৪. ৰঙ্গীসত্থেরঅপদানং

৯৬. ‘‘পদুমুত্তরো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

৯৭. ‘‘যথাপি সাগরে ঊমি, গগনে ৰিয তারকা;

এৰং পাৰচনং তস্স, অরহন্তেহি চিত্তিতং.

৯৮. ‘‘সদেৰাসুরনাগেহি, মনুজেহি পুরক্খতো;

সমণব্রাহ্মণাকিণ্ণে, জনমজ্ঝে জিনুত্তমো.

৯৯. ‘‘পভাহি অনুরঞ্জন্তো, লোকে [লোকং (সী.)] লোকন্তগূ জিনো;

ৰচনেন ৰিবোধেন্তো, ৰেনেয্যপদুমানি সো.

১০০. ‘‘ৰেসারজ্জেহি সম্পন্নো, চতূহি পুরিসুত্তমো;

পহীনভযসারজ্জো, খেমপ্পত্তো ৰিসারদো.

১০১. ‘‘আসভং পৰরং ঠানং, বুদ্ধভূমিঞ্চ কেৰলং;

পটিজানাতি লোকগ্গো, নত্থি সঞ্চোদকো ক্ৰচি.

১০২. ‘‘সীহনাদমসম্ভীতং, নদতো তস্স তাদিনো;

দেৰো নরো ৰা ব্রহ্মা ৰা, পটিৰত্তা ন ৰিজ্জতি.

১০৩. ‘‘দেসেন্তো পৰরং ধম্মং, সন্তারেন্তো সদেৰকং;

ধম্মচক্কং পৰত্তেতি, পরিসাসু ৰিসারদো.

১০৪. ‘‘পটিভানৰতং অগ্গং, সাৰকং সাধুসম্মতং;

গুণং বহুং পকিত্তেত্ৰা, এতদগ্গে ঠপেসি তং.

১০৫. ‘‘তদাহং হংসৰতিযং, ব্রাহ্মণো সাধুসম্মতো;

সব্বৰেদৰিদূ জাতো, ৰাগীসো ৰাদিসূদনো.

১০৬. ‘‘উপেচ্চ তং মহাৰীরং, সুত্ৰাহং ধম্মদেসনং;

পীতিৰরং পটিলভিং, সাৰকস্স গুণে রতো.

১০৭. ‘‘নিমন্তেত্ৰাৰ সুগতং, সসঙ্ঘং লোকনন্দনং;

সত্তাহং ভোজযিত্ৰাহং, দুস্সেহচ্ছাদযিং তদা.

১০৮. ‘‘নিপচ্চ সিরসা পাদে, কতোকাসো কতঞ্জলী;

একমন্তং ঠিতো হট্ঠো, সন্থৰিং জিনমুত্তমং.

১০৯. ‘‘‘নমো তে ৰাদিমদ্দন [ৰাদিসদ্দুল (সী. পী.), ৰাদিসূদন (স্যা.)], নমো তে ইসিসত্তম [পুরিসুত্তম (সী. পী.)];

নমো তে সব্বলোকগ্গ, নমো তে অভযঙ্কর.

১১০. ‘‘‘নমো তে মারমথন [মারমসন (অট্ঠ.)], নমো তে দিট্ঠিসূদন;

নমো তে সন্তিসুখদ, নমো তে সরণঙ্কর.

১১১. ‘‘‘অনাথানং ভৰং নাথো, ভীতানং অভযপ্পদো;

ৰিস্সামভূমি [ৰিস্সাসং ভূমি (স্যা.), ৰিস্সানভূমি (পী.)] সন্তানং, সরণং সরণেসিনং’.

১১২. ‘‘এৰমাদীহি সম্বুদ্ধং, সন্থৰিত্ৰা মহাগুণং;

অৰোচং ৰাদিসূদস্স [ৰাদিসূরস্স (সী. স্যা. পী.)], গতিং পপ্পোমি ভিক্খুনো.

১১৩. ‘‘তদা অৰোচ ভগৰা, অনন্তপটিভানৰা;

‘যো সো বুদ্ধং অভোজেসি, সত্তাহং সহসাৰকং.

১১৪. ‘‘‘গুণঞ্চ মে পকিত্তেসি, পসন্নো সেহি পাণিভি;

এসো পত্থযতে ঠানং, ৰাদিসূদস্স ভিক্খুনো.

১১৫. ‘‘‘অনাগতম্হি অদ্ধানে, লচ্ছসে তং মনোরথং;

দেৰমানুসসম্পত্তিং, অনুভোত্ৰা অনপ্পকং.

১১৬. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১১৭. ‘‘‘তস্স ধম্মেসু দাযাদো, ওরসো ধম্মনিম্মিতো;

ৰঙ্গীসো নাম নামেন, হেস্সতি সত্থু সাৰকো’.

১১৮. ‘‘তং সুত্ৰা মুদিতো হুত্ৰা, যাৰজীৰং তদা জিনং;

পচ্চযেহি উপট্ঠাসিং, মেত্তচিত্তো তথাগতং.

১১৯. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তুসিতং [তাৰতিংসং (স্যা.)] অগমাসহং.

১২০. ‘‘পচ্ছিমে চ ভৰে দানি, জাতো ৰিপ্পকুলে [পরিব্বাজকুলে (সী. স্যা. পী.)] অহং;

পচ্চাজাতো [সম্পত্তো চ (ক.)] যদা আসিং, জাতিযা সত্তৰস্সিকো.

