা.), মমাযিত্ৰান তং বোধিং (ক.)], নানাতুরিযেহি ৰজ্জমানেহি;

মালাৰিলেপনং অভিহরিত্ৰা [মালাগন্ধৰিলেপনং আহরিত্ৰা (সী. পী.); পাকারপরিক্খেপং কারেসি; অথ রাজা পাযাসি (সী. স্যা. পী.)] অথ রাজা মনুপাযাসি [পাকারপরিক্খেপং কারেসি; অথ রাজা পাযাসি (সী. স্যা. পী.)].

৮২. সট্ঠি ৰাহসহস্সানি, পুপ্ফানং সন্নিপাতযি;

পূজেসি রাজা কালিঙ্গো, বোধিমণ্ডমনুত্তরন্তি [ৰরুত্তমেতি (সী.)].

কালিঙ্গবোধিজাতকং ছট্ঠং.