১০. দসকনিপাতো

৪৩৯. চতুদ্ৰারজাতকং (১)

১. চতুদ্ৰারমিদং নগরং, আযসং দল়্হপাকারং;

ওরুদ্ধপটিরুদ্ধোস্মি, কিং পাপং পকতং মযা.

২. সব্বে অপিহিতা দ্ৰারা, ওরুদ্ধোস্মি যথা দিজো;

কিমাধিকরণং যক্খ, চক্কাভিনিহতো অহং.

৩. লদ্ধা সতসহস্সানি, অতিরেকানি ৰীসতি;

অনুকম্পকানং ঞাতীনং, ৰচনং সম্ম নাকরি.

৪. লঙ্ঘিং সমুদ্দং পক্খন্দি, সাগরং অপ্পসিদ্ধিকং;

চতুব্ভি অট্ঠজ্ঝগমা, অট্ঠাহিপি চ সোল়স.

৫. সোল়সাহি চ বাত্তিংস, অত্রিচ্ছং চক্কমাসদো;

ইচ্ছাহতস্স পোসস্স, চক্কং ভমতি মত্থকে.

৬. উপরিৰিসালা দুপ্পূরা, ইচ্ছা ৰিসটগামিনী [ৰিসটগামিনিং (পী. ক.)];

যে চ তং অনুগিজ্ঝন্তি, তে হোন্তি চক্কধারিনো.

৭. বহুভণ্ডং [বহুং ভণ্ডং (সী. পী.)] অৰহায, মগ্গং অপ্পটিৰেক্খিয;

যেসঞ্চেতং অসঙ্খাতং, তে হোন্তি চক্কধারিনো.

৮. কম্মং সমেক্খে ৰিপুলঞ্চ ভোগং, ইচ্ছং ন সেৰেয্য অনত্থসংহিতং;

করেয্য ৰাক্যং অনুকম্পকানং, তং তাদিসং নাতিৰত্তেয্য চক্কং.

৯. কীৰচিরং নু মে যক্খ, চক্কং সিরসি ঠস্সতি;

কতি ৰস্সসহস্সানি, তং মে অক্খাহি পুচ্ছিতো.

১০. অতিসরো পচ্চসরো [অচ্চসরো (সী. স্যা. পী.)], মিত্তৰিন্দ সুণোহি মে;

চক্কং তে সিরসি [সিরস্মি (স্যা.)] মাৰিদ্ধং, ন তং জীৰং পমোক্খসীতি.

চতুদ্ৰারজাতকং পঠমং.

৪৪০. কণ্হজাতকং (২)

১১. কণ্হো ৰতাযং পুরিসো, কণ্হং ভুঞ্জতি ভোজনং;

কণ্হে ভূমিপদেসস্মিং, ন ময্হং মনসো পিযো.

১২. ন কণ্হো তচসা হোতি, অন্তোসারো হি ব্রাহ্মণো;

যস্মিং পাপানি কম্মানি, স ৰে কণ্হো সুজম্পতি.

১৩. এতস্মিং তে সুলপিতে, পতিরূপে সুভাসিতে;

ৰরং ব্রাহ্মণ তে দম্মি, যং কিঞ্চি মনসিচ্ছসি.

১৪. ৰরঞ্চে মে অদো সক্ক, সব্বভূতানমিস্সর;

সুনিক্কোধং সুনিদ্দোসং, নিল্লোভং ৰুত্তিমত্তনো;

নিস্নেহমভিকঙ্খামি, এতে মে চতুরো ৰরে.

১৫. কিং নু কোধে ৰা [কোধেৰ (সী. পী.)] দোসে ৰা, লোভে স্নেহে চ ব্রাহ্মণ;

আদীনৰং ত্ৰং পস্সসি [সম্পস্সসি (সী. পী.)], তং মে অক্খাহি পুচ্ছিতো.

