৪৪৮. কুক্কুটজাতকং (১০)

১০৪. নাস্মসে কতপাপম্হি, নাস্মসে অলিকৰাদিনে;

নাস্মসে অত্তত্থপঞ্ঞম্হি, অতিসন্তেপি নাস্মসে.

১০৫. ভৰন্তি হেকে পুরিসা, গোপিপাসিকজাতিকা [গোপিপাসকজাতিকা (সী. স্যা. পী.)];

ঘসন্তি মঞ্ঞে মিত্তানি, ৰাচায ন চ কম্মুনা.

১০৬. সুক্খঞ্জলিপগ্গহিতা, ৰাচায পলিগুণ্ঠিতা;

মনুস্সফেগ্গূ নাসীদে, যস্মিং নত্থি কতঞ্ঞুতা.

১০৭. ন হি অঞ্ঞঞ্ঞচিত্তানং, ইত্থীনং পুরিসান ৰা;

নানাৰিকত্ৰা [নানাৰ কত্ৰা (সী. পী.)] সংসগ্গং, তাদিসম্পি চ নাস্মসে [তাদিসম্পি ন ৰিস্সসে (স্যা.)].

১০৮. অনরিযকম্মমোক্কন্তং, অথেতং [অত্থেতং (সী. স্যা. পী.)] সব্বঘাতিনং;

নিসিতংৰ পটিচ্ছন্নং, তাদিসম্পি চ নাস্মসে.

১০৯. মিত্তরূপেনিধেকচ্চে, সাখল্যেন অচেতসা;

ৰিৰিধেহি উপাযন্তি, তাদিসম্পি চ নাস্মসে.

১১০. আমিসং ৰা ধনং ৰাপি, যত্থ পস্সতি তাদিসো;

দুব্ভিং করোতি দুম্মেধো, তঞ্চ হন্ত্ৰান [ঝাত্ৰান (সী. পী.), হিত্ৰান (স্যা.)] গচ্ছতি.

১১১. মিত্তরূপেন বহৰো, ছন্না সেৰন্তি সত্তৰো;

জহে কাপুরিসে হেতে, কুক্কুটো ৰিয সেনকং.

১১২. যো চ [যোধ (জা. ১.৮.২৫ সুলসাজাতকে)] উপ্পতিতং অত্থং, ন খিপ্পমনুবুজ্ঝতি;

অমিত্তৰসমন্ৰেতি, পচ্ছা চ অনুতপ্পতি.

১১৩. যো চ উপ্পতিতং অত্থং, খিপ্পমেৰ নিবোধতি;

মুচ্চতে সত্তুসম্বাধা, কুক্কুটো ৰিয সেনকা;

১১৪. তং তাদিসং কূটমিৰোড্ডিতং ৰনে, অধম্মিকং নিচ্চৰিধংসকারিনং;

আরা ৰিৰজ্জেয্য নরো ৰিচক্খণো, সেনং যথা কুক্কুটো ৰংসকাননেতি.

কুক্কুটজাতকং দসমং.