নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

থেরাপদানপাল়ি

(পঠমো ভাগো)

১. বুদ্ধৰগ্গো

১. বুদ্ধঅপদানং

১. তথাগতং জেতৰনে ৰসন্তং, অপুচ্ছি ৰেদেহমুনী নতঙ্গো;

‘‘সব্বঞ্ঞুবুদ্ধা কির নাম হোন্তি, ভৰন্তি তে হেতুভি কেহি ৰীর’’.

২. তদাহ সব্বঞ্ঞুৰরো মহেসী, আনন্দভদ্দং মধুরস্সরেন;

‘‘যে পুব্ববুদ্ধেসু [সব্ববুদ্ধেসু (স্যা.)] কতাধিকারা, অলদ্ধমোক্খা জিনসাসনেসু.

৩. ‘‘তেনেৰ সম্বোধিমুখেন ধীরা, অজ্ঝাসযেনাপি মহাবলেন;

পঞ্ঞায তেজেন সুতিক্খপঞ্ঞা, সব্বঞ্ঞুভাৰং অনুপাপুণন্তি.

৪. ‘‘অহম্পি পুব্ববুদ্ধেসু, বুদ্ধত্তমভিপত্থযিং,

মনসাযেৰ হুত্ৰান, ধম্মরাজা অসঙ্খিযা.

৫. ‘‘অথ বুদ্ধাপদানানি, সুণাথ সুদ্ধমানসা;

তিংসপারমিসম্পুণ্ণা, ধম্মরাজা অসঙ্খিযা.

৬. ‘‘সম্বোধিং বুদ্ধসেট্ঠানং, সসঙ্ঘে লোকনাযকে;

দসঙ্গুলী নমস্সিত্ৰা, সিরসা অভিৰাদযিং [অভিৰাদযে (স্যা.)].

৭. ‘‘যাৰতা বুদ্ধখেত্তেসু, রতনা ৰিজ্জন্তিসঙ্খিযা;

আকাসট্ঠা চ ভূমট্ঠা [ভুম্মট্ঠা (সী. স্যা.)], মনসা সব্বমাহরিং.

৮. ‘‘তত্থ রূপিযভূমিযং, পাসাদং মাপযিং অহং;

নেকভুম্মং রতনমযং, উব্বিদ্ধং নভমুগ্গতং.

৯. ‘‘ৰিচিত্তথম্ভং সুকতং, সুৰিভত্তং মহারহং;

কনকমযসঙ্ঘাটং, কোন্তচ্ছত্তেহি মণ্ডিতং.

১০. ‘‘পঠমা ৰেল়ুরিযা ভূমি, ৰিমলব্ভসমা সুভা;

নল়িনজলজাকিণ্ণা, ৰরকঞ্চনভূমিযা.

১১. ‘‘পৰাল়ংসা পৰাল়ৰণ্ণা, কাচি লোহিতকা সুভা;

ইন্দগোপকৰণ্ণাভা, ভূমি ওভাসতী দিসা.

১২. ‘‘সুৰিভত্তা ঘরমুখা, নিয্যূহা সীহপঞ্জরা;

চতুরো ৰেদিকা জালা, গন্ধাৰেল়া মনোরমা.

১৩. ‘‘নীলা পীতা লোহিতকা, ওদাতা সুদ্ধকাল়কা;

কূটাগারৰরূপেতা, সত্তরতনভূসিতা.

১৪. ‘‘ওলোকমযা পদুমা, ৰাল়ৰিহঙ্গসোভিতা;

নক্খত্ততারকাকিণ্ণা, চন্দসূরেহি [চন্দসুরিযেহি (সী. স্যা.)] মণ্ডিতা.

১৫. ‘‘হেমজালেন সঞ্ছন্না, সোণ্ণকিঙ্কিণিকাযুতা;

ৰাতৰেগেন কূজন্তি, সোণ্ণমালা মনোরমা.

১৬. ‘‘মঞ্জেট্ঠকং লোহিতকং, পীতকং হরিপিঞ্জরং;

নানারঙ্গেহি সম্পীতং [সংচিত্তং (স্যা.)], উস্সিতদ্ধজমালিনী [মালিনিং (সী.)].