১৬. অপ্পো হুত্ৰা বহু হোতি, ৰড্ঢতে সো অখন্তিজো;

আসঙ্গী বহুপাযাসো, তস্মা কোধং ন রোচযে.

১৭. দুট্ঠস্স ফরুসা [পঠমা (পী. সী. নিয্য)] ৰাচা, পরামাসো অনন্তরা;

ততো পাণি ততো দণ্ডো, সত্থস্স পরমা গতি [পরামসতি (ক.)];

দোসো কোধসমুট্ঠানো, তস্মা দোসং ন রোচযে.

১৮. আলোপসাহসাকারা [সহসাকারা (সী. স্যা. পী.)], নিকতী ৰঞ্চনানি চ;

দিস্সন্তি লোভধম্মেসু, তস্মা লোভং ন রোচযে.

১৯. স্নেহসঙ্গথিতা [সঙ্গধিতা (ক.), সঙ্গন্তিতা (স্যা.)] গন্থা, সেন্তি মনোমযা পুথূ;

তে ভুসং উপতাপেন্তি, তস্মা স্নেহং ন রোচযে.

২০. এতস্মিং তে সুলপিতে, পতিরূপে সুভাসিতে;

ৰরং ব্রাহ্মণ তে দম্মি, যং কিঞ্চি মনসিচ্ছসি.

২১. ৰরঞ্চে মে অদো সক্ক, সব্বভূতানমিস্সর;

অরঞ্ঞে মে ৰিহরতো, নিচ্চং একৰিহারিনো;

আবাধা মা [ন (স্যা. পী.)] উপ্পজ্জেয্যুং, অন্তরাযকরা ভুসা.

২২. এতস্মিং তে সুলপিতে, পতিরূপে সুভাসিতে;

ৰরং ব্রাহ্মণ তে দম্মি, যং কিঞ্চি মনসিচ্ছসি.

২৩. ৰরঞ্চে মে অদো সক্ক, সব্বভূতানমিস্সর;

ন মনো ৰা সরীরং ৰা, মং-কতে সক্ক কস্সচি;

কদাচি উপহঞ্ঞেথ, এতং সক্ক ৰরং ৰরেতি.

কণ্হজাতকং দুতিযং.

৪৪১. চতুপোসথিযজাতকং (৩)

২৪. যো কোপনেয্যে ন করোতি কোপং, ন কুজ্ঝতি সপ্পুরিসো কদাচি;

কুদ্ধোপি সো নাৰিকরোতি কোপং, তং ৰে নরং সমণমাহু [সমণং আহু (সী.)] লোকে.

২৫. ঊনূদরো যো সহতে জিঘচ্ছং, দন্তো তপস্সী মিতপানভোজনো;

আহারহেতু ন করোতি পাপং, তং ৰে নরং সমণমাহু লোকে.

২৬. খিড্ডং রতিং ৰিপ্পজহিত্ৰান সব্বং, ন চালিকং ভাসসি কিঞ্চি লোকে;

ৰিভূসট্ঠানা ৰিরতো মেথুনস্মা, তং ৰে নরং সমণমাহু লোকে.

২৭. পরিগ্গহং লোভধম্মঞ্চ সব্বং, যো ৰে পরিঞ্ঞায পরিচ্চজেতি;

দন্তং ঠিতত্তং অমমং নিরাসং, তং ৰে নরং সমণমাহু লোকে.

২৮. পুচ্ছাম কত্তারমনোমপঞ্ঞং [মনোমপঞ্ঞ (স্যা. ক.)], কথাসু নো ৰিগ্গহো অত্থি জাতো;

ছিন্দজ্জ কঙ্খং ৰিচিকিচ্ছিতানি, তদজ্জ [তযাজ্জ (সী.)] কঙ্খং ৰিতরেমু সব্বে.

২৯. যে পণ্ডিতা অত্থদসা ভৰন্তি, ভাসন্তি তে যোনিসো তত্থ কালে;

কথং নু কথানং অভাসিতানং, অত্থং নযেয্যুং কুসলা জনিন্দা.

