৪৪৭. মহাধম্মপালজাতকং (৯)

৯২. কিং তে ৰতং কিং পন ব্রহ্মচরিযং, কিস্স সুচিণ্ণস্স অযং ৰিপাকো;

অক্খাহি মে ব্রাহ্মণ এতমত্থং, কস্মা নু তুম্হং দহরা ন মিয্যরে [মীযরে (সী. পী.)].

৯৩. ধম্মং চরাম ন মুসা ভণাম, পাপানি কম্মানি পরিৰজ্জযাম [ৰিৰজ্জযাম (সী. স্যা. পী.)];

অনরিযং পরিৰজ্জেমু সব্বং, তস্মা হি অম্হং দহরা ন মিয্যরে.

৯৪. সুণোম ধম্মং অসতং সতঞ্চ, ন চাপি ধম্মং অসতং রোচযাম;

হিত্ৰা অসন্তে ন জহাম সন্তে, তস্মা হি অম্হং দহরা ন মিয্যরে.

৯৫. পুব্বেৰ দানা সুমনা ভৰাম, দদম্পি ৰে অত্তমনা ভৰাম;

দত্ৰাপি ৰে নানুতপ্পাম পচ্ছা, তস্মা হি অম্হং দহরা ন মিয্যরে.

৯৬. সমণে মযং ব্রাহ্মণে অদ্ধিকে চ, ৰনিব্বকে যাচনকে দলিদ্দে;

অন্নেন পানেন অভিতপ্পযাম, তস্মা হি অম্হং দহরা ন মিয্যরে.

৯৭. মযঞ্চ ভরিযং নাতিক্কমাম, অম্হে চ ভরিযা নাতিক্কমন্তি;

অঞ্ঞত্র তাহি ব্রহ্মচরিযং চরাম, তস্মা হি অম্হং দহরা ন মিয্যরে.

৯৮. পাণাতিপাতা ৰিরমাম সব্বে, লোকে অদিন্নং পরিৰজ্জযাম;

অমজ্জপা নোপি মুসা ভণাম, তস্মা হি অম্হং দহরা ন মিয্যরে.

৯৯. এতাসু ৰে জাযরে সুত্তমাসু, মেধাৰিনো হোন্তি পহূতপঞ্ঞা;

বহুস্সুতা ৰেদগুনো [ৰেদগুণা (স্যা. ক.)] চ হোন্তি, তস্মা হি অম্হং দহরা ন মিয্যরে.

১০০. মাতা পিতা চ [মাতা চ পিতা (ক.), মাতাপিতরা (স্যা.)] ভগিনী ভাতরো চ, পুত্তা চ দারা চ মযঞ্চ সব্বে;

ধম্মং চরাম পরলোকহেতু, তস্মা হি অম্হং দহরা ন মিয্যরে.

১০১. দাসা চ দাস্যো [দাস্সো (সী. পী.), দাসী (স্যা.)] অনুজীৰিনো চ, পরিচারকা কম্মকরা চ সব্বে;

ধম্মং চরন্তি পরলোকহেতু, তস্মা হি অম্হং দহরা ন মিয্যরে.

১০২. ধম্মো হৰে রক্খতি ধম্মচারিং, ধম্মো সুচিণ্ণো সুখমাৰহাতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী.

১০৩. ধম্মো হৰে রক্খতি ধম্মচারিং, ছত্তং মহন্তং ৰিয ৰস্সকালে;

ধম্মেন গুত্তো মম ধম্মপালো, অঞ্ঞস্স অট্ঠীনি সুখী কুমারোতি.

মহাধম্মপালজাতকং নৰমং.