১০. উপৰানত্থেরঅপদানং

১২২. ‘‘পদুমুত্তরো নাম জিনো, সব্বধম্মান পারগূ;

জলিত্ৰা অগ্গিক্খন্ধোৰ, সম্বুদ্ধো পরিনিব্বুতো.

১২৩. ‘‘মহাজনা সমাগম্ম, পূজযিত্ৰা তথাগতং;

চিতং কত্ৰান সুগতং, সরীরং অভিরোপযুং.

১২৪. ‘‘সরীরকিচ্চং কত্ৰান, ধাতুং তত্থ সমানযুং;

সদেৰমনুস্সা সব্বে, বুদ্ধথূপং অকংসু তে.

১২৫. ‘‘পঠমা কঞ্চনমযা, দুতিযা চ মণিমযা;

ততিযা রূপিযমযা, চতুত্থী ফলিকামযা.

১২৬. ‘‘তত্থ পঞ্চমিকা চেৰ [তত্থ পঞ্চমিকা চেতি (সী.)], লোহিতঙ্কমযা অহু;

ছট্ঠা মসারগল্লস্স, সব্বং রতনমযূপরি.

১২৭. ‘‘জঙ্ঘা মণিমযা আসি, ৰেদিকা রতনামযা;

সব্বসোণ্ণমযো থূপো, উদ্ধং যোজনমুগ্গতো.

১২৮. ‘‘দেৰা তত্থ সমাগন্ত্ৰা, একতো মন্তযুং তদা;

‘মযম্পি থূপং কস্সাম, লোকনাথস্স তাদিনো.

১২৯. ‘‘‘ধাতু আৰেণিকা নত্থি, সরীরং একপিণ্ডিতং;

ইমম্হি বুদ্ধথূপম্হি, কস্সাম কঞ্চুকং মযং’.

১৩০. ‘‘দেৰা সত্তহি রত্নেহি, অঞ্ঞং ৰড্ঢেসুং যোজনং;

থূপো দ্ৰিযোজনুব্বেধো, তিমিরং ব্যপহন্তি সো.

১৩১. ‘‘নাগা তত্থ সমাগন্ত্ৰা, একতো মন্তযুং তদা;

‘মনুস্সা চেৰ দেৰা চ, বুদ্ধথূপং অকংসু তে.

১৩২. ‘‘‘মা নো পমত্তা অস্সুম্হ, অপ্পমত্তা সদেৰকা;

মযম্পি থূপং কস্সাম, লোকনাথস্স তাদিনো’.

১৩৩. ‘‘ইন্দনীলং মহানীলং, অথো জোতিরসং মণিং;

একতো সন্নিপাতেত্ৰা, বুদ্ধথূপং অছাদযুং.

১৩৪. ‘‘সব্বং মণিমযং আসি, যাৰতা [তাৰতা (ক.)] বুদ্ধচেতিযং;

তিযোজনসমুব্বেধং, আলোককরণং তদা.

১৩৫. ‘‘গরুল়া চ সমাগন্ত্ৰা, একতো মন্তযুং তদা;

‘মনুস্সা দেৰনাগা চ, বুদ্ধপূজং অকংসু তে.

১৩৬. ‘‘‘মা নো পমত্তা অস্সুম্হ, অপ্পমত্তা সদেৰকা;

মযম্পি থূপং কস্সাম, লোকনাথস্স তাদিনো’.

১৩৭. ‘‘সব্বং মণিমযং থূপং, অকরুং তে চ কঞ্চুকং;

যোজনং তেপি ৰড্ঢেসুং, আযতং বুদ্ধচেতিযং.

১৩৮. ‘‘চতুযোজনমুব্বেধো, বুদ্ধথূপো ৰিরোচতি;

ওভাসেতি দিসা সব্বা, সতরংসীৰ উগ্গতো.

১৩৯. ‘‘কুম্ভণ্ডা চ সমাগন্ত্ৰা, একতো মন্তযুং তদা;

‘মনুস্সা চেৰ দেৰা চ, নাগা চ গরুল়া তথা.

১৪০. ‘‘‘পচ্চেকং বুদ্ধসেট্ঠস্স, অকংসু থূপমুত্তমং;

মা নো পমত্তা অস্সুম্হ, অপ্পমত্তা সদেৰকা.

১৪১. ‘‘‘মযম্পি থূপং কস্সাম, লোকনাথস্স তাদিনো;

রতনেহি ছাদেস্সাম, আযতং বুদ্ধচেতিযং’.

১৪২. ‘‘যোজনং তেপি ৰড্ঢেসুং, আযতং বুদ্ধচেতিযং;

পঞ্চযোজনমুব্বেধো, থূপো ওভাসতে তদা.

১৪৩. ‘‘যক্খা তত্থ সমাগন্ত্ৰা, একতো মন্তযুং তদা;

‘মনুস্সা দেৰনাগা চ, গরুল়া চ কুম্ভণ্ডকা.

১৪৪. ‘‘‘পচ্চেকং বুদ্ধসেট্ঠস্স, অকংসু থূপমুত্তমং;

মা নো পমত্তা অস্সুম্হ, অপ্পমত্তা সদেৰকা.

১৪৫. ‘‘‘মযম্পি থূপং কস্সাম, লোকনাথস্স তাদিনো;

ফলিকা ছাদযিস্সাম, আযতং বুদ্ধচেতিযং’.

১৪৬. ‘‘যোজনং তেপি ৰড্ঢেসুং, আযতং বুদ্ধচেতিযং;

ছযোজনিকমুব্বেধো, থূপো ওভাসতে তদা.

১৪৭. ‘‘গন্ধব্বা চ সমাগন্ত্ৰা, একতো মন্তযুং তদা;

‘মনুজা দেৰতা নাগা, কুম্ভণ্ডা গরুল়া তথা [কুম্ভণ্ডা চ যক্খা তথা (সী.)].

১৪৮. ‘‘‘সব্বে অকংসু বুদ্ধথূপং, মযমেত্থ অকারকা;

মযম্পি থূপং কস্সাম, লোকনাথস্স তাদিনো’.

১৪৯. ‘‘ৰেদিযো সত্ত কত্ৰান, ধজং ছত্তং অকংসু তে;

সব্বসোণ্ণমযং থূপং, গন্ধব্বা কারযুং তদা.

১৫০. ‘‘সত্তযোজনমুব্বেধো, থূপো ওভাসতে তদা;

রত্তিন্দিৰা ন ঞাযন্তি, আলোকো হোতি সব্বদা.

১৫১. ‘‘অভিভোন্তি ন তস্সাভা, চন্দসূরা সতারকা;

সমন্তা যোজনসতে, পদীপোপি ন পজ্জলি.

১৫২. ‘‘তেন কালেন যে কেচি, থূপং পূজেন্তি মানুসা;

ন তে থূপং আরুহন্তি, অম্বরে উক্খিপন্তি তে.

১৫৩. ‘‘দেৰেহি ঠপিতো যক্খো, অভিসম্মতনামকো;

ধজং ৰা পুপ্ফদামং ৰা, অভিরোপেতি উত্তরিং.

১৫৪. ‘‘ন তে পস্সন্তি তং যক্খং, দামং পস্সন্তি গচ্ছতো;

এৰং পস্সিত্ৰা গচ্ছন্তা, সব্বে গচ্ছন্তি সুগ্গতিং.

১৫৫. ‘‘ৰিরুদ্ধা যে পাৰচনে, পসন্না যে চ সাসনে;

পাটিহীরং দট্ঠুকামা, থূপং পূজেন্তি মানুসা.

১৫৬. ‘‘নগরে হংসৰতিযা, অহোসিং ভতকো তদা;

আমোদিতং জনং দিস্ৰা, এৰং চিন্তেসহং তদা.

১৫৭. ‘‘‘উল়ারো ভগৰা নেসো, যস্স ধাতুঘরে দিসং;

ইমা চ জনতা তুট্ঠা, কারং কুব্বং ন তপ্পরে.

১৫৮. ‘‘‘অহম্পি কারং কস্সামি, লোকনাথস্স তাদিনো;

তস্স ধম্মেসু দাযাদো, ভৰিস্সামি অনাগতে’.