৩০. কথং হৰে ভাসতি নাগরাজা, গরুল়ো পন ৰেনতেয্যো কিমাহ;

গন্ধব্বরাজা পন কিং ৰদেসি, কথং পন কুরূনং রাজসেট্ঠো.

৩১. খন্তিং হৰে ভাসতি নাগরাজা, অপ্পাহারং গরুল়ো ৰেনতেয্যো;

গন্ধব্বরাজা রতিৰিপ্পহানং, অকিঞ্চনং কুরূনং রাজসেট্ঠো.

৩২. সব্বানি এতানি সুভাসিতানি, ন হেত্থ দুব্ভাসিতমত্থি কিঞ্চি;

যস্মিঞ্চ এতানি পতিট্ঠিতানি, অরাৰ নাভ্যা সুসমোহিতানি;

চতুব্ভি ধম্মেহি সমঙ্গিভূতং, তং ৰে নরং সমণমাহু লোকে.

৩৩. তুৰঞ্হি [তুৰং নু (সী. পী.)] সেট্ঠো ত্ৰমনুত্তরোসি, ত্ৰং ধম্মগূ ধম্মৰিদূ সুমেধো;

পঞ্ঞায পঞ্হং সমধিগ্গহেত্ৰা, অচ্ছেচ্ছি ধীরো ৰিচিকিচ্ছিতানি;

অচ্ছেচ্ছি কঙ্খং ৰিচিকিচ্ছিতানি, চুন্দো যথা নাগদন্তং খরেন.

৩৪. নীলুপ্পলাভং ৰিমলং অনগ্ঘং, ৰত্থং ইদং ধূমসমানৰণ্ণং;

পঞ্হস্স ৰেয্যাকরণেন তুট্ঠো, দদামি তে ধম্মপূজায ধীর.

৩৫. সুৰণ্ণমালং সতপত্তফুল্লিতং, সকেসরং রত্নসহস্সমণ্ডিতং;

পঞ্হস্স ৰেয্যাকরণেন তুট্ঠো, দদামি তে ধম্মপূজায ধীর.

৩৬. মণিং অনগ্ঘং রুচিরং পভস্সরং, কণ্ঠাৰসত্তং [ৰসিতং (ক.)] মণিভূসিতং মে;

পঞ্হস্স ৰেয্যাকরণেন তুট্ঠো, দদামি তে ধম্মপূজায ধীর.

৩৭. গৰং সহস্সং উসভঞ্চ নাগং, আজঞ্ঞযুত্তে চ রথে দস ইমে;

পঞ্হস্স ৰেয্যাকরণেন তুট্ঠো, দদামি তে গামৰরানি সোল়স.

৩৮. সারিপুত্তো তদা নাগো, সুপণ্ণো পন কোলিতো;

গন্ধব্বরাজা অনুরুদ্ধো, রাজা আনন্দ পণ্ডিতো;

ৰিধুরো বোধিসত্তো চ, এৰং ধারেথ জাতকন্তি.

চতুপোসথিযজাতকং ততিযং.

৪৪২. সঙ্খজাতকং (৪)

৩৯. বহুস্সুতো সুতধম্মোসি সঙ্খ, দিট্ঠা তযা সমণব্রাহ্মণা চ;

অথক্খণে দস্সযসে ৰিলাপং, অঞ্ঞো নু কো তে পটিমন্তকো মযা.

৪০. সুব্ভূ [সুব্ভা (স্যা.), সুম্ভা, সুভ্মা (ক.)] সুভা সুপ্পটিমুক্ককম্বু, পগ্গয্হ সোৰণ্ণমযায পাতিযা;

‘‘ভুঞ্জস্সু ভত্তং’’ ইতি মং ৰদেতি, সদ্ধাৰিত্তা [সদ্ধাচিত্তা (সী. পী. ক.)], তমহং নোতি ব্রূমি.

