৪৭২. মহাপদুমজাতকং (৯)

১০৬. নাদট্ঠা [নাদিট্ঠা (ক. সী. স্যা. ক.)] পরতো দোসং, অণুং থূলানি সব্বসো;

ইস্সরো পণযে দণ্ডং, সামং অপ্পটিৰেক্খিয.

১০৭. যো চ অপ্পটিৰেক্খিত্ৰা, দণ্ডং কুব্বতি খত্তিযো;

সকণ্টকং সো গিলতি, জচ্চন্ধোৰ সমক্খিকং.

১০৮. অদণ্ডিযং দণ্ডযতি [দণ্ডিযতি (স্যা. পী.)], দণ্ডিযঞ্চ অদণ্ডিযং [অদণ্ডিয (নিয্য), ন দণ্ডযে (?)];

অন্ধোৰ ৰিসমং মগ্গং, ন জানাতি সমাসমং.

১০৯. যো চ এতানি ঠানানি, অণুং থূলানি সব্বসো;

সুদিট্ঠমনুসাসেয্য, স ৰে ৰোহরিতু [ৰোহাতু (পী.)] মরহতি.

১১০. নেকন্তমুদুনা সক্কা, একন্ততিখিণেন ৰা;

অত্তং মহন্তে [মহত্তে (স্যা. ক.)] ঠপেতুং [ঠাপেতুং (সী. স্যা. পী.)], তস্মা উভযমাচরে.

১১১. পরিভূতো মুদু হোতি, অতিতিক্খো চ ৰেরৰা;

এতঞ্চ উভযং ঞত্ৰা, অনুমজ্ঝং সমাচরে.

১১২. বহুম্পি রত্তো ভাসেয্য, দুট্ঠোপি বহু ভাসতি;

ন ইত্থিকারণা রাজ, পুত্তং ঘাতেতুমরহসি.

১১৩. সব্বোৰ [সব্বো চ (ক. সী. পী.)] লোকো একতো [একন্তো (সী. পী.)], ইত্থী চ অযমেকিকা;

তেনাহং পটিপজ্জিস্সং, গচ্ছথ পক্খিপথেৰ [পক্খিপেথ (স্যা. অট্ঠ.)] তং.

১১৪. অনেকতালে নরকে, গম্ভীরে চ সুদুত্তরে [গম্ভীরে সুদুরুত্তরে (পী. ক.)];

পাতিতো গিরিদুগ্গস্মিং, কেন ত্ৰং তত্থ নামরি.

১১৫. নাগো জাতফণো তত্থ, থামৰা গিরিসানুজো;

পচ্চগ্গহি মং ভোগেহি, তেনাহং তত্থ নামরিং.

১১৬. এহি তং পটিনেস্সামি, রাজপুত্ত সকং ঘরং;

রজ্জং কারেহি [কারেসি (সী.)] ভদ্দন্তে, কিং অরঞ্ঞে করিস্সসি.

১১৭. যথা গিলিত্ৰা বল়িসং, উদ্ধরেয্য সলোহিতং;

উদ্ধরিত্ৰা সুখী অস্স, এৰং [সুখং (পী. ক.)] পস্সামি অত্তনং [অত্তনি (পী. ক.), অত্তনা (স্যা.), এৰং অহম্পি পুন সোত্থিভাৰপ্পত্তং গিলিতবল়িসং পুরিসমিৰ অত্তানং পস্সামীতি (অট্ঠ. সংৰণ্ণনা)].

১১৮. কিং নু ত্ৰং বল়িসং ব্রূসি, কিং ত্ৰং ব্রূসি সলোহিতং;

কিং নু ত্ৰং উব্ভতং ব্রূসি, তং মে অক্খাহি পুচ্ছিতো.

১১৯. কামাহং বল়িসং ব্রূমি, হত্থিঅস্সং সলোহিতং;

চত্তাহং উব্ভতং ব্রূমি, এৰং জানাহি খত্তিয.

১২০. চিঞ্চামাণৰিকা মাতা, দেৰদত্তো চ মে পিতা;

আনন্দো পণ্ডিতো নাগো, সারিপুত্তো চ দেৰতা;

রাজপুত্তো অহং আসিং [অহং তদা রাজপুত্তো (সী. স্যা. পী.)], এৰং ধারেথ জাতকন্তি.

মহাপদুমজাতকং নৰমং.