১২. দ্ৰাদসকনিপাতো

৪৬৪. চূল়কুণালজাতকং (১)

১. লুদ্ধানং [খুদ্দানং (সী. স্যা. পী.)] লহুচিত্তানং, অকতঞ্ঞূন দুব্ভিনং;

নাদেৰসত্তো পুরিসো, থীনং সদ্ধাতুমরহতি.

২. ন তা পজানন্তি কতং ন কিচ্চং, ন মাতরং পিতরং ভাতরং ৰা;

অনরিযা সমতিক্কন্তধম্মা, সস্সেৰ চিত্তস্স ৰসং ৰজন্তি.

৩. চিরানুৰুট্ঠম্পি [চিরানুৰুত্থম্পি (সী. পী.)] পিযং মনাপং, অনুকম্পকং পাণসমম্পি ভত্তুং [সন্তং (সী. স্যা. পী.)];

আৰাসু কিচ্চেসু চ নং জহন্তি, তস্মাহমিত্থীনং ন ৰিস্সসামি.

৪. থীনঞ্হি চিত্তং যথা ৰানরস্স, কন্নপ্পকন্নং যথা রুক্খছাযা;

চলাচলং হদযমিত্থিযানং, চক্কস্স নেমি ৰিয পরিৰত্ততি.

৫. যদা তা পস্সন্তি সমেক্খমানা, আদেয্যরূপং পুরিসস্স ৰিত্তং;

সণ্হাহি ৰাচাহি নযন্তি মেনং, কম্বোজকা জলজেনেৰ অস্সং.

৬. যদা ন পস্সন্তি সমেক্খমানা, আদেয্যরূপং পুরিসস্স ৰিত্তং;

সমন্ততো নং পরিৰজ্জযন্তি, তিণ্ণো নদীপারগতোৰ কুল্লং.

৭. সিলেসূপমা সিখিরিৰ সব্বভক্খা, তিক্খমাযা নদীরিৰ সীঘসোতা;

সেৰন্তি হেতা পিযমপ্পিযঞ্চ, নাৰা যথা ওরকূলং পরঞ্চ.

৮. ন তা একস্স ন দ্ৰিন্নং, আপণোৰ পসারিতো;

যো তা ময্হন্তি মঞ্ঞেয্য, ৰাতং জালেন বাধযে [বন্ধযে (স্যা. ক.)].

৯. যথা নদী চ পন্থো চ, পানাগারং সভা পপা;

এৰং লোকিত্থিযো নাম, ৰেলা তাসং ন ৰিজ্জতি [ইমিস্সা গাথায পুব্বদ্ধাপরদ্ধং ৰিপরিযাযেন দিস্সতি (ক.)].

১০. ঘতাসনসমা এতা, কণ্হসপ্পসিরূপমা;

গাৰো বহিতিণস্সেৰ, ওমসন্তি ৰরং ৰরং.

১১. ঘতাসনং কুঞ্জরং কণ্হসপ্পং, মুদ্ধাভিসিত্তং পমদা চ সব্বা;

এতে নরো নিচ্চযতো [নিচ্চযত্তো (সী. পী.)] ভজেথ, তেসং হৰে দুব্বিদু সব্বভাৰো [সচ্চভাৰো (স্যা.)].

১২. নচ্চন্তৰণ্ণা ন বহূনং কন্তা, ন দক্খিণা পমদা সেৰিতব্বা;

ন পরস্স ভরিযা ন ধনস্স হেতু, এতিত্থিযো পঞ্চ ন সেৰিতব্বাতি.

চূল়কুণালজাতকং পঠমং.

৪৬৫. ভদ্দসালজাতকং (২)

১৩. কা ত্ৰং সুদ্ধেহি ৰত্থেহি, অঘে ৰেহাযসং [ৰেহাসযং (সী. পী.)] ঠিতা;

কেন ত্যাস্সূনি ৰত্তন্তি, কুতো তং ভযমাগতং.

১৪. তৰেৰ দেৰ ৰিজিতে, ভদ্দসালোতি মং ৰিদূ;

সট্ঠি [সট্ঠিং (সী. পী.)] ৰস্সসহস্সানি, তিট্ঠতো পূজিতস্স মে.

১৫. কারযন্তা নগরানি, অগারে চ দিসম্পতি;

ৰিৰিধে চাপি পাসাদে, ন মং তে অচ্চমঞ্ঞিসুং;

যথেৰ মং তে পূজেসুং, তথেৰ ত্ৰম্পি পূজয.

১৬. তং ইৰাহং [তঞ্চ অহং (সী. স্যা. পী.)] ন পস্সামি, থূলং কাযেন তে দুমং;

আরোহপরিণাহেন, অভিরূপোসি জাতিযা.

