৭. ৰত্থদাযকত্থেরঅপদানং

৪৫. ‘‘পক্খিজাতো তদা আসিং, সুপণ্ণো গরুল়াধিপো;

অদ্দসং ৰিরজং বুদ্ধং, গচ্ছন্তং গন্ধমাদনং.

৪৬. ‘‘জহিত্ৰা গরুল়ৰণ্ণং, মাণৰকং অধারযিং;

একং ৰত্থং মযা দিন্নং, দ্ৰিপদিন্দস্স তাদিনো.

৪৭. ‘‘তঞ্চ দুস্সং পটিগ্গয্হ, বুদ্ধো লোকগ্গনাযকো;

অন্তলিক্খে ঠিতো সত্থা, ইমা গাথা অভাসথ.

৪৮. ‘‘‘ইমিনা ৰত্থদানেন, চিত্তস্স পণিধীহি চ;

পহায গরুল়ং যোনিং, দেৰলোকে রমিস্সতি’.

৪৯. ‘‘অত্থদস্সী তু ভগৰা, লোকজেট্ঠো নরাসভো;

ৰত্থদানং পসংসিত্ৰা, পক্কামি উত্তরামুখো.

৫০. ‘‘ভৰে নিব্বত্তমানম্হি, হোন্তি মে ৰত্থসম্পদা;

আকাসে ছদনং হোতি, ৰত্থদানস্সিদং ফলং.

৫১. ‘‘অরুণৰা [অরুণকা (সী.), অরুণসা (স্যা.)] সত্ত জনা, চক্কৰত্তী মহব্বলা;

ছত্তিংসতিম্হি আসিংসু, কপ্পম্হি মনুজাধিপা.

৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰত্থদাযকো থেরো ইমা গাথাযো অভাসিত্থাতি.

ৰত্থদাযকত্থেরস্সাপদানং সত্তমং.