৪৫৩. মহামঙ্গলজাতকং (১৫)

১৫৫. কিংসু নরো জপ্পমধিচ্চকালে, কং ৰা ৰিজ্জং কতমং ৰা সুতানং;

সো মচ্চো অস্মিঞ্চ [অস্মিংৰ (পী.)] পরম্হি লোকে, কথং করো সোত্থানেন গুত্তো.

১৫৬. যস্স দেৰা পিতরো চ সব্বে, সরীসপা [সিরিংসপা (সী. স্যা. পী.)] সব্বভূতানি চাপি;

মেত্তায নিচ্চং অপচিতানি হোন্তি, ভূতেসু ৰে সোত্থানং তদাহু.

১৫৭. যো সব্বলোকস্স নিৰাতৰুত্তি, ইত্থীপুমানং সহদারকানং;

খন্তা দুরুত্তানমপ্পটিকূলৰাদী, অধিৰাসনং সোত্থানং তদাহু.

১৫৮. যো নাৰজানাতি সহাযমিত্তে [সহাযমত্তে (সী. পী.)], সিপ্পেন কুল্যাহি ধনেন জচ্চা;

রুচিপঞ্ঞো অত্থকালে মতীমা [মুতীমা (সী. পী.)], সহাযেসু ৰে সোত্থানং তদাহু.

১৫৯. মিত্তানি ৰে যস্স ভৰন্তি সন্তো, সংৰিস্সত্থা অৰিসংৰাদকস্স;

ন মিত্তদুব্ভী সংৰিভাগী ধনেন, মিত্তেসু ৰে সোত্থানং তদাহু.

১৬০. যস্স ভরিযা তুল্যৰযা সমগ্গা, অনুব্বতা ধম্মকামা পজাতা [সজাতা (ক.)];

কোলিনিযা সীলৰতী পতিব্বতা, দারেসু ৰে সোত্থানং তদাহু.

১৬১. যস্স রাজা ভূতপতি [ভূতপতী (সী. স্যা. পী.)] যসস্সী, জানাতি সোচেয্যং পরক্কমঞ্চ;

অদ্ৰেজ্ঝতা সুহদযং মমন্তি, রাজূসু ৰে সোত্থানং তদাহু.

১৬২. অন্নঞ্চ পানঞ্চ দদাতি সদ্ধো, মালঞ্চ গন্ধঞ্চ ৰিলেপনঞ্চ;

পসন্নচিত্তো অনুমোদমানো, সগ্গেসু ৰে সোত্থানং তদাহু.

১৬৩. যমরিযধম্মেন পুনন্তি ৰুদ্ধা, আরাধিতা সমচরিযায সন্তো;

বহুস্সুতা ইসযো সীলৰন্তো, অরহন্তমজ্ঝে সোত্থানং তদাহু.

১৬৪. এতানি খো সোত্থানানি লোকে, ৰিঞ্ঞুপ্পসত্থানি সুখুদ্রযানি [সুখিন্দ্রিযানি (পী.)];

তানীধ সেৰেথ নরো সপঞ্ঞো, ন হি মঙ্গলে কিঞ্চনমত্থি সচ্চন্তি.

মহামঙ্গলজাতকং পন্নরসমং.