১৭. ‘‘ন নং [নানা (সী. স্যা.)] বহূনেকসতা, ফলিকা রজতামযা;

মণিমযা লোহিতঙ্গা, মসারগল্লমযা তথা;

নানাসযনৰিচিত্তা, সণ্হকাসিকসন্থতা.

১৮. ‘‘কম্পলা দুকূলা চীনা, পট্টুণ্ণা পণ্ডুপাৰুরা;

ৰিৰিধত্থরণং সব্বং, মনসা পঞ্ঞপেসহং.

১৯. ‘‘তাসু তাস্ৰেৰ ভূমীসু, রতনকূটলঙ্কতং;

মণিৰেরোচনা উক্কা, ধারযন্তা সুতিট্ঠরে.

২০. ‘‘সোভন্তি এসিকা থম্ভা, সুভা কঞ্চনতোরণা;

জম্বোনদা সারমযা, অথো রজতমযাপি চ.

২১. ‘‘নেকা সন্ধী সুৰিভত্তা, কৰাটগ্গল়চিত্তিতা;

উভতো পুণ্ণঘটানেকা, পদুমুপ্পলসংযুতা.

২২. ‘‘অতীতে সব্ববুদ্ধে চ, সসঙ্ঘে লোকনাযকে;

পকতিৰণ্ণরূপেন, নিম্মিনিত্ৰা সসাৰকে.

২৩. ‘‘তেন দ্ৰারেন পৰিসিত্ৰা, সব্বে বুদ্ধা সসাৰকা;

সব্বসোণ্ণমযে পীঠে, নিসিন্না অরিযমণ্ডলা.

২৪. ‘‘যে চ এতরহি অত্থি, বুদ্ধা লোকে অনুত্তরা;

অতীতে ৰত্তমানা চ, ভৰনং সব্বে সমাহরিং.

২৫. ‘‘পচ্চেকবুদ্ধেনেকসতে, সযম্ভূ অপরাজিতে;

অতীতে ৰত্তমানে চ, ভৰনং সব্বে সমাহরিং.

২৬. ‘‘কপ্পরুক্খা বহূ অত্থি, যে দিব্বা যে চ মানুসা;

সব্বং দুস্সং সমাহন্তা, অচ্ছাদেমি তিচীৰরং.

২৭. ‘‘খজ্জং ভোজ্জং সাযনীযং, সম্পন্নং পানভোজনং;

মণিমযে সুভে পত্তে, সংপূরেত্ৰা অদাসহং.

২৮. ‘‘দিব্বৰত্থসমা হুত্ৰা, মট্ঠা [মট্টা (সী.)] চীৰরসংযুতা;

মধুরা সক্খরা চেৰ, তেলা চ মধুফাণিতা.

২৯. ‘‘তপ্পিতা পরমন্নেন, সব্বে তে অরিযমণ্ডলা;

রতনগব্ভং পৰিসিত্ৰা, কেসরীৰ গুহাসযা.

৩০. ‘‘মহারহম্হি সযনে, সীহসেয্যমকপ্পযুং;

সম্পজানা সমুট্ঠায, সযনে [সেয্যে (স্যা.)] পল্লঙ্কমাভুজুং.

৩১. ‘‘গোচরং সব্ববুদ্ধানং, ঝানরতিসমপ্পিতা;

অঞ্ঞে ধম্মানি দেসেন্তি, অঞ্ঞে কীল়ন্তি ইদ্ধিযা.

৩২. ‘‘অঞ্ঞে অভিঞ্ঞা অপ্পেন্তি, অভিঞ্ঞা ৰসিভাৰিতা;

ৰিকুব্বনা ৰিকুব্বন্তি, অঞ্ঞেনেকসহস্সিযো.

৩৩. ‘‘বুদ্ধাপি বুদ্ধে পুচ্ছন্তি, ৰিসযং সব্বঞ্ঞুমালযং;

গম্ভীরং নিপুণং ঠানং, পঞ্ঞায ৰিনিবুজ্ঝরে.

৩৪. ‘‘সাৰকা বুদ্ধে পুচ্ছন্তি, বুদ্ধা পুচ্ছন্তি সাৰকে;

অঞ্ঞমঞ্ঞঞ্চ পুচ্ছিত্ৰা [পুচ্ছন্তি (সী. স্যা.)], অঞ্ঞোঞ্ঞং ব্যাকরোন্তি তে.

