৪৫৪. ঘটপণ্ডিতজাতকং (১৬)

১৬৫. উট্ঠেহি কণ্হ কিং সেসি, কো অত্থো সুপনেন তে;

যোপি তুয্হং [তাযং (পী.)] সকো ভাতা, হদযং চক্খু চ [চক্খুংৰ (পী.)] দক্খিণং;

তস্স ৰাতা বলীযন্তি, ঘটো জপ্পতি [সসং জপ্পতি (?)] কেসৰ.

১৬৬. তস্স তং ৰচনং সুত্ৰা, রোহিণেয্যস্স কেসৰো;

তরমানরূপো ৰুট্ঠাসি, ভাতুসোকেন অট্টিতো.

১৬৭. কিং নু উম্মত্তরূপোৰ, কেৰলং দ্ৰারকং ইমং;

সসো সসোতি লপসি, কো নু তে সসমাহরি.

১৬৮. সোৰণ্ণমযং মণীমযং, লোহমযং অথ রূপিযামযং;

সঙ্খসিলাপৰাল়মযং, কারযিস্সামি তে সসং.

১৬৯. সন্তি অঞ্ঞেপি সসকা, অরঞ্ঞে ৰনগোচরা;

তেপি তে আনযিস্সামি, কীদিসং সসমিচ্ছসি.

১৭০. ন চাহমেতে [ন চাহমেতং (সী.), ন ৰাহমেতে (স্যা.), ন ৰাহমেতং (পী.)] ইচ্ছামি, যে সসা পথৰিস্সিতা [পঠৰিংসিতা (সী. স্যা. পী.)];

চন্দতো সসমিচ্ছামি, তং মে ওহর কেসৰ.

১৭১. সো নূন মধুরং ঞাতি, জীৰিতং ৰিজহিস্সসি;

অপত্থিযং যো পত্থযসি, চন্দতো সসমিচ্ছসি.

১৭২. এৰং চে কণ্হ জানাসি, যদঞ্ঞমনুসাসসি;

কস্মা পুরে মতং পুত্তং, অজ্জাপি মনুসোচসি.

১৭৩. যং ন লব্ভা মনুস্সেন, অমনুস্সেন ৰা পুন [পন (পে. ৰ. ২১৫)];

জাতো মে মা মরী পুত্তো, কুতো লব্ভা অলব্ভিযং.

১৭৪. ন মন্তা মূলভেসজ্জা, ওসধেহি ধনেন ৰা;

সক্কা আনযিতুং কণ্হ, যং পেতমনুসোচসি.

১৭৫. যস্স এতাদিসা অস্সু, অমচ্চা পুরিসপণ্ডিতা;

যথা নিজ্ঝাপযে অজ্জ, ঘটো পুরিসপণ্ডিতো.

১৭৬. আদিত্তং ৰত মং সন্তং, ঘতসিত্তংৰ পাৰকং;

ৰারিনা ৰিয ওসিঞ্চং, সব্বং নিব্বাপযে দরং.

১৭৭. অব্বহী ৰত মে সল্লং, যমাসি হদযস্সিতং;

যো মে সোকপরেতস্স, পুত্তসোকং অপানুদি.

১৭৮. সোহং অব্বূল়্হসল্লোস্মি, ৰীতসোকো অনাৰিলো;

ন সোচামি ন রোদামি, তৰ সুত্ৰান মাণৰ [ভাতিক (পে. ৰ. ২২৪)].

১৭৯. এৰং করোন্তি সপ্পঞ্ঞা, যে হোন্তি অনুকম্পকা;

নিৰত্তযন্তি সোকম্হা, ঘটো জেট্ঠংৰ ভাতরন্তি.

ঘটপণ্ডিতজাতকং সোল়সমং.

দসকনিপাতং নিট্ঠিতং.