১৭. পাসাদং কারযিস্সামি, একত্থম্ভং মনোরমং;

তত্থ তং উপনেস্সামি, চিরং তে যক্খ জীৰিতং.

১৮. এৰং চিত্তং উদপাদি, সরীরেন ৰিনাভাৰো;

পুথুসো মং ৰিকন্তিত্ৰা, খণ্ডসো অৰকন্তথ.

১৯. অগ্গে চ ছেত্ৰা মজ্ঝে চ, পচ্ছা মূলম্হি ছিন্দথ [মূলঞ্চ ছিন্দথ (সী.), মূলং ৰিছিন্দথ (পী.)];

এৰং মে ছিজ্জমানস্স, ন দুক্খং মরণং সিযা.

২০. হত্থপাদং [হত্থপাদে (ক.)] যথা ছিন্দে [ছিন্নে (ক.)], কণ্ণনাসঞ্চ জীৰতো;

ততো পচ্ছা সিরো ছিন্দে, তং দুক্খং মরণং সিযা.

২১. সুখং নু খণ্ডসো ছিন্নং, ভদ্দসালৰনপ্পতি;

কিং হেতু কিং উপাদায, খণ্ডসো ছিন্নমিচ্ছসি.

২২. যঞ্চ হেতুমুপাদায, হেতুং ধম্মূপসংহিতং;

খণ্ডসো ছিন্নমিচ্ছামি, মহারাজ সুণোহি মে.

২৩. ঞাতী মে সুখসংৰদ্ধা, মম পস্সে নিৰাতজা;

তেপিহং উপহিংসেয্যং, পরেসং অসুখোচিতং.

২৪. চেতেয্যরূপং [চেতব্বরূপং (সী. পী.)] চেতেসি, ভদ্দসালৰনপ্পতি;

হিতকামোসি ঞাতীনং, অভযং সম্ম দম্মি তেতি.

ভদ্দসালজাতকং দুতিযং.

৪৬৬. সমুদ্দৰাণিজজাতকং (৩)

২৫. কসন্তি ৰপন্তি তে জনা, মনুজা কম্মফলূপজীৰিনো;

নযিমস্স দীপকস্স ভাগিনো, জম্বুদীপা ইদমেৰ নো ৰরং.

২৬. তিপঞ্চরত্তূপগতম্হি চন্দে, ৰেগো মহা হেহিতি সাগরস্স;

উপ্লৰিস্সং দীপমিমং উল়ারং, মা ৰো ৰধী গচ্ছথ লেণমঞ্ঞং.

২৭. ন জাতুযং সাগরৰারিৰেগো, উপ্লৰিস্সং দীপমিমং উল়ারং;

তং মে নিমিত্তেহি বহূহি দিট্ঠং, মা ভেথ কিং সোচথ মোদথৰ্হো [মোদথ ৰো (ক.) ৬.৩৮ মোগ্গল্লানসুত্তং পস্সিতব্বং].

২৮. পহূতভক্খং বহুঅন্নপানং, পত্তত্থ আৰাসমিমং উল়ারং;

ন ৰো ভযং পটিপস্সামি কিঞ্চি, আপুত্তপুত্তেহি পমোদথৰ্হো.

২৯. যো দেৰোযং দক্খিণাযং [দক্খিণস্সং (সী.)] দিসাযং, খেমন্তি পক্কোসতি তস্স সচ্চং;

ন উত্তরো ৰেদি ভযাভযস্স, মা ভেথ কিং সোচথ মোদথৰ্হো.

৩০. যথা ইমে ৰিপ্পৰদন্তি যক্খা, একো ভযং সংসতি খেমমেকো;

তদিঙ্ঘ ময্হং ৰচনং সুণাথ, খিপ্পং লহুং মা ৰিনস্সিম্হ সব্বে.

৩১. সব্বে সমাগম্ম করোম নাৰং, দোণিং দল়্হং সব্বযন্তূপপন্নং;

সচে অযং দক্খিণো সচ্চমাহ, মোঘং পটিক্কোসতি উত্তরোযং;

সা চেৰ নো হেহিতি আপদত্থা, ইমঞ্চ দীপং ন পরিচ্চজেম.

৩২. সচে চ খো উত্তরো সচ্চমাহ, মোঘং পটিক্কোসতি দক্খিণোযং;

তমেৰ নাৰং অভিরুয্হ সব্বে, এৰং মযং সোত্থি তরেমু পারং.

৩৩. ন ৰে সুগণ্হং পঠমেন সেট্ঠং, কনিট্ঠমাপাথগতং গহেত্ৰা;

যো চীধ তচ্ছং [মজ্ঝং (সী. স্যা. পী.)] পৰিচেয্য গণ্হতি [গণ্হি (ক.)], স ৰে নরো সেট্ঠমুপেতি ঠানং.

