২. কঙ্খারেৰতত্থেরঅপদানং

৩৪. ‘‘পদুমুত্তরো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

৩৫. ‘‘সীহহনু ব্রহ্মগিরো, হংসদুন্দুভিনিস্সনো [হংসদুন্দুভিনিস্সরো (সী.) … নিস্সৰনো (পী.) … সাৰনো (স্যা.)];

নাগৰিক্কন্তগমনো, চন্দসূরাদিকপ্পভো.

৩৬. ‘‘মহামতী মহাৰীরো, মহাঝাযী মহাবলো [মহাগতি (স্যা.), মহাহিতো (পী.)];

মহাকারুণিকো নাথো, মহাতমপনূদনো [মহাতমৰিধংসনো (স্যা.), মহাতমনিসূদনো (পী.)].

৩৭. ‘‘স কদাচি তিলোকগ্গো, ৰেনেয্যং ৰিনযং বহুং [ৰেনেয্যে ৰিনিযং বহূ (সী.)];

ধম্মং দেসেসি সম্বুদ্ধো, সত্তাসযৰিদূ মুনি.

৩৮. ‘‘ঝাযিং ঝানরতং ৰীরং, উপসন্তং অনাৰিলং;

ৰণ্ণযন্তো পরিসতিং, তোসেসি [তোসেতি (স্যা. পী. ক.)] জনতং জিনো.

৩৯. ‘‘তদাহং হংসৰতিযং, ব্রাহ্মণো ৰেদপারগূ;

ধম্মং সুত্ৰান মুদিতো, তং ঠানমভিপত্থযিং.

৪০. ‘‘তদা জিনো ৰিযাকাসি, সঙ্ঘমজ্ঝে ৰিনাযকো;

‘মুদিতো হোহি ত্ৰং ব্রহ্মে, লচ্ছসে তং মনোরথং.

৪১. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৪২. ‘‘‘তস্স ধম্মেসু দাযাদো, ওরসো ধম্মনিম্মিতো;

রেৰতো নাম নামেন, হেস্সতি সত্থু সাৰকো’.

৪৩. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৪৪. ‘‘পচ্ছিমে চ ভৰে দানি, জাতোহং কোলিযে পুরে;

খত্তিযে কুলসম্পন্নে, ইদ্ধে ফীতে মহদ্ধনে.

৪৫. ‘‘যদা কপিলৰত্থুস্মিং, বুদ্ধো ধম্মমদেসযি;

তদা পসন্নো সুগতে, পব্বজিং অনগারিযং.

৪৬. ‘‘কঙ্খা মে বহুলা আসি, কপ্পাকপ্পে তহিং তহিং;

সব্বং তং ৰিনযী বুদ্ধো, দেসেত্ৰা ধম্মমুত্তমং.

৪৭. ‘‘ততোহং তিণ্ণসংসারো, সদা ঝানসুখে রতো;

ৰিহরামি তদা বুদ্ধো, মং দিস্ৰা এতদব্রৰি.

৪৮. ‘‘‘যা কাচি কঙ্খা ইধ ৰা হুরং ৰা, সকৰেদিযা ৰা পরৰেদিযা ৰা;

যে ঝাযিনো তা পজহন্তি সব্বা, আতাপিনো ব্রহ্মচরিযং চরন্তা’.

৪৯. ‘‘সতসহস্সে কতং কম্মং, ফলং দস্সেসি মে ইধ;

সুমুত্তো সরৰেগোৰ কিলেসে ঝাপযিং মম.

৫০. ‘‘ততো ঝানরতং দিস্ৰা, বুদ্ধো লোকন্তগূ মুনি;

ঝাযীনং ভিক্খূনং অগ্গো, পঞ্ঞাপেতি মহামতি.

৫১. ‘‘কিলেসা ঝাপিতা ময্হং…পে… ৰিহরামি অনাসৰো.

৫২. ‘‘স্ৰাগতং ৰত মে আসি…পে… কতং বুদ্ধস্স সাসনং.

৫৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কঙ্খারেৰতো থেরো ইমা গাথাযো

অভাসিত্থাতি.

কঙ্খারেৰতত্থেরস্সাপদানং দুতিযং.