৪. দব্বমল্লপুত্তত্থেরঅপদানং

১০৮. ‘‘পদুমুত্তরো নাম জিনো, সব্বলোকৰিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

১০৯. ‘‘ওৰাদকো ৰিঞ্ঞাপকো, তারকো সব্বপাণিনং;

দেসনাকুসলো বুদ্ধো, তারেসি জনতং বহুং.

১১০. ‘‘অনুকম্পকো কারুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি [পতিট্ঠহি (স্যা. ক.)].

১১১. ‘‘এৰং নিরাকুলং আসি, সুঞ্ঞতং [সুঞ্ঞকং (সী.) এৰমুপরিপি] তিত্থিযেহি চ;

ৰিচিত্তং অরহন্তেহি, ৰসীভূতেহি তাদিভি.

১১২. ‘‘রতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৰরলক্খণো.

১১৩. ‘‘ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

১১৪. ‘‘তদাহং হংসৰতিযং, সেট্ঠিপুত্তো মহাযসো;

উপেত্ৰা লোকপজ্জোতং, অস্সোসিং ধম্মদেসনং.

১১৫. ‘‘সেনাসনানি ভিক্খূনং, পঞ্ঞাপেন্তং সসাৰকং;

কিত্তযন্তস্স ৰচনং, সুণিত্ৰা মুদিতো অহং.

১১৬. ‘‘অধিকারং সসঙ্ঘস্স, কত্ৰা তস্স মহেসিনো;

নিপচ্চ সিরসা পাদে, তং ঠানমভিপত্থযিং.

১১৭. ‘‘তদাহ স মহাৰীরো, মম কম্মং পকিত্তযং;

‘যো সসঙ্ঘমভোজেসি, সত্তাহং লোকনাযকং.

১১৮. ‘‘‘সোযং কমলপত্তক্খো, সীহংসো কনকত্তচো;

মম পাদমূলে নিপতি [পতিতো (পী.)], পত্থযং ঠানমুত্তমং.

১১৯. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১২০. ‘‘‘সাৰকো তস্স বুদ্ধস্স, দব্বো নামেন ৰিস্সুতো;

সেনাসনপঞ্ঞাপকো, অগ্গো হেস্সতিযং তদা’.

১২১. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১২২. ‘‘সতানং তীণিক্খত্তুঞ্চ, দেৰরজ্জমকারযিং;

সতানং পঞ্চক্খত্তুঞ্চ, চক্কৰত্তী অহোসহং.

১২৩. ‘‘পদেসরজ্জং ৰিপুলং, গণনাতো অসঙ্খিযং;

সব্বত্থ সুখিতো আসিং, তস্স কম্মস্স ৰাহসা.

১২৪. ‘‘একনৰুতিতো কপ্পে, ৰিপস্সী নাম নাযকো;

উপ্পজ্জি চারুদস্সনো [চারুনযনো (সী. স্যা. পী.)], সব্বধম্মৰিপস্সকো.

১২৫. ‘‘দুট্ঠচিত্তো উপৰদিং, সাৰকং তস্স তাদিনো;

সব্বাসৰপরিক্খীণং, সুদ্ধোতি চ ৰিজানিয.

১২৬. ‘‘তস্সেৰ নরৰীরস্স, সাৰকানং মহেসিনং;

সলাকঞ্চ গহেত্ৰান [সলাকং পগ্গহেত্ৰান (সী. পী.)], খীরোদনমদাসহং.

১২৭. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

১২৮. ‘‘সাসনং জোতযিত্ৰান, অভিভুয্য কুতিত্থিযে;

ৰিনেয্যে ৰিনযিত্ৰাৰ, নিব্বুতো সো সসাৰকো.

১২৯. ‘‘সসিস্সে নিব্বুতে নাথে, অত্থমেন্তম্হি সাসনে;

দেৰা কন্দিংসু সংৰিগ্গা, মুত্তকেসা রুদম্মুখা.

১৩০. ‘‘নিব্বাযিস্সতি ধম্মক্খো, ন পস্সিস্সাম সুব্বতে;

ন সুণিস্সাম সদ্ধম্মং, অহো নো অপ্পপুঞ্ঞতা.

