১১. রট্ঠপালত্থেরঅপদানং

১৭৯. ‘‘পদুমুত্তরস্স ভগৰতো, লোকজেট্ঠস্স তাদিনো;

ৰরনাগো মযা দিন্নো, ঈসাদন্তো উরূল়্হৰা.

১৮০. ‘‘সেতচ্ছত্তোপসোভিতো, সকপ্পনো [সীদব্বনো (সী.)] সহত্থিপো;

অগ্ঘাপেত্ৰান তং সব্বং, সঙ্ঘারামং অকারযিং.

১৮১. ‘‘চতুপঞ্ঞাসসহস্সানি, পাসাদে কারযিং অহং;

মহোঘদানং [মহগ্ঘঞ্চ (সী.), মযা ভত্তং (ক.) অপ. থের ১.২.৯৯] করিত্ৰান, নিয্যাদেসিং মহেসিনো.

১৮২. ‘‘অনুমোদি মহাৰীরো, সযম্ভূ অগ্গপুগ্গলো;

সব্বে জনে হাসযন্তো, দেসেসি অমতং পদং.

১৮৩. ‘‘তং মে বুদ্ধো ৰিযাকাসি, জলজুত্তমনামকো;

ভিক্খুসঙ্ঘে নিসীদিত্ৰা, ইমা গাথা অভাসথ.

১৮৪. ‘‘‘চতুপঞ্ঞাসসহস্সানি, পাসাদে কারযী অযং;

কথযিস্সামি ৰিপাকং, সুণাথ মম ভাসতো.

১৮৫. ‘‘‘অট্ঠারসসহস্সানি, কূটাগারা ভৰিস্সরে;

ব্যম্হুত্তমম্হি নিব্বত্তা, সব্বসোণ্ণমযা চ তে.

১৮৬. ‘‘‘পঞ্ঞাসক্খত্তুং দেৰিন্দো, দেৰরজ্জং করিস্সতি;

অট্ঠপঞ্ঞাসক্খত্তুঞ্চ, চক্কৰত্তী ভৰিস্সতি.

১৮৭. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১৮৮. ‘‘‘দেৰলোকা চৰিত্ৰান, সুক্কমূলেন চোদিতো;

অড্ঢে কুলে মহাভোগে, নিব্বত্তিস্সতি তাৰদে.

১৮৯. ‘‘‘সো পচ্ছা পব্বজিত্ৰান, সুক্কমূলেন চোদিতো;

রট্ঠপালোতি নামেন, হেস্সতি সত্থু সাৰকো.

১৯০. ‘‘‘পধানপহিতত্তো সো, উপসন্তো নিরূপধি;

সব্বাসৰে পরিঞ্ঞায, নিব্বাযিস্সতিনাসৰো’.

১৯১. ‘‘উট্ঠায অভিনিক্খম্ম, জহিতা ভোগসম্পদা;

খেল়পিণ্ডেৰ ভোগম্হি, পেমং ময্হং ন ৰিজ্জতি.

১৯২. ‘‘ৰীরিযং মে ধুরধোরয্হং, যোগক্খেমাধিৰাহনং;

ধারেমি অন্তিমং দেহং, সম্মাসম্বুদ্ধসাসনে.

১৯৩. ‘‘কিলেসা ঝাপিতা ময্হং…পে… ৰিহরামি অনাসৰো.

১৯৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৯৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা রট্ঠপালো থেরো ইমা গাথাযো

অভাসিত্থাতি.

রট্ঠপালত্থেরস্সাপদানং একাদসমং.

যসৰগ্গো ছপঞ্ঞাসমো.