৯. সুমনত্থেরঅপদানং

৬২. ‘‘সুমনো নাম নামেন, মালাকারো অহং তদা;

অদ্দসং ৰিরজং বুদ্ধং, লোকাহুতিপটিগ্গহং.

৬৩. ‘‘উভো হত্থেহি পগ্গয্হ, সুমনং পুপ্ফমুত্তমং;

বুদ্ধস্স অভিরোপেসিং, সিখিনো লোকবন্ধুনো.

৬৪. ‘‘ইমায পুপ্ফপূজায, চেতনাপণিধীহি চ;

দুগ্গতিং নাভিজানামি, বুদ্ধপূজাযিদং ফলং.

৬৫. ‘‘একত্তিংসে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং [পুপ্ফপূজাযিদং (সী.)] ফলং.

৬৬. ‘‘ছব্বীসতিম্হি কপ্পম্হি, চত্তারোসুং মহাযসা;

সত্তরতনসম্পন্না, রাজানো চক্কৰত্তিনো.

৬৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুমনো থেরো ইমা গাথাযো অভাসিত্থাতি.

সুমনত্থেরস্সাপদানং নৰমং.