৪৭৫. ফন্দনজাতকং (২)

১৪. কুঠারিহত্থো [কুধারিহত্থো (ক.)] পুরিসো, ৰনমোগয্হ তিট্ঠসি;

পুট্ঠো মে সম্ম অক্খাহি, কিং দারুং ছেতুমিচ্ছসি.

১৫. ইস্সো [ইসো (সী.), ঈসো (স্যা. পী.)] ৰনানি চরসি, সমানি ৰিসমানি চ;

পুট্ঠো মে সম্ম অক্খাহি, কিং দারুং নেমিযা দল়্হং.

১৬. নেৰ সালো ন খদিরো, নাস্সকণ্ণো কুতো ধৰো;

রুক্খো চ [রুক্খোৰ (সী. পী.)] ফন্দনো নাম, তং দারুং নেমিযা দল়্হং.

১৭. কীদিসানিস্স পত্তানি, খন্ধো ৰা পন কীদিসো;

পুট্ঠো মে সম্ম অক্খাহি, যথা জানেমু ফন্দনং.

১৮. যস্স সাখা পলম্বন্তি, নমন্তি ন চ ভঞ্জরে;

সো রুক্খো ফন্দনো নাম, যস্স মূলে অহং ঠিতো.

১৯. অরানং চক্কনাভীনং, ঈসানেমিরথস্স চ;

সব্বস্স তে কম্মনিযো, অযং হেস্সতি ফন্দনো.

২০. ইতি ফন্দনরুক্খোপি, তাৰদে অজ্ঝভাসথ;

ময্হম্পি ৰচনং অত্থি, ভারদ্ৰাজ সুণোহি মে.

২১. ইস্সস্স [ইমস্স (ক. সী. ক.)] উপক্খন্ধম্হা [উপখন্ধম্হা (ক. সী. পী. ক.)], উক্কচ্চ চতুরঙ্গুলং;

তেন নেমিং পসারেসি [পরিহরেসি (সী. পী.)], এৰং দল়্হতরং সিযা.

২২. ইতি ফন্দনরুক্খোপি, ৰেরং অপ্পেসি তাৰদে;

জাতানঞ্চ অজাতানং, ইস্সানং দুক্খমাৰহি.

২৩. ইচ্চেৰং [ইচ্চেৰ (সী. পী.)] ফন্দনো ইস্সং, ইস্সো চ পন ফন্দনং;

অঞ্ঞমঞ্ঞং ৰিৰাদেন, অঞ্ঞমঞ্ঞমঘাতযুং.

২৪. এৰমেৰ মনুস্সানং, ৰিৰাদো যত্থ জাযতি;

মযূরনচ্চং নচ্চন্তি, যথা তে ইস্সফন্দনা.

২৫. তং ৰো ৰদামি ভদ্দং ৰো [ভদ্দন্তে (ক.)], যাৰন্তেত্থ সমাগতা;

সম্মোদথ মা ৰিৰদথ [মাৰিৰদিত্থ (সী. স্যা. পী.)], মা হোথ ইস্সফন্দনা.

২৬. সামগ্গিমেৰ [সামগ্যমেৰ (স্যা. ক.)] সিক্খেথ, বুদ্ধেহেতং পসংসিতং;

সামগ্গিরতো ধম্মট্ঠো, যোগক্খেমা ন ধংসতীতি.

ফন্দনজাতকং দুতিযং.