৪৫২. ভূরিপঞ্ঞজাতকং (১৪)

১৪৫. সচ্চং কির ত্ৰং অপি [ত্ৰম্পি (সী.), তুৰম্পি (স্যা.), ত্ৰং অসি (ক.)] ভূরিপঞ্ঞ, যা তাদিসী সীরি ধিতী মতী চ;

ন তাযতেভাৰৰসূপনিতং, যো যৰকং ভুঞ্জসি অপ্পসূপং.

১৪৬. সুখং দুক্খেন পরিপাচযন্তো, কালা কালং ৰিচিনং ছন্দছন্নো;

অত্থস্স দ্ৰারানি অৰাপুরন্তো, তেনাহং তুস্সামি যৰোদনেন.

১৪৭. কালঞ্চ ঞত্ৰা অভিজীহনায, মন্তেহি অত্থং পরিপাচযিত্ৰা;

ৰিজম্ভিস্সং সীহৰিজম্ভিতানি, তাযিদ্ধিযা দক্খসি মং পুনাপি.

১৪৮. সুখীপি হেকে [সুখী হি একে (সী.), সুখীতি হেকে (?)] ন করোন্তি পাপং, অৰণ্ণসংসগ্গভযা পুনেকে;

পহূ সমানো ৰিপুলত্থচিন্তী, কিংকারণা মে ন করোসি দুক্খং.

১৪৯. ন পণ্ডিতা অত্তসুখস্স হেতু, পাপানি কম্মানি সমাচরন্তি;

দুক্খেন ফুট্ঠা খলিতাপি সন্তা, ছন্দা চ দোসা ন জহন্তি ধম্মং.

১৫০. যেন কেনচি ৰণ্ণেন, মুদুনা দারুণেন ৰা;

উদ্ধরে দীনমত্তানং, পচ্ছা ধম্মং সমাচরে.

১৫১. যস্স রুক্খস্স ছাযায, নিসীদেয্য সযেয্য ৰা;

ন তস্স সাখং ভঞ্জেয্য, মিত্তদুব্ভো হি পাপকো.

১৫২. যস্সাপি [যস্স হি (সী. ক.)] ধম্মং পুরিসো [মনুজো (সী.)] ৰিজঞ্ঞা, যে চস্স কঙ্খং ৰিনযন্তি সন্তো;

তং হিস্স দীপঞ্চ পরাযনঞ্চ, ন তেন মেত্তিং জরযেথ পঞ্ঞো.

১৫৩. অলসো গিহী কামভোগী ন সাধু, অসঞ্ঞতো পব্বজিতো ন সাধু;

রাজা ন সাধু অনিসম্মকারী, যো পণ্ডিতো কোধনো তং ন সাধু.

১৫৪. নিসম্ম খত্তিযো কযিরা, নানিসম্ম দিসম্পতি;

নিসম্মকারিনো রাজ, যসো কিত্তি চ ৰড্ঢতীতি.

ভূরিপঞ্ঞজাতকং চুদ্দসমং.