৩৫. ‘‘বুদ্ধা পচ্চেকবুদ্ধা চ, সাৰকা পরিচারকা;

এৰং সকায রতিযা, পাসাদেভিরমন্তি তে.

৩৬. ‘‘ছত্তা তিট্ঠন্তু রতনা, কঞ্চনাৰেল়পন্তিকা;

মুত্তাজালপরিক্খিত্তা, সব্বে ধারেন্তু [ধারেন্তি (ক.)] মত্থকে.

৩৭. ‘‘ভৰন্তু চেল়ৰিতানা, সোণ্ণতারকচিত্তিতা;

ৰিচিত্তমল্যৰিততা, সব্বে ধারেন্তু মত্থকে.

৩৮. ‘‘ৰিততা মল্যদামেহি, গন্ধদামেহি সোভিতা;

দুস্সদামপরিকিণ্ণা, রতনদামভূসিতা.

৩৯. ‘‘পুপ্ফাভিকিণ্ণা সুচিত্তা, সুরভিগন্ধভূসিতা;

গন্ধপঞ্চঙ্গুলিকতা [গন্ধপঞ্চঙ্গুলং কতা (অট্ঠ.)], হেমচ্ছদনছাদিতা.

৪০. ‘‘চতুদ্দিসা পোক্খরঞ্ঞো, পদুমুপ্পলসন্থতা;

সোৰণ্ণরূপা খাযন্তু, পদ্মংরেণুরজুগ্গতা.

৪১. ‘‘পুপ্ফন্তু পাদপা সব্বে, পাসাদস্স সমন্ততো;

সযঞ্চ পুপ্ফা মুঞ্চিত্ৰা, গন্ত্ৰা ভৰনমোকিরুং.

৪২. ‘‘সিখিনো তত্থ নচ্চন্তু, দিব্বহংসা পকূজরে;

করৰীকা চ গাযন্তু, দিজসঙ্ঘা সমন্ততো.

৪৩. ‘‘ভেরিযো সব্বা ৰজ্জন্তু, ৰীণা সব্বা রসন্তু [রৰন্তু (সী. স্যা.)] তা;

সব্বা সঙ্গীতি ৰত্তন্তু, পাসাদস্স সমন্ততো.

৪৪. ‘‘যাৰতা বুদ্ধখেত্তম্হি, চক্কৰাল়ে ততো পরে;

মহন্তা জোতিসম্পন্না, অচ্ছিন্না রতনামযা.

৪৫. ‘‘তিট্ঠন্তু সোণ্ণপল্লঙ্কা, দীপরুক্খা জলন্তু তে;

ভৰন্তু একপজ্জোতা, দসসহস্সিপরম্পরা.

৪৬. ‘‘গণিকা লাসিকা চেৰ, নচ্চন্তু অচ্ছরাগণা;

নানারঙ্গা পদিস্সন্তু, পাসাদস্স সমন্ততো.

৪৭. ‘‘দুমগ্গে পব্বতগ্গে ৰা, সিনেরুগিরিমুদ্ধনি;

উস্সাপেমি ধজং সব্বং, ৰিচিত্তং পঞ্চৰণ্ণিকং.

৪৮. ‘‘নরা নাগা চ গন্ধব্বা, সব্বে দেৰা উপেন্তু তে;

নমস্সন্তা পঞ্জলিকা, পাসাদং পরিৰারযুং.

৪৯. ‘‘যং কিঞ্চি কুসলং কম্মং, কত্তব্বং কিরিযং মম;

কাযেন ৰাচা মনসা, তিদসে সুকতং কতং.

৫০. ‘‘যে সত্তা সঞ্ঞিনো অত্থি, যে চ সত্তা অসঞ্ঞিনো;

কতং পুঞ্ঞফলং ময্হং, সব্বে ভাগী ভৰন্তু তে.

৫১. ‘‘যেসং কতং সুৰিদিতং, দিন্নং পুঞ্ঞফলং মযা;

যে চ তত্থ [তস্মিং (সী. ক.)] ন জানন্তি, দেৰা গন্ত্ৰা নিৰেদযুং.

৫২. ‘‘সব্বলোকম্হি [সব্বে লোকম্হি (স্যা. ক.)] যে সত্তা, জীৰন্তাহারহেতুকা;

মনুঞ্ঞং ভোজনং সব্বং [সব্বে (স্যা.)], লভন্তু মম চেতসা.

