৭. সকচিন্তনিযৰগ্গো

১. সকচিন্তনিযত্থেরঅপদানং

১. ‘‘পৰনং কাননং দিস্ৰা, অপ্পসদ্দমন্নাৰিলং;

ইসীনং অনুচিণ্ণংৰ, আহুতীনং পটিগ্গহং.

২. ‘‘থূপং কত্ৰান পুলিনং [ৰেল়ুনা (অট্ঠ.), ৰেল়িনং (স্যা.)], নানাপুপ্ফং সমোকিরিং;

সম্মুখা ৰিয সম্বুদ্ধং, নিম্মিতং অভিৰন্দহং.

৩. ‘‘সত্তরতনসম্পন্নো, রাজা রট্ঠম্হি ইস্সরো;

সককম্মাভিরদ্ধোহং, পুপ্ফপূজাযিদং [থূপপূজাযিদং (সী.)] ফলং.

৪. ‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, পুপ্ফপূজাযিদং [থূপপূজাযিদং (সী.)] ফলং.

৫. ‘‘অসীতিকপ্পেনন্তযসো, চক্কৰত্তী অহোসহং;

সত্তরতনসম্পন্নো, চতুদীপম্হি ইস্সরো.

৬. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সকচিন্তনিযো থেরো ইমা গাথাযো অভাসিত্থাতি.

সকচিন্তনিযত্থেরস্সাপদানং পঠমং.

২. অৰোপুপ্ফিযত্থেরঅপদানং

৭. ‘‘ৰিহারা অভিনিক্খম্ম, অব্ভুট্ঠহিয [অব্ভুট্ঠাসি চ (স্যা. ক.)] চঙ্কমে;

চতুসচ্চং পকাসন্তো, দেসেতি [দেসেন্তো (স্যা. ক.)] অমতং পদং.

৮. ‘‘সিখিস্স গিরমঞ্ঞায, বুদ্ধসেট্ঠস্স তাদিনো;

নানাপুপ্ফং গহেত্ৰান, আকাসম্হি সমোকিরিং.

৯. ‘‘তেন কম্মেন দ্ৰিপদিন্দ, লোকজেট্ঠ নরাসভ;

পত্তোম্হি অচলং ঠানং, হিত্ৰা জযপরাজযং.

১০. ‘‘একত্তিংসে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, পুপ্ফপূজাযিদং ফলং.

১১. ‘‘ইতো ৰীসতিকপ্পম্হি, সুমেধো নাম খত্তিযো;

সত্তরতনসম্পন্নো, চক্কৰত্তী মহব্বলো.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অৰোপুপ্ফিযো থেরো ইমা গাথাযো অভাসিত্থাতি.

অৰোপুপ্ফিযত্থেরস্সাপদানং দুতিযং.

৩. পচ্চাগমনিযত্থেরঅপদানং

১৩. ‘‘সিন্ধুযা নদিযা তীরে, চক্কৰাকো অহং তদা;

সুদ্ধসেৰালভক্খোহং, পাপেসু চ সুসঞ্ঞতো.

১৪. ‘‘অদ্দসং ৰিরজং বুদ্ধং, গচ্ছন্তং অনিলঞ্জসে;

তুণ্ডেন সালং পগ্গয্হ, ৰিপস্সিস্সাভিরোপযিং.

১৫. ‘‘যস্স সদ্ধা তথাগতে, অচলা সুপতিট্ঠিতা;

তেন চিত্তপ্পসাদেন, দুগ্গতিং সো ন গচ্ছতি.

১৬. ‘‘স্ৰাগতং ৰত মে আসি, বুদ্ধসেট্ঠস্স সন্তিকে;

ৰিহঙ্গমেন সন্তেন, সুবীজং রোপিতং মযা.

১৭. ‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং [পুপ্ফপূজাযিদং (সী.)] ফলং.

১৮. ‘‘সুচারুদস্সনা নাম, অট্ঠেতে একনামকা;

কপ্পে সত্তরসে আসুং, চক্কৰত্তী মহব্বলা.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পচ্চাগমনিযো থেরো ইমা গাথাযো অভাসিত্থাতি.

পচ্চাগমনিযত্থেরস্সাপদানং ততিযং.

৪. পরপ্পসাদকত্থেরঅপদানং

২০. ‘‘উসভং পৰরং ৰীরং, মহেসিং ৰিজিতাৰিনং;

সুৰণ্ণৰণ্ণং সম্বুদ্ধং, কো দিস্ৰা নপ্পসীদতি.

২১. ‘‘হিমৰাৰাপরিমেয্যো, সাগরোৰ দুরুত্তরো;

তথেৰ ঝানং বুদ্ধস্স, কো দিস্ৰা নপ্পসীদতি.

২২. ‘‘ৰসুধা যথাপ্পমেয্যা, চিত্তা ৰনৰটংসকা;

তথেৰ সীলং বুদ্ধস্স, কো দিস্ৰা নপ্পসীদতি.