১৩১. ‘‘তদাযং পথৰী সব্বা, অচলা সা চলাচলা [চলাচলী (সী.), পুলাপুলী (স্যা.)];

সাগরো চ সসোকোৰ, ৰিনদী করুণং গিরং.

১৩২. ‘‘চতুদ্দিসা দুন্দুভিযো, নাদযিংসু অমানুসা;

সমন্ততো অসনিযো, ফলিংসু চ ভযাৰহা.

১৩৩. ‘‘উক্কা পতিংসু নভসা, ধূমকেতু চ দিস্সতি;

সধূমা জালৰট্টা চ [সব্বথলজসত্তা চ (সী.)], রৰিংসু করুণং মিগা.

১৩৪. ‘‘উপ্পাদে দারুণে দিস্ৰা, সাসনত্থঙ্গসূচকে;

সংৰিগ্গা ভিক্খৰো সত্ত, চিন্তযিম্হ মযং তদা.

১৩৫. ‘‘সাসনেন ৰিনাম্হাকং, জীৰিতেন অলং মযং;

পৰিসিত্ৰা মহারঞ্ঞং, যুঞ্জাম জিনসাসনং.

১৩৬. ‘‘অদ্দসম্হ তদারঞ্ঞে, উব্বিদ্ধং সেলমুত্তমং;

নিস্সেণিযা তমারুয্হ, নিস্সেণিং পাতযিম্হসে.

১৩৭. ‘‘তদা ওৰদি নো থেরো, বুদ্ধুপ্পাদো সুদুল্লভো;

সদ্ধাতিদুল্লভা লদ্ধা, থোকং সেসঞ্চ সাসনং.

১৩৮. ‘‘নিপতন্তি খণাতীতা, অনন্তে দুক্খসাগরে;

তস্মা পযোগো কত্তব্বো, যাৰ ঠাতি মুনে মতং [যাৰ তিট্ঠতি সাসনং (স্যা.)].

১৩৯. ‘‘অরহা আসি সো থেরো, অনাগামী তদানুগো;

সুসীলা ইতরে যুত্তা, দেৰলোকং অগম্হসে.

১৪০. ‘‘নিব্বুতো তিণ্ণসংসারো, সুদ্ধাৰাসে চ এককো;

অহঞ্চ পক্কুসাতি চ, সভিযো বাহিযো তথা.

১৪১. ‘‘কুমারকস্সপো চেৰ, তত্থ তত্থূপগা মযং;

সংসারবন্ধনা মুত্তা, গোতমেনানুকম্পিতা.

১৪২. ‘‘মল্লেসু কুসিনারাযং, জাতো গব্ভেৰ মে সতো;

মাতা মতা চিতারুল়্হা, ততো নিপ্পতিতো অহং.

১৪৩. ‘‘পতিতো দব্বপুঞ্জম্হি, ততো দব্বোতি ৰিস্সুতো;

ব্রহ্মচারীবলেনাহং, ৰিমুত্তো সত্তৰস্সিকো.

১৪৪. ‘‘খীরোদনবলেনাহং, পঞ্চহঙ্গেহুপাগতো;

খীণাসৰোপৰাদেন, পাপেহি বহুচোদিতো.

১৪৫. ‘‘উভো পুঞ্ঞঞ্চ পাপঞ্চ, ৰীতিৰত্তোম্হি দানিহং;

পত্ৰান পরমং সন্তিং, ৰিহরামি অনাসৰো.

১৪৬. ‘‘সেনাসনং পঞ্ঞাপযিং, হাসযিত্ৰান সুব্বতে;

জিনো তস্মিং গুণে তুট্ঠো, এতদগ্গে ঠপেসি মং.

১৪৭. ‘‘কিলেসা ঝাপিতা ময্হং…পে… ৰিহরামি অনাসৰো.

১৪৮. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৪৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা দব্বমল্লপুত্তো থেরো ইমা গাথাযো

অভাসিত্থাতি.

দব্বমল্লপুত্তত্থেরস্সাপদানং চতুত্থং.