৫৩. ‘‘মনসা দানং মযা দিন্নং, মনসা পসাদমাৰহিং;

পূজিতা সব্বসম্বুদ্ধা, পচ্চেকা জিনসাৰকা.

৫৪. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৫৫. ‘‘দুৰে ভৰে পজানামি, দেৰত্তে অথ মানুসে;

অঞ্ঞং গতিং ন জানামি, মনসা পত্থনাফলং.

৫৬. ‘‘দেৰানং অধিকো হোমি, ভৰামি মনুজাধিপো;

রূপলক্খণসম্পন্নো, পঞ্ঞায অসমো ভৰে.

৫৭. ‘‘ভোজনং ৰিৰিধং সেট্ঠং, রতনঞ্চ অনপ্পকং;

ৰিৰিধানি চ ৰত্থানি, নভা [নভসা (স্যা.)] খিপ্পং উপেন্তি মং.

৫৮. ‘‘পথব্যা পব্বতে চেৰ, আকাসে উদকে ৰনে;

যং যং হত্থং পসারেমি, দিব্বা ভক্খা উপেন্তি মং.

৫৯. ‘‘পথব্যা পব্বতে চেৰ, আকাসে উদকে ৰনে;

যং যং হত্থং পসারেমি, রতনা সব্বে উপেন্তি মং.

৬০. ‘‘পথব্যা পব্বতে চেৰ, আকাসে উদকে ৰনে;

যং যং হত্থং পসারেমি, সব্বে গন্ধা উপেন্তি মং.

৬১. ‘‘পথব্যা পব্বতে চেৰ, আকাসে উদকে ৰনে;

যং যং [যত্থ (স্যা.), যঞ্ঞং (ক.)] হত্থং পসারেমি, সব্বে যানা উপেন্তি মং.

৬২. ‘‘পথব্যা পব্বতে চেৰ, আকাসে উদকে ৰনে;

যং যং হত্থং পসারেমি, সব্বে মালা উপেন্তি মং.

৬৩. ‘‘পথব্যা পব্বতে চেৰ, আকাসে উদকে ৰনে;

যং যং হত্থং পসারেমি, অলঙ্কারা উপেন্তি মং.

৬৪. ‘‘পথব্যা পব্বতে চেৰ, আকাসে উদকে ৰনে;

যং যং হত্থং পসারেমি, সব্বা কঞ্ঞা উপেন্তি মং.

৬৫. ‘‘পথব্যা পব্বতে চেৰ, আকাসে উদকে ৰনে;

যং যং হত্থং পসারেমি, মধুসক্খরা উপেন্তি মং.

৬৬. ‘‘পথব্যা পব্বতে চেৰ, আকাসে উদকে ৰনে;

যং যং হত্থং পসারেমি, সব্বে খজ্জা উপেন্তি মং.

৬৭. ‘‘অধনে অদ্ধিক [অদ্ধিকে (স্যা.)] জনে, যাচকে চ পথাৰিনো;

দদামিহং [দদামিহ (সী.) দদামি তং (স্যা.)] দানৰরং, সম্বোধিৰরপত্তিযা.

৬৮. ‘‘নাদেন্তো পব্বতং সেলং, গজ্জেন্তো বহলং গিরিং;

সদেৰকং হাসযন্তো, বুদ্ধো লোকে ভৰামহং.

৬৯. ‘‘দিসা দসৰিধা লোকে, যাযতো নত্থি অন্তকং;

তস্মিঞ্চ দিসাভাগম্হি, বুদ্ধখেত্তা অসঙ্খিযা.

৭০. ‘‘পভা পকিত্তিতা ময্হং, যমকা রংসিৰাহনা;

এত্থন্তরে রংসিজালং, আলোকো ৰিপুলো ভৰে.

৭১. ‘‘এত্তকে লোকধাতুম্হি, সব্বে পস্সন্তু মং জনা;

সব্বে মং অনুৰত্তন্তু, যাৰ ব্রহ্মনিৰেসনং [সব্বেৰ সুমনা হোন্তু, সব্বে মং অনুৰত্তরে (সী. স্যা.)].

৭২. ‘‘ৰিসিট্ঠমধুনাদেন, অমতভেরিমাহনিং;