৬. সুচিন্তিতত্থেরঅপদানং

৩৬. ‘‘গিরিদুগ্গচরো আসিং, অভিজাতোৰ কেসরী;

মিগসঙ্ঘং ৰধিত্ৰান, জীৰামি পব্বতন্তরে.

৩৭. ‘‘অত্থদস্সী তু ভগৰা, সব্বঞ্ঞূ ৰদতং ৰরো;

মমুদ্ধরিতুকামো সো, আগচ্ছি পব্বতুত্তমং.

৩৮. ‘‘পসদঞ্চ মিগং হন্ত্ৰা, ভক্খিতুং সমুপাগমিং;

ভগৰা তম্হি সমযে, ভিক্খমানো [সিক্খাচারো (স্যা.)] উপাগমি.

৩৯. ‘‘ৰরমংসানি পগ্গয্হ, অদাসিং তস্স সত্থুনো;

অনুমোদি মহাৰীরো, নিব্বাপেন্তো মমং তদা.

৪০. ‘‘তেন চিত্তপ্পসাদেন, গিরিদুগ্গং পৰিসিং অহং;

পীতিং উপ্পাদযিত্ৰান, তত্থ কালঙ্কতো অহং.

৪১. ‘‘এতেন মংসদানেন, চিত্তস্স পণিধীহি চ;

পন্নরসে কপ্পসতে, দেৰলোকে রমিং অহং.

৪২. ‘‘অৰসেসেসু কপ্পেসু, কুসলং চিন্তিতং [নিচিতং (সী.), করিতং (স্যা.)] মযা;

তেনেৰ মংসদানেন, বুদ্ধানুস্সরণেন চ.

৪৩. ‘‘অট্ঠত্তিংসম্হি কপ্পম্হি, অট্ঠ দীঘাযুনামকা;

সট্ঠিম্হিতো কপ্পসতে, দুৰে ৰরুণনামকা [সরণনামকা (স্যা.)].

৪৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুচিন্তিতো থেরো ইমা গাথাযো অভাসিত্থাতি.

সুচিন্তিতত্থেরস্সাপদানং ছট্ঠং.