৪১. এতাদিসং ব্রাহ্মণ দিস্ৰান [দিস্ৰ (সী. পী.)] যক্খং, পুচ্ছেয্য পোসো সুখমাসিসানো [সুখমাসসানো (স্যা.), সুখমাসিসমানো (ক.)];

উট্ঠেহি নং পঞ্জলিকাভিপুচ্ছ, দেৰী নুসি ত্ৰং উদ মানুসী নু.

৪২. যং ত্ৰং সুখেনাভিসমেক্খসে মং, ভুঞ্জস্সু ভত্তং ইতি মং ৰদেসি;

পুচ্ছামি তং নারি মহানুভাৰে, দেৰী নুসি ত্ৰং উদ মানুসী নু.

৪৩. দেৰী অহং সঙ্খ মহানুভাৰা, ইধাগতা সাগরৰারিমজ্ঝে;

অনুকম্পিকা নো চ পদুট্ঠচিত্তা, তৰেৰ অত্থায ইধাগতাস্মি.

৪৪. ইধন্নপানং সযনাসনঞ্চ, যানানি নানাৰিৰিধানি সঙ্খ;

সব্বস্স ত্যাহং পটিপাদযামি, যং কিঞ্চি তুয্হং মনসাভিপত্থিতং.

৪৫. যং কিঞ্চি যিট্ঠঞ্চ হুতঞ্চ [যিট্ঠংৰ হুতংৰ (সী. পী.)] ময্হং, সব্বস্স নো ইস্সরা ত্ৰং সুগত্তে;

সুসোণি সুব্ভমু [সুব্ভু (সী.), সুব্ভা (স্যা.)] সুৰিলগ্গমজ্ঝে [সুৰিলাকমজ্ঝে (স্যা. পী. সী. অট্ঠ.), সুৰিলাতমজ্ঝে (ক.)], কিস্স মে কম্মস্স অযং ৰিপাকো.

৪৬. ঘম্মে পথে ব্রাহ্মণ একভিক্খুং, উগ্ঘট্টপাদং তসিতং কিলন্তং;

পটিপাদযী সঙ্খ উপাহনানি [উপাহনাহি (সী. পী.)], সা দক্খিণা কামদুহা তৰজ্জ.

৪৭. সা হোতু নাৰা ফলকূপপন্না, অনৰস্সুতা এরকৰাতযুত্তা;

অঞ্ঞস্স যানস্স ন হেত্থ [ন হত্থি (পী.)] ভূমি, অজ্জেৰ মং মোল়িনিং পাপযস্সু.

৪৮. সা তত্থ ৰিত্তা সুমনা পতীতা, নাৰং সুচিত্তং অভিনিম্মিনিত্ৰা;

আদায সঙ্খং পুরিসেন সদ্ধিং, উপানযী নগরং সাধুরম্মন্তি.

সঙ্খজাতকং চতুত্থং.

৪৪৩. চূল়বোধিজাতকং (৫)

৪৯. যো তে ইমং ৰিসালক্খিং, পিযং সম্হিতভাসিনিং [সম্মিল্লভাসিনিং (সী. পী.), সম্মিল্লহাসিনিং (স্যা.)];

আদায বলা গচ্ছেয্য, কিং নু কযিরাসি ব্রাহ্মণ.

৫০. উপ্পজ্জে [উপ্পজ্জ (সী. পী.)] মে ন মুচ্চেয্য, ন মে মুচ্চেয্য জীৰতো;

রজংৰ ৰিপুলা ৰুট্ঠি, খিপ্পমেৰ নিৰারযে [নিৰারযিং (ক.)].

৫১. যং নু পুব্বে ৰিকত্থিত্থো [ৰিকত্থিতো (ক. সী. স্যা. ক.)], বলম্হিৰ অপস্সিতো;

স্ৰজ্জ তুণ্হিকতো [তুণ্হিকতো (সী.), তুণ্হিক্খকো (পী.)] দানি, সঙ্ঘাটিং সিব্বমচ্ছসি.

