৩. সীৰলিত্থেরঅপদানং

৫৪. ‘‘পদুমুত্তরো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

৫৫. ‘‘সীলং তস্স অসঙ্খেয্যং, সমাধি ৰজিরূপমো;

অসঙ্খেয্যং ঞাণৰরং, ৰিমুত্তি চ অনোপমা.

৫৬. ‘‘মনুজামরনাগানং, ব্রহ্মানঞ্চ সমাগমে;

সমণব্রাহ্মণাকিণ্ণে, ধম্মং দেসেসি নাযকো.

৫৭. ‘‘সসাৰকং মহালাভিং, পুঞ্ঞৰন্তং জুতিন্ধরং;

ঠপেসি এতদগ্গম্হি, পরিসাসু ৰিসারদো.

৫৮. ‘‘তদাহং খত্তিযো আসিং, নগরে হংসসৰ্হযে;

সুত্ৰা জিনস্স তং ৰাক্যং, সাৰকস্স গুণং বহুং.

৫৯. ‘‘নিমন্তযিত্ৰা সত্তাহং, ভোজযিত্ৰা সসাৰকং;

মহাদানং দদিত্ৰান, তং ঠানমভিপত্থযিং.

৬০. ‘‘তদা মং ৰিনতং পাদে, দিস্ৰান পুরিসাসভো;

সরেন মহতা ৰীরো [সুস্সরেন মহাৰীরো (সী. পী.)], ইদং ৰচনমব্রৰি.

৬১. ‘‘‘ততো জিনস্স ৰচনং, সোতুকামা মহাজনা;

দেৰদানৰগন্ধব্বা, ব্রহ্মানো চ মহিদ্ধিকা’.

৬২. ‘‘সমণব্রাহ্মণা চেৰ, নমস্সিংসু কতঞ্জলী;

‘নমো তে পুরিসাজঞ্ঞ, নমো তে পুরিসুত্তম.

৬৩. ‘‘‘খত্তিযেন মহাদানং, দিন্নং সত্তাহিকম্পি ৰো [সত্তহিকং মি ৰো (সী.), সত্তহিকাধিকং (স্যা.), সত্তহিকং ৰিভো (পী.)];

সোতুকামা ফলং তস্স, ব্যাকরোহি মহামুনে’.

৬৪. ‘‘ততো অৰোচ ভগৰা, ‘সুণাথ মম ভাসিতং;

অপ্পমেয্যম্হি বুদ্ধম্হি, সসঙ্ঘম্হি পতিট্ঠিতা [সংঘম্হি সুপ্পতিট্ঠিতা (সী. পী.)].

৬৫. ‘‘‘দক্খিণা তায [দক্খিণাদায (স্যা. পী.)] কো ৰত্তা, অপ্পমেয্যফলা হি সা;

অপি চে স মহাভোগো, ঠানং পত্থেতি উত্তমং.

৬৬. ‘‘‘লাভী ৰিপুললাভানং, যথা ভিক্খু সুদস্সনো;

তথাহম্পি ভৰেয্যন্তি, লচ্ছসে তং অনাগতে.

৬৭. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৬৮. ‘‘‘তস্স ধম্মেসু দাযাদো, ওরসো ধম্মনিম্মিতো;

সীৰলি নাম নামেন, হেস্সতি সত্থু সাৰকো’.

৬৯. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসূপগো অহং.

৭০. ‘‘একনৰুতিতো কপ্পে, ৰিপস্সী লোকনাযকো;

উপ্পজ্জি চারুদস্সনো, সব্বধম্মৰিপস্সকো.

৭১. ‘‘তদাহং বন্ধুমতিযং, কুলস্সঞ্ঞতরস্স চ;

দযিতো পস্সিতো চেৰ, আসিং কম্মন্তৰাৰটো [কম্মন্তব্যাৰটো (সী. স্যা. ক.)].

৭২. ‘‘তদা অঞ্ঞতরো পূগো, ৰিপস্সিস্স মহেসিনো;

পরিৰেসং অকারযি, মহন্তমতিৰিস্সুতং.

৭৩. ‘‘নিট্ঠিতে চ মহাদানে, দদুং খজ্জকসঞ্হিতং;

নৰং দধিং মধুঞ্চেৰ, ৰিচিনং নেৰ অদ্দসুং.