১২১. ‘‘সব্বৰেদৰিদূ জাতো, ৰাদসত্থৰিসারদো;

ৰাদিস্সরো [ৰগ্গুস্সরো (স্যা. পী.)] চিত্তকথী, পরৰাদপ্পমদ্দনো.

১২২. ‘‘ৰঙ্গে জাতোতি ৰঙ্গীসো, ৰচনে ইস্সরোতি ৰা;

ৰঙ্গীসো ইতি মে নামং, অভৰী লোকসম্মতং.

১২৩. ‘‘যদাহং ৰিঞ্ঞুতং পত্তো, ঠিতো পঠমযোব্বনে;

তদা রাজগহে রম্মে, সারিপুত্তমহদ্দসং [মথদ্দসং (সী. পী.), চ অদ্দসং (স্যা.)].

পঞ্চৰীসতিমং ভাণৰারং.

১২৪. ‘‘পিণ্ডায ৰিচরন্তং তং, পত্তপাণিং সুসংৰুতং;

অলোলক্খিং মিতভাণিং, যুগমত্তং নিদক্খিতং [নিরিক্খতং (সী. পী.), উদিক্খতং (স্যা.)].

১২৫. ‘‘তং দিস্ৰা ৰিম্হিতো হুত্ৰা, অৰোচং মমনুচ্ছৰং [মননুচ্ছৰং (সী. স্যা.)];

কণিকারংৰ নিচিতং [কণিকারপরিচিতং (পী.), খণিকং ঠানরচিতং (সী.)], চিত্তং গাথাপদং অহং.

১২৬. ‘‘আচিক্খি সো মে সত্থারং, সম্বুদ্ধং লোকনাযকং;

তদা সো পণ্ডিতো ৰীরো, উত্তরিং [উত্তরং (সী. পী.)] সমৰোচ মে.

১২৭. ‘‘ৰিরাগসংহিতং ৰাক্যং, কত্ৰা দুদ্দসমুত্তমং;

ৰিচিত্তপটিভানেহি, তোসিতো তেন তাদিনা.

১২৮. ‘‘নিপচ্চ সিরসা পাদে, ‘পব্বাজেহী’তি মং ব্রৰি;

ততো মং স মহাপঞ্ঞো, বুদ্ধসেট্ঠমুপানযি.

১২৯. ‘‘নিপচ্চ সিরসা পাদে, নিসীদিং সত্থু সন্তিকে;

মমাহ ৰদতং সেট্ঠো, কচ্চি ৰঙ্গীস জানাসি [সচ্চং ৰঙ্গীস কচ্চি তে (স্যা.)].

১৩০. ‘‘কিঞ্চি সিপ্পন্তি তস্সাহং, ‘জানামী’তি চ অব্রৰিং;

মতসীসং ৰনচ্ছুদ্ধং, অপি বারসৰস্সিকং;

তৰ ৰিজ্জাৰিসেসেন, সচে সক্কোসি ৰাচয [ভাসয (সী. পী.)].

১৩১. ‘‘আমোতি মে পটিঞ্ঞাতে, তীণি সীসানি দস্সযি;

নিরযনরদেৰেসু, উপপন্নে অৰাচযিং.

১৩২. ‘‘তদা খীণাসৰস্সেৰ [পচ্চেকবুদ্ধস্স (সী. পী.)], সীসং দস্সেসি নাযকো;

ততোহং ৰিহতারব্ভো, পব্বজ্জং সমযাচিসং.

১৩৩. ‘‘পব্বজিত্ৰান সুগতং, সন্থৰামি তহিং তহিং;

ততো মং কব্বৰিত্তোসি [কৰিচিত্তোতি (স্যা. পী.)], উজ্ঝাযন্তিহ ভিক্খৰো.

১৩৪. ‘‘ততো ৰীমংসনত্থং মে, আহ বুদ্ধো ৰিনাযকো;

তক্কিকা পনিমা গাথা, ঠানসো পটিভন্তি তং.

১৩৫. ‘‘ন কব্বৰিত্তোহং ৰীর, ঠানসো পটিভন্তি মং;

তেন হি দানি ৰঙ্গীস, ঠানসো সন্থৰাহি মং.

১৩৬. ‘‘তদাহং সন্থৰিং ৰীরং, গাথাহি ইসিসত্তমং;

ঠানসো মে তদা তুট্ঠো, জিনো অগ্গে ঠপেসি মং.

১৩৭. ‘‘পটিভানেন চিত্তেন, অঞ্ঞেসমতিমঞ্ঞহং;

পেসলে তেন সংৰিগ্গো, অরহত্তমপাপুণিং.

১৩৮. ‘‘‘পটিভানৰতং অগ্গো, অঞ্ঞো কোচি ন ৰিজ্জতি;

যথাযং ভিক্খু ৰঙ্গীসো, এৰং ধারেথ ভিক্খৰো’.

১৩৯. ‘‘সতসহস্সে কতং কম্মং, ফলং দস্সেসি মে ইধ;

সুমুত্তো সরৰেগোৰ কিলেসে ঝাপযিং মম.

১৪০. ‘‘কিলেসা ঝাপিতা ময্হং…পে… ৰিহরামি অনাসৰো.

১৪১. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰঙ্গীসো থেরো ইমা গাথাযো

অভাসিত্থাতি.

ৰঙ্গীসত্থেরস্সাপদানং চতুত্থং.