১০. মোঘরাজত্থেরঅপদানং

৩২৭. ‘‘পদুমুত্তরো নাম জিনো, সব্বলোকৰিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

৩২৮. ‘‘ওৰাদকো ৰিঞ্ঞাপকো, তারকো সব্বপাণিনং;

দেসনাকুসলো বুদ্ধো, তারেসি জনতং বহুং.

৩২৯. ‘‘অনুকম্পকো কারুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

৩৩০. ‘‘এৰং নিরাকুলং আসি, সুঞ্ঞতং তিত্থিযেহি চ;

ৰিচিত্তং অরহন্তেহি, ৰসীভূতেহি তাদিভি.

৩৩১. ‘‘রতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৰরলক্খণো.

৩৩২. ‘‘ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

৩৩৩. ‘‘তদাহং হংসৰতিযং, কুলে অঞ্ঞতরে অহুং;

পরকম্মাযনে যুত্তো, নত্থি মে কিঞ্চি সংধনং.

৩৩৪. ‘‘পটিক্কমনসালাযং, ৰসন্তো কতভূমিযং;

অগ্গিং উজ্জালযিং তত্থ, দল়্হং কণ্হাসি সা [কণ্হা সিযা (সী. পী.), ডয্হকণ্হা সিলা (স্যা.)] হী.

৩৩৫. ‘‘তদা পরিসতিং নাথো, চতুসচ্চপকাসকো;

সাৰকং সম্পকিত্তেসি, লূখচীৰরধারকং.

৩৩৬. ‘‘তস্স তম্হি গুণে তুট্ঠো, পণিপচ্চ [পতিপজ্জ (স্যা.)] তথাগতং;

লূখচীৰরধারগ্গং, পত্থযিং ঠানমুত্তমং.

৩৩৭. ‘‘তদা অৰোচ ভগৰা, সাৰকে পদুমুত্তরো;

‘পস্সথেতং পুরিসকং, কুচেলং তনুদেহকং.

৩৩৮. ‘‘‘পীতিপ্পসন্নৰদনং, সদ্ধাধনসমন্ৰিতং [সদ্ধাস্নেহসমন্ৰতং (ক.)];

উদগ্গতনুজং হট্ঠং, অচলং সালপিণ্ডিতং.

৩৩৯. ‘‘‘এসো পত্থেতি তং ঠানং, সচ্চসেনস্স ভিক্খুনো;

লূখচীৰরধারিস্স, তস্স ৰণ্ণসিতাসযো [ৰণ্ণগতাসযো (সী. স্যা. পী.)].

৩৪০. ‘‘তং সুত্ৰা মুদিতো হুত্ৰা, নিপচ্চ সিরসা জিনং;

যাৰজীৰং সুভং কম্মং, করিত্ৰা জিনসাসনে.

৩৪১. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসূপগো অহং.

৩৪২. ‘‘পটিক্কমনসালাযং, ভূমিদাহককম্মুনা;

সমসহস্সং নিরযে, অদয্হিং ৰেদনাট্টিতো.

৩৪৩. ‘‘তেন কম্মাৰসেসেন, পঞ্চ জাতিসতানিহং;

মনুস্সো কুলজো হুত্ৰা, জাতিযা লক্খণঙ্কিতো.

৩৪৪. ‘‘পঞ্চ জাতিসতানেৰ, কুট্ঠরোগসমপ্পিতো;

মহাদুক্খং অনুভৰিং, তস্স কম্মস্স ৰাহসা.

৩৪৫. ‘‘ইমস্মিং ভদ্দকে কপ্পে, উপরিট্ঠং যসস্সিনং;

পিণ্ডপাতেন তপ্পেসিং, পসন্নমানসো অহং.

৩৪৬. ‘‘তেন কম্মৰিসেসেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৩৪৭. ‘‘পচ্ছিমে ভৰে সম্পত্তে, অজাযিং খত্তিযে কুলে;

পিতুনো অচ্চযেনাহং, মহারজ্জসমপ্পিতো.

৩৪৮. ‘‘কুট্ঠরোগাধিভূতোহং, ন রতিং ন সুখং লভে;

মোঘং রজ্জং সুখং যস্মা, মোঘরাজা ততো অহং.

৩৪৯. ‘‘কাযস্স দোসং দিস্ৰান, পব্বজিং অনগারিযং;

বাৰরিস্স দিজগ্গস্স, সিস্সত্তং অজ্ঝুপাগমিং.

৩৫০. ‘‘মহতা পরিৰারেন, উপেচ্চ নরনাযকং;

অপুচ্ছিং নিপুণং পঞ্হং, তং ৰীরং ৰাদিসূদনং.

৩৫১. ‘‘‘অযং লোকো পরো লোকো, ব্রহ্মলোকো সদেৰকো;

দিট্ঠিং নো [দিট্ঠা নো (সী.), দিট্ঠং নো (পী.), দিট্ঠিং তে (স্যা.)] নাভিজানামি, গোতমস্স যসস্সিনো.

৩৫২. ‘‘‘এৰাভিক্কন্তদস্সাৰিং, অত্থি পঞ্হেন আগমং;

কথং লোকং অৰেক্খন্তং, মচ্চুরাজা ন পস্সতি’.

৩৫৩. ‘‘‘সুঞ্ঞতো লোকং অৰেক্খস্সু, মোঘরাজ সদা সতো;

অত্তানুদিট্ঠিং উহচ্চ, এৰং মচ্চুতরো সিযা.

৩৫৪. ‘‘‘এৰং লোকং অৰেক্খন্তং, মচ্চুরাজা ন পস্সতি’;

ইতি মং অভণি বুদ্ধো, সব্বরোগতিকিচ্ছকো.

৩৫৫. ‘‘সহ গাথাৰসানেন, কেসমস্সুৰিৰজ্জিতো;

কাসাৰৰত্থৰসনো, আসিং ভিক্খু তথারহা.

৩৫৬. ‘‘সঙ্ঘিকেসু ৰিহারেসু, ন ৰসিং রোগপীল়িতো;

মা ