৯. ৰনৰচ্ছত্থেরঅপদানং

২৫১. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

২৫২. ‘‘তদাহং পব্বজিত্ৰান, তস্স বুদ্ধস্স সাসনে;

যাৰজীৰং চরিত্ৰান, ব্রহ্মচারং ততো চুতো.

২৫৩. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

২৫৪. ‘‘ততো চুতো অরঞ্ঞম্হি, কপোতো আসহং তহিং;

ৰসতে গুণসম্পন্নো, ভিক্খু ঝানরতো সদা.

২৫৫. ‘‘মেত্তচিত্তো কারুণিকো, সদা পমুদিতাননো;

উপেক্খকো মহাৰীরো, অপ্পমঞ্ঞাসু কোৰিদো.

২৫৬. ‘‘ৰিনীৰরণসঙ্কপ্পে, সব্বসত্তহিতাসযে;

ৰিসট্ঠো নচিরেনাসিং, তস্মিং সুগতসাৰকে.

২৫৭. ‘‘উপেচ্চ পাদমূলম্হি, নিসিন্নস্স তদাস্সমে;

কদাচি সামিসং দেতি, ধম্মং দেসেসি চেকদা.

২৫৮. ‘‘তদা ৰিপুলপেমেন, উপাসিত্ৰা জিনত্রজং;

ততো চুতো গতো সগ্গং, পৰাসো সঘরং যথা.

২৫৯. ‘‘সগ্গা চুতো মনুস্সেসু, নিব্বত্তো পুঞ্ঞকম্মুনা;

অগারং ছড্ডযিত্ৰান, পব্বজিং বহুসো অহং.

২৬০. ‘‘সমণো তাপসো ৰিপ্পো, পরিব্বজো তথেৰহং;

হুত্ৰা ৰসিং অরঞ্ঞম্হি, অনেকসতসো অহং.

২৬১. ‘‘পচ্ছিমে চ ভৰে দানি, রম্মে কপিলৰত্থৰে;

ৰচ্ছগোত্তো দিজো তস্স, জাযায অহমোক্কমিং.

২৬২. ‘‘মাতু মে দোহল়ো আসি, তিরোকুচ্ছিগতস্স মে;

জাযমানসমীপম্হি, ৰনৰাসায নিচ্ছযো.

২৬৩. ‘‘ততো মে অজনী মাতা, রমণীযে ৰনন্তরে;

গব্ভতো নিক্খমন্তং মং, কাসাযেন পটিগ্গহুং.

২৬৪. ‘‘ততো কুমারো সিদ্ধত্থো, জাতো সক্যকুলদ্ধজো;

তস্স মিত্তো পিযো আসিং, সংৰিসট্ঠো সুমানিযো.

২৬৫. ‘‘সত্তসারেভিনিক্খন্তে, ওহায ৰিপুলং যসং;

অহম্পি পব্বজিত্ৰান, হিমৰন্তমুপাগমিং.

২৬৬. ‘‘ৰনালযং ভাৰনীযং, কস্সপং ধুতৰাদিকং;

দিস্ৰা সুত্ৰা জিনুপ্পাদং, উপেসিং নরসারথিং.

২৬৭. ‘‘সো মে ধম্মমদেসেসি, সব্বত্থং সম্পকাসযং;

ততোহং পব্বজিত্ৰান, ৰনমেৰ পুনাগমং [পুনাগমিং (সী. পী.), পুনোক্কমং (স্যা.)].

২৬৮. ‘‘তত্থাপ্পমত্তো ৰিহরং, ছল়ভিঞ্ঞা অফস্সযিং [অপস্সযিং (স্যা. ক.)];

অহো সুলদ্ধলাভোম্হি, সুমিত্তেনানুকম্পিতো.

২৬৯. ‘‘কিলেসা ঝাপিতা ময্হং…পে… ৰিহরামি অনাসৰো.

২৭০. ‘‘স্ৰাগতং ৰত মে আসি…পে… কতং বুদ্ধস্স সাসনং.

২৭১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰনৰচ্ছো থেরো ইমা গাথাযো

অভাসিত্থাতি.

ৰনৰচ্ছত্থেরস্সাপদানং নৰমং.