১০. চূল়সুগন্ধত্থেরঅপদানং

২৭২. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

২৭৩. ‘‘অনুব্যঞ্জনসম্পন্নো, বাত্তিংসৰরলক্খণো;

ব্যামপ্পভাপরিৰুতো, রংসিজালসমোত্থটো.

২৭৪. ‘‘অস্সাসেতা যথা চন্দো, সূরিযোৰ পভঙ্করো;

নিব্বাপেতা যথা মেঘো, সাগরোৰ গুণাকরো.

২৭৫. ‘‘ধরণীরিৰ সীলেন, হিমৰাৰ সমাধিনা;

আকাসো ৰিয পঞ্ঞায, অসঙ্গো অনিলো যথা.

২৭৬. ‘‘তদাহং বারাণসিযং, উপপন্নো মহাকুলে;

পহূতধনধঞ্ঞস্মিং, নানারতনসঞ্চযে.

২৭৭. ‘‘মহতা পরিৰারেন, নিসিন্নং লোকনাযকং;

উপেচ্চ ধম্মমস্সোসিং, অমতংৰ মনোহরং.

২৭৮. ‘‘দ্ৰত্তিংসলক্খণধরো, সনক্খত্তোৰ চন্দিমা;

অনুব্যঞ্জনসম্পন্নো, সালরাজাৰ ফুল্লিতো.

২৭৯. ‘‘রংসিজালপরিক্খিত্তো, দিত্তোৰ কনকাচলো;

ব্যামপ্পভাপরিৰুতো, সতরংসী দিৰাকরো.

২৮০. ‘‘সোণ্ণাননো জিনৰরো, সমণীৰ [রম্মণীৰ (স্যা.)] সিলুচ্চযো;

করুণাপুণ্ণহদযো, গুণেন ৰিয সাগরো.

২৮১. ‘‘লোকৰিস্সুতকিত্তি চ, সিনেরূৰ নগুত্তমো;

যসসা ৰিত্থতো ৰীরো, আকাসসদিসো মুনি.

২৮২. ‘‘অসঙ্গচিত্তো সব্বত্থ, অনিলো ৰিয নাযকো;

পতিট্ঠা সব্বভূতানং, মহীৰ মুনিসত্তমো.

২৮৩. ‘‘অনুপলিত্তো লোকেন, তোযেন পদুমং যথা;

কুৰাদগচ্ছদহনো, অগ্গিখন্ধোৰ সোভসি [সোভতি (সী.), সো ৰসি (স্যা. ক.)].

২৮৪. ‘‘অগধো ৰিয সব্বত্থ, কিলেসৰিসনাসকো;

গন্ধমাদনসেলোৰ, গুণগন্ধৰিভূসিতো.

২৮৫. ‘‘গুণানং আকরো ৰীরো, রতনানংৰ সাগরো;

সিন্ধূৰ ৰনরাজীনং, কিলেসমলহারকো.

২৮৬. ‘‘ৰিজযীৰ মহাযোধো, মারসেনাৰমদ্দনো;

চক্কৰত্তীৰ সো রাজা, বোজ্ঝঙ্গরতনিস্সরো.

২৮৭. ‘‘মহাভিসক্কসঙ্কাসো, দোসব্যাধিতিকিচ্ছকো;

সল্লকত্তো যথা ৰেজ্জো, দিট্ঠিগণ্ডৰিফালকো.

২৮৮. ‘‘সো তদা লোকপজ্জোতো, সনরামরসক্কতো;

পরিসাসু নরাদিচ্চো, ধম্মং দেসযতে জিনো.

২৮৯. ‘‘দানং দত্ৰা মহাভোগো, সীলেন সুগতূপগো;

ভাৰনায চ নিব্বাতি, ইচ্চেৰমনুসাসথ.

২৯০. ‘‘দেসনং তং মহস্সাদং, আদিমজ্ঝন্তসোভণং;

সুণন্তি পরিসা সব্বা, অমতংৰ মহারসং.