২৩. ‘‘অনিলঞ্জসাসঙ্খুব্ভো [অনিলজোৰ অসঙ্খোভো (সী.)], যথাকাসো অসঙ্খিযো;

তথেৰ ঞাণং বুদ্ধস্স, কো দিস্ৰা নপ্পসীদতি.

২৪. ‘‘ইমাহি চতুগাথাহি, ব্রাহ্মণো সেনসৰ্হযো;

বুদ্ধসেট্ঠং থৰিত্ৰান, সিদ্ধত্থং অপরাজিতং.

২৫. ‘‘চতুন্নৰুতিকপ্পানি, দুগ্গতিং নুপপজ্জথ;

সুগতিং সুখসম্পত্তিং [সুগতীসু সুসুম্পত্তিং (সী. স্যা.)], অনুভোসিমনপ্পকং.

২৬. ‘‘চতুন্নৰুতিতো কপ্পে, থৰিত্ৰা লোকনাযকং;

দুগ্গতিং নাভিজানামি, থোমনায [থোমনস্স (স্যা.)] ইদং ফলং.

২৭. ‘‘চাতুদ্দসম্হি কপ্পম্হি, চতুরো আসুমুগ্গতা;

সত্তরতনসম্পন্না, চক্কৰত্তী মহব্বলা.

২৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পরপ্পসাদকো থেরো ইমা গাথাযো অভাসিত্থাতি.

পরপ্পসাদকত্থেরস্সাপদানং চতুত্থং.

৫. ভিসদাযকত্থেরঅপদানং

২৯. ‘‘ৰেস্সভূ নাম নামেন, ইসীনং ততিযো অহু;

কাননং ৰনমোগয্হ, ৰিহাসি পুরিসুত্তমো.

৩০. ‘‘ভিসমুল়ালং গণ্হিত্ৰা, অগমং বুদ্ধসন্তিকং;

তঞ্চ বুদ্ধস্স পাদাসিং, পসন্নো সেহি পাণিভি.

৩১. ‘‘করেন চ পরামট্ঠো, ৰেস্সভূৰরবুদ্ধিনা;

সুখাহং নাভিজানামি, সমং তেন কুতোত্তরিং.

৩২. ‘‘চরিমো ৰত্ততে ময্হং, ভৰা সব্বে সমূহতা;

হত্থিনাগেন সন্তেন, কুসলং রোপিতং মযা [নাগোৰ বন্ধনং ছেত্ৰা, ৰিহরামি অনাসৰো (স্যা.)].

৩৩. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, ভিসদানস্সিদং ফলং.

৩৪. ‘‘সমোধানা চ রাজানো, সোল়স মনুজাধিপা;

কপ্পম্হি চুদ্দসে [তেরসে (সী. স্যা.)] আসুং, চক্কৰত্তী মহব্বলা.

৩৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভিসদাযকো থেরো ইমা গাথাযো অভাসিত্থাতি.

ভিসদাযকত্থেরস্সাপদানং পঞ্চমং.

৬. সুচিন্তিতত্থেরঅপদানং

৩৬. ‘‘গিরিদুগ্গচরো আসিং, অভিজাতোৰ কেসরী;

মিগসঙ্ঘং ৰধিত্ৰান, জীৰামি পব্বতন্তরে.

৩৭. ‘‘অত্থদস্সী তু ভগৰা, সব্বঞ্ঞূ ৰদতং ৰরো;

মমুদ্ধরিতুকামো সো, আগচ্ছি পব্বতুত্তমং.

৩৮. ‘‘পসদঞ্চ মিগং হন্ত্ৰা, ভক্খিতুং সমুপাগমিং;

ভগৰা তম্হি সমযে, ভিক্খমানো [সিক্খাচারো (স্যা.)] উপাগমি.

৩৯. ‘‘ৰরমংসানি পগ্গয্হ, অদাসিং তস্স সত্থুনো;

অনুমোদি মহাৰীরো, নিব্বাপেন্তো মমং তদা.

৪০. ‘‘তেন চিত্তপ্পসাদেন, গিরিদুগ্গং পৰিসিং অহং;

পীতিং উপ্পাদযিত্ৰান, তত্থ কালঙ্কতো অহং.

৪১. ‘‘এতেন মংসদানেন, চিত্তস্স পণিধীহি চ;

পন্নরসে কপ্পসতে, দেৰলোকে রমিং অহং.

৪২. ‘‘অৰসেসেসু কপ্পেসু, কুসলং চিন্তিতং [নিচিতং (সী.), করিতং (স্যা.)] মযা;

তেনেৰ মংসদানেন, বুদ্ধানুস্সরণেন চ.

৪৩. ‘‘অট্ঠত্তিংসম্হি কপ্পম্হি, অট্ঠ দীঘাযুনামকা;

সট্ঠিম্হিতো কপ্পসতে, দুৰে ৰরুণনামকা [সরণনামকা (স্যা.)].