৭৪. ‘‘তদাহং তং গহেত্ৰান, নৰং দধিং মধুম্পি চ;

কম্মস্সামিঘরং গচ্ছিং, তমেসন্তা মমদ্দসুং.

৭৫. ‘‘সহস্সমপি দত্ৰান, নালভিংসু চ তং দ্ৰযং;

ততোহং এৰং চিন্তেসিং, ‘নেতং হেস্সতি ওরকং.

৭৬. ‘‘‘যথা ইমে জনা সব্বে, সক্করোন্তি তথাগতং;

অহম্পি কারং কস্সামি, সসঙ্ঘে লোকনাযকে’.

৭৭. ‘‘তদাহমেৰং চিন্তেত্ৰা, দধিং মধুঞ্চ একতো;

মদ্দিত্ৰা লোকনাথস্স, সসঙ্ঘস্স অদাসহং.

৭৮. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৭৯. ‘‘পুনাহং বারাণসিযং, রাজা হুত্ৰা মহাযসো;

সত্তুকস্স তদা দুট্ঠো, দ্ৰাররোধমকারযিং.

৮০. ‘‘তদা তপস্সিনো রুদ্ধা, একাহং রক্খিতা অহুং;

ততো তস্স ৰিপাকেন, পাপতিং [পাপিট্ঠং (স্যা.) পাপত্তং (ক.)] নিরযং ভুসং.

৮১. ‘‘পচ্ছিমে চ ভৰে দানি, জাতোহং কোলিযে পুরে;

সুপ্পৰাসা চ মে মাতা, মহালি লিচ্ছৰী পিতা.

৮২. ‘‘খত্তিযে পুঞ্ঞকম্মেন, দ্ৰাররোধস্স ৰাহসা;

সত্ত ৰস্সানি নিৰসিং, মাতুকুচ্ছিম্হি দুক্খিতো.

৮৩. ‘‘সত্তাহং দ্ৰারমূল়্হোহং, মহাদুক্খসমপ্পিতো;

মাতা মে ছন্দদানেন, এৰং আসি সুদুক্খিতা.

৮৪. ‘‘সুৰত্থিতোহং নিক্খন্তো, বুদ্ধেন অনুকম্পিতো;

নিক্খন্তদিৰসেযেৰ, পব্বজিং অনগারিযং.

৮৫. ‘‘উপজ্ঝা সারিপুত্তো মে, মোগ্গল্লানো মহিদ্ধিকো;

কেসে ওরোপযন্তো মে, অনুসাসি মহামতি.

৮৬. ‘‘কেসেসু ছিজ্জমানেসু, অরহত্তমপাপুণিং;

দেৰা নাগা মনুস্সা চ, পচ্চযে উপনেন্তি মে.

৮৭. ‘‘পদুমুত্তরনাথঞ্চ, ৰিপস্সিঞ্চ ৰিনাযকং;

যং পূজযিং পমুদিতো, পচ্চযেহি ৰিসেসতো.

৮৮. ‘‘ততো তেসং ৰিসেসেন, কম্মানং ৰিপুলুত্তমং;

লাভং লভামি সব্বত্থ, ৰনে গামে জলে থলে.

৮৯. ‘‘রেৰতং দস্সনত্থায, যদা যাতি ৰিনাযকো;

তিংসভিক্খুসহস্সেহি, সহ লোকগ্গনাযকো.

৯০. ‘‘তদা দেৰোপণীতেহি, মমত্থায মহামতি;

পচ্চযেহি মহাৰীরো, সসঙ্ঘো লোকনাযকো.

৯১. ‘‘উপট্ঠিতো মযা বুদ্ধো, গন্ত্ৰা রেৰতমদ্দস;

ততো জেতৰনং গন্ত্ৰা, এতদগ্গে ঠপেসি মং.

৯২. ‘‘‘লাভীনং সীৰলি অগ্গো, মম সিস্সেসু ভিক্খৰো’;

সব্বলোকহিতো সত্থা, কিত্তযী পরিসাসু মং.

৯৩. ‘‘কিলেসা ঝাপিতা ময্হং…পে… ৰিহরামি অনাসৰো.

৯৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

৯৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সীৰলিথেরো ইমা গাথাযো

অভাসিত্থাতি.

সীৰলিত্থেরস্সাপদানং ততিযং.