২৯১. ‘‘সুত্ৰা সুমধুরং ধম্মং, পসন্নো জিনসাসনে;

সুগতং সরণং গন্ত্ৰা, যাৰজীৰং নমস্সহং.

২৯২. ‘‘মুনিনো গন্ধকুটিযা, ওপুঞ্জেসিং [উব্বট্টেসিং (স্যা.)] তদা মহিং;

চতুজ্জাতেন গন্ধেন, মাসে অট্ঠ দিনেস্ৰহং.

২৯৩. ‘‘পণিধায সুগন্ধত্তং, সরীরৰিস্সগন্ধিনো [সরীরস্স ৰিগন্ধিনো (সী. স্যা. পী.)];

তদা জিনো ৰিযাকাসি, সুগন্ধতনুলাভিতং.

২৯৪. ‘‘‘যো যং গন্ধকুটিভূমিং, গন্ধেনোপুঞ্জতে সকিং;

তেন কম্মৰিপাকেন, উপপন্নো তহিং তহিং.

২৯৫. ‘‘‘সুগন্ধদেহো সব্বত্থ, ভৰিস্সতি অযং নরো;

গুণগন্ধযুত্তো হুত্ৰা, নিব্বাযিস্সতিনাসৰো’.

২৯৬. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

২৯৭. ‘‘পচ্ছিমে চ ভৰে দানি, জাতো ৰিপ্পকুলে অহং;

গব্ভং মে ৰসতো মাতা, দেহেনাসি সুগন্ধিতা.

২৯৮. ‘‘যদা চ মাতুকুচ্ছিম্হা, নিক্খমামি তদা পুরী [পুরং (স্যা. ক.)];

সাৰত্থিসব্বগন্ধেহি, ৰাসিতা ৰিয ৰাযথ.

২৯৯. ‘‘পুপ্ফৰস্সঞ্চ সুরভি, দিব্বগন্ধং মনোরমং;

ধূপানি চ মহগ্ঘানি, উপৰাযিংসু তাৰদে.

৩০০. ‘‘দেৰা চ সব্বগন্ধেহি, ধূপপুপ্ফেহি তং ঘরং;

ৰাসযিংসু সুগন্ধেন, যস্মিং জাতো অহং ঘরে.

৩০১. ‘‘যদা চ তরুণো ভদ্দো, পঠমে যোব্বনে ঠিতো;

তদা সেলং [সেসং (স্যা.)] সপরিসং, ৰিনেত্ৰা নরসারথি.

৩০২. ‘‘তেহি সব্বেহি পরিৰুতো [সহিতো (সী. স্যা. পী.)], সাৰত্থিপুরমাগতো;

তদা বুদ্ধানুভাৰং তং, দিস্ৰা পব্বজিতো অহং.

৩০৩. ‘‘সীলং সমাধিপঞ্ঞঞ্চ, ৰিমুত্তিঞ্চ অনুত্তরং;

ভাৰেত্ৰা চতুরো ধম্মে, পাপুণিং আসৰক্খযং.

৩০৪. ‘‘যদা পব্বজিতো চাহং, যদা চ অরহা অহুং;

নিব্বাযিস্সং যদা চাহং, গন্ধৰস্সো তদা অহু.

৩০৫. ‘‘সরীরগন্ধো চ সদাতিসেতি [সদা ৰাসেতি (ক.)] মে, মহারহং চন্দনচম্পকুপ্পলং;

তথেৰ গন্ধে ইতরে চ সব্বসো, পসয্হ ৰাযামি ততো তহিং [যহিং (স্যা.)] তহিং.

৩০৬. ‘‘কিলেসা ঝাপিতা ময্হং…পে… ৰিহরামি অনাসৰো.

৩০৭. ‘‘স্ৰাগতং ৰত মে আসি…পে… কতং বুদ্ধস্স সাসনং.

৩০৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চূল়সুগন্ধো থেরো ইমা গাথাযো অভাসিত্থাতি;

চূল়সুগন্ধত্থেরস্সাপদানং দসমং.

ভদ্দিযৰগ্গো পঞ্চপঞ্ঞাসমো.