৪৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুচিন্তিতো থেরো ইমা গাথাযো অভাসিত্থাতি.

সুচিন্তিতত্থেরস্সাপদানং ছট্ঠং.

৭. ৰত্থদাযকত্থেরঅপদানং

৪৫. ‘‘পক্খিজাতো তদা আসিং, সুপণ্ণো গরুল়াধিপো;

অদ্দসং ৰিরজং বুদ্ধং, গচ্ছন্তং গন্ধমাদনং.

৪৬. ‘‘জহিত্ৰা গরুল়ৰণ্ণং, মাণৰকং অধারযিং;

একং ৰত্থং মযা দিন্নং, দ্ৰিপদিন্দস্স তাদিনো.

৪৭. ‘‘তঞ্চ দুস্সং পটিগ্গয্হ, বুদ্ধো লোকগ্গনাযকো;

অন্তলিক্খে ঠিতো সত্থা, ইমা গাথা অভাসথ.

৪৮. ‘‘‘ইমিনা ৰত্থদানেন, চিত্তস্স পণিধীহি চ;

পহায গরুল়ং যোনিং, দেৰলোকে রমিস্সতি’.

৪৯. ‘‘অত্থদস্সী তু ভগৰা, লোকজেট্ঠো নরাসভো;

ৰত্থদানং পসংসিত্ৰা, পক্কামি উত্তরামুখো.

৫০. ‘‘ভৰে নিব্বত্তমানম্হি, হোন্তি মে ৰত্থসম্পদা;

আকাসে ছদনং হোতি, ৰত্থদানস্সিদং ফলং.

৫১. ‘‘অরুণৰা [অরুণকা (সী.), অরুণসা (স্যা.)] সত্ত জনা, চক্কৰত্তী মহব্বলা;

ছত্তিংসতিম্হি আসিংসু, কপ্পম্হি মনুজাধিপা.

৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰত্থদাযকো থেরো ইমা গাথাযো অভাসিত্থাতি.

ৰত্থদাযকত্থেরস্সাপদানং সত্তমং.

৮. অম্বদাযকত্থেরঅপদানং

৫৩. ‘‘অনোমদস্সী ভগৰা, নিসিন্নো পব্বতন্তরে;

মেত্তায অফরি লোকে, অপ্পমাণে নিরূপধি.

৫৪. ‘‘কপি অহং তদা আসিং, হিমৰন্তে নগুত্তমে;

দিস্ৰা অনোমদস্সিং তং [অনোমং অমিতং (সী.), অনোমমধিতং (স্যা.)], বুদ্ধে চিত্তং পসাদযিং.

৫৫. ‘‘অৰিদূরে হিমৰন্তস্স, অম্বাসুং ফলিনো তদা;

ততো পক্কং গহেত্ৰান, অম্বং সমধুকং অদং.

৫৬. ‘‘তং মে বুদ্ধো ৰিযাকাসি, অনোমদস্সী মহামুনি;

ইমিনা মধুদানেন, অম্বদানেন চূভযং.

৫৭. ‘‘সত্তপঞ্ঞাসকপ্পম্হি, দেৰলোকে রমিস্সতি;

অৰসেসেসু কপ্পেসু, ৰোকিণ্ণং সংসরিস্সতি.

৫৮. ‘‘খেপেত্ৰা পাপকং কম্মং, পরিপক্কায বুদ্ধিযা;

ৰিনিপাতমগন্ত্ৰান, কিলেসে ঝাপযিস্সতি.

৫৯. ‘‘দমেন উত্তমেনাহং, দমিতোম্হি মহেসিনা;

পত্তোম্হি অচলং ঠানং, হিত্ৰা জযপরাজযং.

৬০. ‘‘সত্তসত্ততিকপ্পসতে, অম্বট্ঠজসনামকা;

চতুদ্দস তে রাজানো, চক্কৰত্তী মহব্বলা.

৬১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অম্বদাযকো থেরো ইমা গাথাযো অভাসিত্থাতি.

অম্বদাযকত্থেরস্সাপদানং অট্ঠমং.

৯. সুমনত্থেরঅপদানং

৬২. ‘‘সুমনো নাম নামেন, মালাকারো অহং তদা;

অদ্দসং ৰিরজং বুদ্ধং, লোকাহুতিপটিগ্গহং.

৬৩. ‘‘উভো হত্থেহি পগ্গয্হ, সুমনং পুপ্ফমুত্তমং;

বুদ্ধস্স অভিরোপেসিং, সিখিনো লোকবন্ধুনো.

৬৪. ‘‘ইমায পুপ্ফপূজায, চেতনাপণিধীহি চ;

দুগ্গতিং নাভিজানামি, বুদ্ধপূজাযিদং ফলং.

৬৫. ‘‘একত্তিংসে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং [পুপ্ফপূজাযিদং (সী.)] ফলং.

৬৬. ‘‘ছব্বীসতিম্হি কপ্পম্হি, চত্তারোসুং মহাযসা;