৩৪. যথাপি তে সাগরৰারিমজ্ঝে, সকম্মুনা সোত্থি ৰহিংসু ৰাণিজা;

অনাগতত্থং পটিৰিজ্ঝিযান, অপ্পম্পি নাচ্চেতি স ভূরিপঞ্ঞো.

৩৫. বালা চ মোহেন রসানুগিদ্ধা, অনাগতং অপ্পটিৰিজ্ঝিযত্থং;

পচ্চুপ্পন্নে সীদন্তি অত্থজাতে, সমুদ্দমজ্ঝে যথা তে মনুস্সা.

৩৬. অনাগতং পটিকযিরাথ কিচ্চং, ‘‘মা মং কিচ্চং কিচ্চকালে ব্যধেসি’’;

তং তাদিসং পটিকত [পটিকতং (ক.), পটিগত (সী. অট্ঠ.), পটিকচ্চ (?)] কিচ্চকারিং, ন তং কিচ্চং কিচ্চকালে ব্যধেতীতি.

সমুদ্দৰাণিজজাতকং ততিযং.

৪৬৭. কামজাতকং (৪)

৩৭. কামং কামযমানস্স, তস্স চে তং সমিজ্ঝতি;

অদ্ধা পীতিমনো হোতি, লদ্ধা মচ্চো যদিচ্ছতি.

৩৮. কামং কামযমানস্স, তস্স চে তং সমিজ্ঝতি;

ততো নং অপরং কামে, ধম্মে তণ্হংৰ ৰিন্দতি.

৩৯. গৰংৰ সিঙ্গিনো সিঙ্গং, ৰড্ঢমানস্স ৰড্ঢতি;

এৰং মন্দস্স পোসস্স, বালস্স অৰিজানতো;

ভিয্যো তণ্হা পিপাসা চ, ৰড্ঢমানস্স ৰড্ঢতি.

৪০. পথব্যা সালিযৰকং, গৰস্সং [গৰাসং (সী. স্যা. পী.)] দাসপোরিসং;

দত্ৰা চ [দত্ৰাপি (সী. স্যা.), দত্ৰা ৰা (পী.)] নালমেকস্স, ইতি ৰিদ্ৰা [ৰিদ্ধা (স্যা.)] সমং চরে.

৪১. রাজা পসয্হ পথৰিং ৰিজিত্ৰা, সসাগরন্তং মহিমাৰসন্তো;

ওরং সমুদ্দস্স অতিত্তরূপো [অতিত্তিরূপো (ক.)], পারং সমুদ্দস্সপি পত্থযেথ.

৪২. যাৰ অনুস্সরং কামে, মনসা তিত্তি নাজ্ঝগা;

ততো নিৰত্তা পটিকম্ম দিস্ৰা, তে ৰে সুতিত্তা যে [তিত্তা (সী. স্যা. পী.)] পঞ্ঞায তিত্তা.

৪৩. পঞ্ঞায তিত্তিনং [তিত্তীনং (সী. স্যা.)] সেট্ঠং, ন সো কামেহি তপ্পতি;

পঞ্ঞায তিত্তং পুরিসং, তণ্হা ন কুরুতে ৰসং.

৪৪. অপচিনেথেৰ কামানং [কামানি (সী. স্যা. পী.)], অপ্পিচ্ছস্স অলোলুপো;

সমুদ্দমত্তো পুরিসো, ন সো কামেহি তপ্পতি.

৪৫. রথকারোৰ চম্মস্স, পরিকন্তং উপাহনং;

যং যং চজতি [জহতি (স্যা. ক.)] কামানং, তং তং সম্পজ্জতে সুখং;

সব্বং চে সুখমিচ্ছেয্য, সব্বে কামে পরিচ্চজে.

৪৬. অট্ঠ তে ভাসিতা গাথা, সব্বা হোন্তি সহস্সিযো [সহস্সিযা (?) উপরি সুতসোমজাতকে তথা দিস্সতি];

পটিগণ্হ মহাব্রহ্মে, সাধেতং তৰ ভাসিতং.

৪৭. ন মে অত্থো সহস্সেহি, সতেহি নহুতেহি ৰা;

পচ্ছিমং ভাসতো গাথং, কামে মে ন রতো মনো.

৪৮. ভদ্রকো [সদ্দো (সী.)] ৰতাযং মাণৰকো, সব্বলোকৰিদূ মুনি;

যো ইমং তণ্হং [যো তণ্হং (সী. স্যা.)] দুক্খজননিং, পরিজানাতি পণ্ডিতোতি.

কামজাতকং চতুত্থং.

৪৬৮. জনসন্ধজাতকং (৫)

৪৯. দস খলু ইমানি [খলুমানি (স্যা.)] ঠানানি, যানি পুব্বে অকরিত্ৰা;

স পচ্ছা মনুতপ্পতি, ইচ্চেৰাহ [ইচ্চাহ রাজা (সী. স্যা. পী.)] জনসন্ধো.

