১. লকুণ্ডভদ্দিযত্থেরঅপদানং

১. ‘‘পদুমুত্তরো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

২. ‘‘তদাহং হংসৰতিযং, সেট্ঠিপুত্তো মহদ্ধনো;

জঙ্ঘাৰিহারং ৰিচরং, সঙ্ঘারামং অগচ্ছহং.

৩. ‘‘তদা সো লোকপজ্জোতো, ধম্মং দেসেসি নাযকো;

মঞ্জুস্সরানং পৰরং, সাৰকং অভিকিত্তযি.

৪. ‘‘তং সুত্ৰা মুদিতো হুত্ৰা, কারং কত্ৰা মহেসিনো;

ৰন্দিত্ৰা সত্থুনো পাদে, তং ঠানমভিপত্থযিং.

৫. ‘‘তদা বুদ্ধো ৰিযাকাসি, সঙ্ঘমজ্ঝে ৰিনাযকো;

‘অনাগতম্হি অদ্ধানে, লচ্ছসে তং মনোরথং.

৬. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৭. ‘‘‘তস্স ধম্মেসু দাযাদো, ওরসো ধম্মনিম্মিতো;

ভদ্দিযো নাম নামেন, হেস্সতি সত্থু সাৰকো’.

৮. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৯. ‘‘দ্ৰেনৰুতে ইতো কপ্পে, ফুস্সো উপ্পজ্জি নাযকো;

দুরাসদো দুপ্পসহো, সব্বলোকুত্তমো জিনো.

১০. ‘‘চরণেন চ সম্পন্নো, ব্রহা উজু পতাপৰা;

হিতেসী সব্বসত্তানং [সব্বপাণীনং (সী.)], বহুং মোচেসি বন্ধনা.

১১. ‘‘নন্দারামৰনে তস্স, অহোসিং ফুস্সকোকিলো [পুস্সকোকিলো (সী. স্যা.)];

গন্ধকুটিসমাসন্নে, অম্বরুক্খে ৰসামহং.

১২. ‘‘তদা পিণ্ডায গচ্ছন্তং, দক্খিণেয্যং জিনুত্তমং;

দিস্ৰা চিত্তং পসাদেত্ৰা, মঞ্জুনাভিনিকূজহং [মঞ্জুনাদেন কূজহং (সী. পী.)].

১৩. ‘‘রাজুয্যানং তদা গন্ত্ৰা, সুপক্কং কনকত্তচং;

অম্বপিণ্ডং গহেত্ৰান, সম্বুদ্ধস্সোপনামযিং.

১৪. ‘‘তদা মে চিত্তমঞ্ঞায, মহাকারুণিকো জিনো;

উপট্ঠাকস্স হত্থতো, পত্তং পগ্গণ্হি নাযকো.

১৫. ‘‘অদাসিং হট্ঠচিত্তোহং [তুট্ঠচিত্তোহং (সী.)], অম্বপিণ্ডং মহামুনে;

পত্তে পক্খিপ্প পক্খেহি, পঞ্জলিং [পক্খেহঞ্জলিং (সী.)] কত্ৰান মঞ্জুনা.

১৬. ‘‘সরেন রজনীযেন, সৰনীযেন ৰগ্গুনা;

ৰস্সন্তো বুদ্ধপূজত্থং, নীল়ং [নিদ্দং (স্যা. পী.)] গন্ত্ৰা নিপজ্জহং.

১৭. ‘‘তদা মুদিতচিত্তং মং, বুদ্ধপেমগতাসযং;

সকুণগ্ঘি উপাগন্ত্ৰা, ঘাতযী দুট্ঠমানসো.

১৮. ‘‘ততো চুতোহং তুসিতে, অনুভোত্ৰা মহাসুখং;

মনুস্সযোনিমাগচ্ছিং, তস্স কম্মস্স ৰাহসা.

১৯. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

২০. ‘‘সাসনং জোতযিত্ৰা সো, অভিভুয্য কুতিত্থিযে;

ৰিনযিত্ৰান ৰেনেয্যে, নিব্বুতো সো সসাৰকো.

২১. ‘‘নিব্বুতে তম্হি লোকগ্গে, পসন্না জনতা বহূ;

পূজনত্থায বুদ্ধস্স, থূপং কুব্বন্তি সত্থুনো.

২২. ‘‘‘সত্তযোজনিকং থূপং, সত্তরতনভূসিতং;

করিস্সাম মহেসিস্স’, ইচ্চেৰং মন্তযন্তি তে.

২৩. ‘‘কিকিনো কাসিরাজস্স, তদা সেনায নাযকো;

হুত্ৰাহং অপ্পমাণস্স, পমাণং চেতিযে ৰদিং.

২৪. ‘‘তদা তে মম ৰাক্যেন, চেতিযং যোজনুগ্গতং;

অকংসু নরৰীরস্স, নানারতনভূসিতং.

২৫. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

২৬. ‘‘পচ্ছিমে চ ভৰে দানি, জাতো সেট্ঠিকুলে অহং;

সাৰত্থিযং পুরৰরে, ইদ্ধে ফীতে মহদ্ধনে.

২৭. ‘‘পুরপ্পৰেসে সুগতং, দিস্ৰা ৰিম্হিতমানসো;

পব্বজিত্ৰান ন চিরং, অরহত্তমপাপুণিং.

২৮. ‘‘চেতিযস্স পমাণং যং, অকরিং তেন কম্মুনা;

লকুণ্ডকসরীরোহং, জাতো পরিভৰারহো.

২৯. ‘‘সরেন মধুরেনাহং, পূজিত্ৰা ইসিসত্তমং;

মঞ্জুস্সরানং ভিক্খূনং, অগ্গত্তমনুপাপুণিং.

৩০. ‘‘ফলদানেন বুদ্ধস্স, গুণানুস্সরণেন চ;

সামঞ্ঞফলসম্পন্নো, ৰিহরামি অনাসৰো.

৩১. ‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

৩২. ‘‘স্ৰাগতং ৰত মে আসি, বুদ্ধসেট্ঠস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৩৩. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা লকুণ্ডভদ্দিযো থেরো ইমা গাথাযো

অভাসিত্থাতি.

লকুণ্ডভদ্দিযত্থেরস্সাপদানং পঠমং.