৫. কুমারকস্সপত্থেরঅপদানং

১৫০. ‘‘ইতো সতসহস্সম্হি, কপ্পে উপ্পজ্জি নাযকো;

সব্বলোকহিতো ৰীরো, পদুমুত্তরনামকো.

১৫১. ‘‘তদাহং ব্রাহ্মণো হুত্ৰা, ৰিস্সুতো ৰেদপারগূ;

দিৰাৰিহারং ৰিচরং, অদ্দসং লোকনাযকং.

১৫২. ‘‘চতুসচ্চং পকাসেন্তং, বোধযন্তং সদেৰকং;

ৰিচিত্তকথিকানগ্গং, ৰণ্ণযন্তং মহাজনে.

১৫৩. ‘‘তদা মুদিতচিত্তোহং, নিমন্তেত্ৰা তথাগতং;

নানারত্তেহি ৰত্থেহি, অলঙ্করিত্ৰান মণ্ডপং.

১৫৪. ‘‘নানারতনপজ্জোতং, সসঙ্ঘং ভোজযিং তহিং;

ভোজযিত্ৰান সত্তাহং, নানগ্গরসভোজনং.

১৫৫. ‘‘নানাচিত্তেহি [নানাৰণ্ণেহি (সী.)] পুপ্ফেহি, পূজযিত্ৰা সসাৰকং [মহাৰীরং (ক.)];

নিপচ্চ পাদমূলম্হি, তং ঠানং পত্থযিং অহং.

১৫৬. ‘‘তদা মুনিৰরো আহ, করুণেকরসাসযো [করুণো করুণালযো (স্যা.)];

‘পস্সথেতং দিজৰরং, পদুমাননলোচনং.

১৫৭. ‘‘‘পীতিপামোজ্জবহুলং, সমুগ্গততনূরুহং;

হাসম্হিতৰিসালক্খং, মম সাসনলালসং.

১৫৮. ‘‘‘পতিতং পাদমূলে মে, একাৰত্থসুমানসং [একৰত্থং সুমানসং (স্যা. ক.)];

এস পত্থেতি তং ঠানং, ৰিচিত্তকথিকত্তনং [ৰিচিত্তকথিকত্তদং (সী. পী.)].

১৫৯. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১৬০. ‘‘‘তস্স ধম্মেসু দাযাদো, ওরসো ধম্মনিম্মিতো;

কুমারকস্সপো নাম, হেস্সতি সত্থু সাৰকো.

১৬১. ‘‘‘ৰিচিত্তপুপ্ফদুস্সানং, রতনানঞ্চ ৰাহসা;

ৰিচিত্তকথিকানং সো, অগ্গতং পাপুণিস্সতি’.

১৬২. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১৬৩. ‘‘পরিব্ভমং ভৰাভৰে [ভৰাকাসে (সী. পী.)], রঙ্গমজ্ঝে যথা নটো;

সাখমিগত্রজো হুত্ৰা, মিগিযা কুচ্ছিমোক্কমিং.

১৬৪. ‘‘তদা মযি কুচ্ছিগতে, ৰজ্ঝৰারো উপট্ঠিতো;

সাখেন চত্তা মে মাতা, নিগ্রোধং সরণং গতা.

১৬৫. ‘‘তেন সা মিগরাজেন, মরণা পরিমোচিতা;

পরিচ্চজিত্ৰা সপাণং [সংপাণং (সী. পী.)], মমেৰং ওৰদী তদা.

১৬৬. ‘‘‘নিগ্রোধমেৰ সেৰেয্য, ন সাখমুপসংৰসে;

নিগ্রোধস্মিং মতং সেয্যো, যঞ্চে সাখম্হি জীৰিতং’.

১৬৭. ‘‘তেনানুসিট্ঠা মিগযূথপেন, অহঞ্চ মাতা চ তথেতরে চ [চিতরে চ (স্যা.), তস্সোৰাদেন (পী.), চিতরে চ তস্সোৰাদং (ক.)];

আগম্ম রম্মং তুসিতাধিৰাসং, গতা পৰাসং সঘরং যথেৰ.

১৬৮. ‘‘পুনো কস্সপৰীরস্স, অত্থমেন্তম্হি সাসনে;

আরুয্হ সেলসিখরং, যুঞ্জিত্ৰা জিনসাসনং.

১৬৯. ‘‘ইদানাহং রাজগহে, জাতো সেট্ঠিকুলে অহুং;

আপন্নসত্তা মে মাতা, পব্বজি অনগারিযং.

১৭০. ‘‘সগব্ভং তং ৰিদিত্ৰান, দেৰদত্তমুপানযুং;

সো অৰোচ ‘ৰিনাসেথ, পাপিকং ভিক্খুনিং ইমং’.

১৭১. ‘‘ইদানিপি মুনিন্দেন, জিনেন অনুকম্পিতা;

সুখিনী অজনী ময্হং, মাতা ভিক্খুনুপস্সযে.

১৭২. ‘‘তং ৰিদিত্ৰা মহীপালো, কোসলো মং অপোসযি;

কুমারপরিহারেন, নামেনাহঞ্চ কস্সপো.

১৭৩. ‘‘মহাকস্সপমাগম্ম, অহং কুমারকস্সপো;

ৰম্মিকসদিসং কাযং, সুত্ৰা বুদ্ধেন দেসিতং.

১৭৪. ‘‘ততো চিত্তং ৰিমুচ্চি মে, অনুপাদায সব্বসো;

পাযাসিং দমযিত্ৰাহং, এতদগ্গমপাপুণিং.

১৭৫. ‘‘কিলেসা ঝাপিতা ময্হং…পে… ৰিহরামি অনাসৰো.

১৭৬. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৭৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুমারকস্সপো থেরো ইমা গাথাযো

অভাসিত্থাতি.

কুমারকস্সপত্থেরস্সাপদানং পঞ্চমং.

চতুৰীসতিমং ভাণৰারং.