৪৭১. মেণ্ডকপঞ্হজাতকং (৮)

৯৪. যেসং ন কদাচি ভূতপুব্বং, সখ্যং [সক্খিং (সী. পী.), সখি (স্যা.)] সত্তপদম্পিমস্মি লোকে;

জাতা অমিত্তা দুৰে সহাযা, পটিসন্ধায চরন্তি কিস্স হেতু.

৯৫. যদি মে অজ্জ পাতরাসকালে, পঞ্হং ন সক্কুণেয্যাথ ৰত্তুমেতং;

রট্ঠা পব্বাজযিস্সামি ৰো সব্বে, ন হি মত্থো দুপ্পঞ্ঞজাতিকেহি.

৯৬. মহাজনসমাগমম্হি ঘোরে, জনকোলাহলসঙ্গমম্হি জাতে;

ৰিক্খিত্তমনা অনেকচিত্তা, পঞ্হং ন সক্কুণোম ৰত্তুমেতং.

৯৭. একগ্গচিত্তাৰ একমেকা, রহসি গতা অত্থং নিচিন্তযিত্ৰা [অত্থানি চিন্তযিত্ৰা (স্যা. ক.)];

পৰিৰেকে সম্মসিত্ৰান ধীরা, অথ ৰক্খন্তি জনিন্দ এতমত্থং.

৯৮. উগ্গপুত্ত-রাজপুত্তিযানং, উরব্ভস্স মংসং পিযং মনাপং;

ন সুনখস্স তে অদেন্তি মংসং, অথ মেণ্ডস্স সুণেন সখ্যমস্স.

৯৯. চম্মং ৰিহনন্তি এল়কস্স, অস্সপিট্ঠত্থরস্সুখস্স [অস্সপিট্ঠত্থরণসুখস্স (সী.)] হেতু;

ন চ তে সুনখস্স অত্থরন্তি, অথ মেণ্ডস্স সুণেন সখ্যমস্স.

১০০. আৰেল্লিতসিঙ্গিকো হি মেণ্ডো, ন চ সুনখস্স ৰিসাণকানি অত্থি;

তিণভক্খো মংসভোজনো চ, অথ মেণ্ডস্স সুণেন সখ্যমস্স.

১০১. তিণমাসি পলাসমাসি মেণ্ডো, ন চ সুনখো তিণমাসি নো পলাসং;

গণ্হেয্য সুণো সসং বিল়ারং, অথ মেণ্ডস্স সুণেন সখ্যমস্স.

১০২. অট্ঠড্ঢপদো চতুপ্পদস্স, মেণ্ডো অট্ঠনখো অদিস্সমানো;

ছাদিযমাহরতী অযং ইমস্স, মংসং আহরতী অযং অমুস্স.

১০৩. পাসাদৰরগতো ৰিদেহসেট্ঠো, ৰিতিহারং অঞ্ঞমঞ্ঞভোজনানং;

অদ্দক্খি [অদ্দস (স্যা. ক.)] কির সক্খিকং জনিন্দো, বুভুক্কস্স পুণ্ণং মুখস্স [ভোভুক্খস্স চ পুণ্ণমুখস্স (সী.)] চেতং.

১০৪. লাভা ৰত মে অনপ্পরূপা, যস্স মেদিসা পণ্ডিতা কুলম্হি;

পঞ্হস্স গম্ভীরগতং নিপুণমত্থং, পটিৰিজ্ঝন্তি সুভাসিতেন ধীরা.

১০৫. অস্সতরিরথঞ্চ একমেকং, ফীতং গামৰরঞ্চ একমেকং;

সব্বেসং ৰো দম্মি পণ্ডিতানং, পরমপ্পতীতমনো সুভাসিতেনাতি.

মেণ্ডকপঞ্হজাতকং অট্ঠমং.