১০. পুপ্ফচঙ্কোটিযত্থেরঅপদানং

৬৮. ‘‘অভীতরূপং সীহংৰ, গরুল়গ্গংৰ পক্খিনং;

ব্যগ্ঘূসভংৰ পৰরং, অভিজাতংৰ কেসরিং.

৬৯. ‘‘সিখিং তিলোকসরণং, অনেজং অপরাজিতং;

নিসিন্নং সমণানগ্গং, ভিক্খুসঙ্ঘপুরক্খতং.

৭০. ‘‘চঙ্কোটকে [চঙ্গোটকে (সী.)] ঠপেত্ৰান, অনোজং পুপ্ফমুত্তমং;

সহ চঙ্কোটকেনেৰ, বুদ্ধসেট্ঠং সমোকিরিং.

৭১. ‘‘তেন চিত্তপ্পসাদেন, দ্ৰিপদিন্দ নরাসভ;

পত্তোম্হি অচলং ঠানং, হিত্ৰা জযপরাজযং.

৭২. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

৭৩. ‘‘সম্পুণ্ণে তিংসকপ্পম্হি, দেৰভূতিসনামকা;

সত্তরতনসম্পন্না, পঞ্চাসুং চক্কৰত্তিনো.

৭৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুপ্ফচঙ্কোটিযো থেরো ইমা গাথাযো অভাসিত্থাতি.

পুপ্ফচঙ্কোটিযত্থেরস্সাপদানং দসমং.

সকচিন্তনিযৰগ্গো সত্তমো.