৫২. উপ্পজ্জি মে ন মুচ্চিত্থ, ন মে মুচ্চিত্থ জীৰতো;

রজংৰ ৰিপুলা ৰুট্ঠি, খিপ্পমেৰ নিৰারযিং.

৫৩. কিং তে উপ্পজ্জি নো মুচ্চি, কিং তে ন মুচ্চি জীৰতো;

রজংৰ ৰিপুলা ৰুট্ঠি, কতমং ত্ৰং নিৰারযি.

৫৪. যম্হি জাতে ন পস্সতি, অজাতে সাধু পস্সতি;

সো মে উপ্পজ্জি নো মুচ্চি, কোধো দুম্মেধগোচরো.

৫৫. যেন জাতেন নন্দন্তি, অমিত্তা দুক্খমেসিনো;

সো মে উপ্পজ্জি নো মুচ্চি, কোধো দুম্মেধগোচরো.

৫৬. যস্মিঞ্চ জাযমানম্হি, সদত্থং নাৰবুজ্ঝতি;

সো মে উপ্পজ্জি নো মুচ্চি, কোধো দুম্মেধগোচরো.

৫৭. যেনাভিভূতো কুসলং জহাতি, পরক্করে ৰিপুলঞ্চাপি অত্থং;

স ভীমসেনো বলৰা পমদ্দী, কোধো মহারাজ ন মে অমুচ্চথ.

৫৮. কট্ঠস্মিং মত্থমানস্মিং [মন্থমানস্মিং (পী.), মদ্দমানস্মিং (ক.)], পাৰকো নাম জাযতি;

তমেৰ কট্ঠং ডহতি, যস্মা সো জাযতে গিনি.

৫৯. এৰং মন্দস্স পোসস্স, বালস্স অৰিজানতো;

সারম্ভা [সারব্ভা (ক.)] জাযতে কোধো, সোপি তেনেৰ ডয্হতি.

৬০. অগ্গীৰ তিণকট্ঠস্মিং, কোধো যস্স পৰড্ঢতি;

নিহীযতি তস্স যসো, কাল়পক্খেৰ চন্দিমা.

৬১. অনেধো [অনিন্ধো (সী. ক.), অনিন্দো (স্যা.)] ধূমকেতূৰ, কোধো যস্সূপসম্মতি;

আপূরতি তস্স যসো, সুক্কপক্খেৰ চন্দিমাতি.

চূল়বোধিজাতকং পঞ্চমং.

৪৪৪. কণ্হদীপাযনজাতকং (৬)

৬২. সত্তাহমেৰাহং পসন্নচিত্তো, পুঞ্ঞত্থিকো আচরিং [অচরিং (সী. স্যা. পী.)] ব্রহ্মচরিযং;

অথাপরং যং চরিতং মমেদং [মম যিদং (স্যা.), মমাযিদং (পী.)], ৰস্সানি পঞ্ঞাস সমাধিকানি;

অকামকো ৰাপি [ৰাহি (পী. ক.)] অহং চরামি, এতেন সচ্চেন সুৰত্থি হোতু;

হতং ৰিসং জীৰতু যঞ্ঞদত্তো.

৬৩. যস্মা দানং নাভিনন্দিং কদাচি, দিস্ৰানহং অতিথিং ৰাসকালে;

ন চাপি মে অপ্পিযতং অৰেদুং, বহুস্সুতা সমণব্রাহ্মণা চ.

অকামকো ৰাপি অহং দদামি, এতেন সচ্চেন সুৰত্থি হোতু;

হতং ৰিসং জীৰতু যঞ্ঞদত্তো.

৬৪. আসীৰিসো তাত পহূততেজো, যো তং অদংসী [অডংসী (স্যা.)] সচরা [বিলরা (সী.), পিল়ারা (স্যা.), পতরা (পী.)] উদিচ্চ;