১৫৯. ‘‘সুধোতং রজকেনাহং, উত্তরেয্যং পটং মম;

ৰেল়গ্গে আলগ্গেত্ৰান, ধজং উক্খিপিমম্বরে.

১৬০. ‘‘অভিসম্মতকো গয্হ, অম্বরে হাসি মে ধজং;

ৰাতেরিতং ধজং দিস্ৰা, ভিয্যো হাসং জনেসহং.

১৬১. ‘‘তত্থ চিত্তং পসাদেত্ৰা, সমণং উপসঙ্কমিং;

তং ভিক্খুং অভিৰাদেত্ৰা, ৰিপাকং পুচ্ছহং ধজে.

১৬২. ‘‘সো মে কথেসি আনন্দী, পীতিসঞ্জননং মম;

‘তস্স ধজস্স ৰিপাকং, অনুভোস্সসি সব্বদা.

১৬৩. ‘‘‘হত্থিঅস্সরথাপত্তী, সেনা চ চতুরঙ্গিনী;

পরিৰারেস্সন্তি তং নিচ্চং, ধজদানস্সিদং ফলং.

১৬৪. ‘‘‘সট্ঠিতুরিযসহস্সানি, ভেরিযো সমলঙ্কতা;

পরিৰারেস্সন্তি তং নিচ্চং, ধজদানস্সিদং ফলং.

১৬৫. ‘‘‘ছল়সীতিসহস্সানি, নারিযো সমলঙ্কতা;

ৰিচিত্তৰত্থাভরণা, আমুক্কমণিকুণ্ডলা.

১৬৬. ‘‘‘আল়ারপম্হা হসুলা, সুসঞ্ঞা [সুত্থনা (সী.) অপ. থের ২.৪৮.১৯ মণিপূজকত্থেরাপদানেপি] তনুমজ্ঝিমা;

পরিৰারেস্সন্তি তং নিচ্চং, ধজদানস্সিদং ফলং.

১৬৭. ‘‘‘তিংসকপ্পসহস্সানি, দেৰলোকে রমিস্সসি;

অসীতিক্খত্তুং দেৰিন্দো, দেৰরজ্জং করিস্সসি.

১৬৮. ‘‘‘সহস্সক্খত্তুং রাজা চ, চক্কৰত্তী ভৰিস্সতি;

পদেসরজ্জং ৰিপুলং, গণনাতো অসঙ্খিযং.

১৬৯. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১৭০. ‘‘‘দেৰলোকা চৰিত্ৰান, সুক্কমূলেন চোদিতো;

পুঞ্ঞকম্মেন সঞ্ঞুত্তো, ব্রহ্মবন্ধু ভৰিস্সসি.

১৭১. ‘‘‘অসীতিকোটিং ছড্ডেত্ৰা, দাসে কম্মকরে বহূ;

গোতমস্স ভগৰতো, সাসনে পব্বজিস্সসি.

১৭২. ‘‘‘আরাধযিত্ৰা সম্বুদ্ধং, গোতমং সক্যপুঙ্গৰং;

উপৰানোতি নামেন, হেস্সসি সত্থু সাৰকো’.

১৭৩. ‘‘সতসহস্সে কতং কম্মং, ফলং দস্সেসি মে ইধ;

সুমুত্তো সরৰেগোৰ, কিলেসে ঝাপযিং [কিলেসা ঝাপিতা (সী.)] মম.

১৭৪. ‘‘চক্কৰত্তিস্স সন্তস্স, চাতুদ্দীপিস্সরস্স মে;

তীণি যোজনানি সামন্তা, উস্সীযন্তি ধজা সদা.

১৭৫. ‘‘সতসহস্সিতো কপ্পে, যং কম্মমকরিং তদা;

দুগ্গতিং নাভিজানামি, ধজদানস্সিদং ফলং.

১৭৬. ‘‘কিলেসা ঝাপিতা ময্হং…পে… ৰিহরামি অনাসৰো.

১৭৭. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৭৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উপৰানত্থেরো ইমা গাথাযো

অভাসিত্থাতি.

উপৰানত্থেরস্সাপদানং দসমং.