৫০. অলদ্ধা ৰিত্তং তপ্পতি, পুব্বে অসমুদানিতং;

ন পুব্বে ধনমেসিস্সং, ইতি পচ্ছানুতপ্পতি.

৫১. সক্যরূপং পুরে সন্তং, মযা সিপ্পং ন সিক্খিতং;

কিচ্ছা ৰুত্তি অসিপ্পস্স, ইতি পচ্ছানুতপ্পতি.

৫২. কূটৰেদী পুরে আসিং, পিসুণো পিট্ঠিমংসিকো;

চণ্ডো চ ফরুসো চাপি [চাসিং (সী. স্যা. পী.)], ইতি পচ্ছানুতপ্পতি.

৫৩. পাণাতিপাতী পুরে আসিং, লুদ্দো চাপি [চাসিং (সী. পী.)] অনারিযো;

ভূতানং নাপচাযিস্সং, ইতি পচ্ছানুতপ্পতি.

৫৪. বহূসু ৰত সন্তীসু, অনাপাদাসু ইত্থিসু;

পরদারং অসেৰিস্সং, ইতি পচ্ছানুতপ্পতি.

৫৫. বহুম্হি ৰত সন্তম্হি, অন্নপানে উপট্ঠিতে;

ন পুব্বে অদদং [অদদিং (সী.)] দানং, ইতি পচ্ছানুতপ্পতি.

৫৬. মাতরং পিতরঞ্চাপি, জিণ্ণকং গতযোব্বনং [জিণ্ণকে গতযোব্বনে (সী. স্যা. পী.)];

পহু সন্তো ন পোসিস্সং, ইতি পচ্ছানুতপ্পতি.

৫৭. আচরিযমনুসত্থারং, সব্বকামরসাহরং;

পিতরং অতিমঞ্ঞিস্সং, ইতি পচ্ছানুতপ্পতি.

৫৮. সমণে ব্রাহ্মণে চাপি, সীলৰন্তে বহুস্সুতে;

ন পুব্বে পযিরুপাসিস্সং, ইতি পচ্ছানুতপ্পতি.

৫৯. সাধু হোতি তপো চিণ্ণো, সন্তো চ পযিরুপাসিতো;

ন চ পুব্বে তপো চিণ্ণো, ইতি পচ্ছানুতপ্পতি.

৬০. যো চ এতানি ঠানানি, যোনিসো পটিপজ্জতি;

করং পুরিসকিচ্চানি, স পচ্ছা নানুতপ্পতীতি.

জনসন্ধজাতকং পঞ্চমং.

৪৬৯. মহাকণ্হজাতকং (৬)

৬১. কণ্হো কণ্হো চ ঘোরো চ, সুক্কদাঠো পভাসৰা [পতাপৰা (সী. স্যা. পী.)];

বদ্ধো পঞ্চহি রজ্জূহি, কিং রৰি [ধীর (সী. পী.), ৰীর (স্যা.)] সুনখো তৰ.

৬২. নাযং মিগানমত্থায, উসীনক [উসীনর (সী. পী.), উসীন্নর (স্যা.)] ভৰিস্সতি;

মনুস্সানং অনযো হুত্ৰা, তদা কণ্হো পমোক্খতি.

৬৩. পত্তহত্থা সমণকা, মুণ্ডা সঙ্ঘাটিপারুতা;

নঙ্গলেহি কসিস্সন্তি, তদা কণ্হো পমোক্খতি.

৬৪. তপস্সিনিযো [তপনীযা (ক.) দুতিযন্তপদানি হেতানি] পব্বজিতা, মুণ্ডা সঙ্ঘাটিপারুতা;

যদা লোকে গমিস্সন্তি, তদা কণ্হো পমোক্খতি.

৬৫. দীঘোত্তরোট্ঠা জটিলা, পঙ্কদন্তা রজস্সিরা;

ইণং চোদায [ৰোদায (সী. পী.), চোদয (স্যা.)] গচ্ছন্তি, তদা কণ্হো পমোক্খতি.

৬৬. অধিচ্চ ৰেদে [ৰেদং (ক.)] সাৰিত্তিং, যঞ্ঞতন্তঞ্চ [তন্ত্রঞ্চ (সী. স্যা. পী.)] ব্রাহ্মণা;

ভতিকায যজিস্সন্তি, তদা কণ্হো পমোক্খতি.

৬৭. মাতরং পিতরঞ্চাপি, জিণ্ণকং গতযোব্বনং;

পহূ সন্তো [সন্তা (সী.)] ন ভরন্তি, তদা কণ্হো পমোক্খতি.