৪৭৬. জৰনহংসজাতকং (৩)

২৭. ইধেৰ হংস নিপত, পিযং মে তৰ দস্সনং;

ইস্সরোসি অনুপ্পত্তো, যমিধত্থি পৰেদয.

২৮. সৰনেন একস্স পিযা ভৰন্তি, দিস্ৰা পনেকস্স ৰিযেতি [ৰিনেতি (স্যা.), ৰিহেতি (পী.), ৰিগেতি (ক. অট্ঠ.)] ছন্দো;

দিস্ৰা চ সুত্ৰা চ পিযা ভৰন্তি, কচ্চিন্নু মে পীযসি [পিয্যসি (সী. পী.)] দস্সনেন.

২৯. সৰনেন পিযো মেসি, ভিয্যো চাগম্ম দস্সনং;

এৰং পিযদস্সনো মে [এৰং পিযদস্সনো সমানো (সী. স্যা. পী.)], ৰস হংস মমন্তিকে [মম সন্তিকে (সী. স্যা. পী.)].

৩০. ৰসেয্যাম তৰাগারে, নিচ্চং সক্কতপূজিতা;

মত্তো চ একদা ৰজ্জে [ৰজ্জা (সী. পী.)], ‘‘হংসরাজং পচন্তু মে’’.

৩১. ধিরত্থু তং মজ্জপানং, যং মে পিযতরং তযা;

ন চাপি মজ্জং পিস্সামি [পিৰিস্সামি (স্যা.), পাযামি (সী. পী.)], যাৰ মে ৰচ্ছসী ঘরে.

৩২. সুৰিজানং সিঙ্গালানং, সকুণানঞ্চ [সকুন্তানঞ্চ (সী. স্যা. পী.)] ৰস্সিতং;

মনুস্সৰস্সিতং রাজ, দুব্বিজানতরং ততো.

৩৩. অপি চে মঞ্ঞতী পোসো, ঞাতি মিত্তো সখাতি ৰা;

যো পুব্বে সুমনো হুত্ৰা, পচ্ছা সম্পজ্জতে দিসো.

৩৪. যস্মিং মনো নিৰিসতি, অৰিদূরে সহাপি সো;

সন্তিকেপি হি সো দূরে, যস্মিং নাৰিসতে [যস্মা ৰিৰসতে (সী. স্যা. পী.)] মনো.

৩৫. অন্তোপি সো হোতি পসন্নচিত্তো, পারং সমুদ্দস্স পসন্নচিত্তো;

অন্তোপি সো হোতি পদুট্ঠচিত্তো, পারং সমুদ্দস্স পদুট্ঠচিত্তো.

৩৬. সংৰসন্তা ৰিৰসন্তি, যে দিসা তে রথেসভ;

আরা সন্তো সংৰসন্তি, মনসা রট্ঠৰড্ঢন.

৩৭. অতিচিরং নিৰাসেন, পিযো ভৰতি অপ্পিযো;

আমন্ত খো তং গচ্ছাম [গচ্ছামি (স্যা.)], পুরা তে হোম অপ্পিযা [হোমি অপ্পিযো (স্যা.)].

৩৮. এৰং চে যাচমানানং, অঞ্জলিং নাৰবুজ্ঝসি;

পরিচারকানং সতং [সন্তানং (সী. স্যা.), সত্তানং (পী.)], ৰচনং ন করোসি নো;

এৰং তং অভিযাচাম, পুন কযিরাসি পরিযাযং.

৩৯. এৰং চে নো ৰিহরতং, অন্তরাযো ন হেস্সতি;

তুয্হঞ্চাপি [ৰাপি (স্যা. পী. ক.)] মহারাজ, ময্হঞ্চ [ৰা (বহূসু)] রট্ঠৰড্ঢন;

অপ্পেৰ নাম পস্সেমু [পস্সেম (সী. স্যা. পী.)], অহোরতানমচ্চযেতি.

জৰনহংসজাতকং ততিযং.