৮. লোমসকঙ্গিযত্থেরঅপদানং

২২৫. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

২২৬. ‘‘তদাহং চন্দনো চেৰ, পব্বজিত্ৰান সাসনে;

আপাণকোটিকং ধম্মং, পূরযিত্ৰান সাসনে.

২২৭. ‘‘ততো চুতা সন্তুসিতং, উপপন্না উভো মযং;

তত্থ দিব্বেহি নচ্চেহি, গীতেহি ৰাদিতেহি চ.

২২৮. ‘‘রূপাদিদসহঙ্গেহি, অভিভোত্ৰান সেসকে;

যাৰতাযুং ৰসিত্ৰান, অনুভোত্ৰা মহাসুখং.

২২৯. ‘‘ততো চৰিত্ৰা তিদসং, চন্দনো উপপজ্জথ;

অহং কপিলৰত্থুস্মিং, অজাযিং সাকিযত্রজো.

২৩০. ‘‘যদা উদাযিত্থেরেন, অজ্ঝিট্ঠো লোকনাযকো;

অনুকম্পিয সক্যানং, উপেসি কপিলৰ্হযং.

২৩১. ‘‘তদাতিমানিনো সক্যা, ন বুদ্ধস্স গুণঞ্ঞুনো;

পণমন্তি ন সম্বুদ্ধং, জাতিথদ্ধা অনাদরা.

২৩২. ‘‘তেসং সঙ্কপ্পমঞ্ঞায, আকাসে চঙ্কমী জিনো;

পজ্জুন্নো ৰিয ৰস্সিত্থ, পজ্জলিত্থ যথা সিখী.

২৩৩. ‘‘দস্সেত্ৰা রূপমতুলং, পুন অন্তরধাযথ;

একোপি হুত্ৰা বহুধা, অহোসি পুনরেককো.

২৩৪. ‘‘অন্ধকারং পকাসঞ্চ, দস্সযিত্ৰা অনেকধা;

পাটিহেরং করিত্ৰান, ৰিনযী ঞাতকে মুনি.

২৩৫. ‘‘চাতুদ্দীপো মহামেঘো, তাৰদেৰ পৰস্সথ;

তদা হি জাতকং বুদ্ধো, ৰেস্সন্তরমদেসযি.

২৩৬. ‘‘তদা তে খত্তিযা সব্বে, নিহন্ত্ৰা জাতিজং মদং;

উপেসুং সরণং বুদ্ধং, আহ সুদ্ধোদনো তদা.

২৩৭. ‘‘‘ইদং ততিযং তৰ ভূরিপঞ্ঞ, পাদানি ৰন্দামি সমন্তচক্খু;

যদাভিজাতো পথৰী পকম্পযী, যদা চ তং নজ্জহি জম্বুছাযা’.

২৩৮. ‘‘তদা বুদ্ধানুভাৰং তং, দিস্ৰা ৰিম্হিতমানসো;

পব্বজিত্ৰান তত্থেৰ, নিৰসিং মাতুপূজকো.

২৩৯. ‘‘চন্দনো দেৰপুত্তো মং, উপগন্ত্ৰানুপুচ্ছথ;

ভদ্দেকরত্তস্স তদা, সঙ্খেপৰিত্থারং নযং.

২৪০. ‘‘চোদিতোহং তদা তেন, উপেচ্চ নরনাযকং;

ভদ্দেকরত্তং সুত্ৰান, সংৰিগ্গো ৰনমামকো.

২৪১. ‘‘তদা মাতরমপুচ্ছিং, ৰনে ৰচ্ছামি এককো;

সুখুমালোতি মে মাতা, ৰারযী তং [তে (স্যা. পী. ক.)] তদা ৰচং.

২৪২. ‘‘কাসং [দব্বং (সী. স্যা. পী.)] কুসং পোটকিলং, উসীরং মুঞ্জপব্বজং [মুঞ্জবব্বজং (সী. পী.)];

উরসা পনুদিস্সামি, ৰিৰেকমনুব্রূহযং.

২৪৩. ‘‘তদা ৰনং পৰিট্ঠোহং, সরিত্ৰা জিনসাসনং;

ভদ্দেকরত্তওৰাদং, অরহত্তমপাপুণিং.

২৪৪. ‘‘‘অতীতং নান্ৰাগমেয্য, নপ্পটিকঙ্খে অনাগতং;

যদতীতং পহীনং তং, অপ্পত্তঞ্চ অনাগতং.

২৪৫. ‘‘‘পচ্চুপ্পন্নঞ্চ যো ধম্মং, তত্থ তত্থ ৰিপস্সতি;

অসংহীরং অসংকুপ্পং, তং ৰিদ্ৰা মনুব্রূহযে.

২৪৬. ‘‘‘অজ্জেৰ কিচ্চমাতপ্পং, কো জঞ্ঞা মরণং সুৰে;

ন হি নো সঙ্গরং [সঙ্করং (ক.)] তেন, মহাসেনেন মচ্চুনা.

২৪৭. ‘‘‘এৰংৰিহারিং আতাপিং, অহোরত্তমতন্দিতং;

তং ৰে ভদ্দেকরত্তোতি, সন্তো আচিক্খতে মুনি’.

২৪৮. ‘‘কিলেসা ঝাপিতা ময্হং…পে… ৰিহরামি অনাসৰো.

২৪৯. ‘‘স্ৰাগতং ৰত মে আসি…পে… কতং বুদ্ধস্স সাসনং.

২৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা লোমসকঙ্গিযো [লোমসঙ্খিযো (স্যা. ক.)] থেরো ইমা গাথাযো

অভাসিত্থাতি.

লোমসকঙ্গিযত্থেরস্সাপদানং অট্ঠমং.