৪৪৬. তক্কলজাতকং (৮)

৮২. ন তক্কলা সন্তি ন আলুৰানি [আলুপানি (সী. স্যা. পী.)], ন বিল়ালিযো ন কল়ম্বানি তাত;

একো অরঞ্ঞম্হি সুসানমজ্ঝে, কিমত্থিকো তাত খণাসি কাসুং.

৮৩. পিতামহো তাত সুদুব্বলো তে, অনেকব্যাধীহি দুখেন ফুট্ঠো;

তমজ্জহং নিখণিস্সামি সোব্ভে, ন হিস্স তং জীৰিতং রোচযামি.

৮৪. সঙ্কপ্পমেতং পটিলদ্ধ পাপকং, অচ্চাহিতং কম্ম করোসি লুদ্দং;

মযাপি তাত পটিলচ্ছসে তুৰং, এতাদিসং কম্ম জরূপনীতো;

তং কুল্লৰত্তং অনুৰত্তমানো, অহম্পি তং নিখণিস্সামি সোব্ভে.

৮৫. ফরুসাহি ৰাচাহি পকুব্বমানো, আসজ্জ মং ত্ৰং ৰদসে কুমার;

পুত্তো মমং ওরসকো সমানো, অহিতানুকম্পী মম ত্ৰংসি পুত্ত.

৮৬. ন তাহং [ত্যাহং (স্যা.)] তাত অহিতানুকম্পী, হিতানুকম্পী তে অহম্পি [অহঞ্হি (স্যা.)] তাত;

পাপঞ্চ তং কম্ম পকুব্বমানং, অরহামি নো ৰারযিতুং ততো.

৮৭. যো মাতরং ৰা পিতরং সৰিট্ঠ [মাতরং পিতরং ৰা ৰসিট্ঠ (সী. পী.)], অদূসকে হিংসতি পাপধম্মো;

কাযস্স ভেদা অভিসম্পরাযং, অসংসযং সো নিরযং উপেতি [পরেতি (সী. পী.)].

৮৮. যো মাতরং ৰা পিতরং সৰিট্ঠ, অন্নেন পানেন উপট্ঠহাতি;

কাযস্স ভেদা অভিসম্পরাযং, অসংসযং সো সুগতিং উপেতি.

৮৯. ন মে ত্ৰং পুত্ত অহিতানুকম্পী, হিতানুকম্পী মে [মম (?)] ত্ৰংসি পুত্ত;

অহঞ্চ তং মাতরা ৰুচ্চমানো, এতাদিসং কম্ম করোমি লুদ্দং.

৯০. যা তে সা ভরিযা অনরিযরূপা, মাতা মমেসা সকিযা জনেত্তি;

নিদ্ধাপযে [নিদ্ধামসে (পী.)] তঞ্চ সকা অগারা, অঞ্ঞম্পি তে সা দুখমাৰহেয্য.

৯১. যা তে সা ভরিযা অনরিযরূপা, মাতা মমেসা সকিযা জনেত্তি;

দন্তা করেণূৰ ৰসূপনীতা, সা পাপধম্মা পুনরাৰজাতূতি.

তক্কলজাতকং অট্ঠমং.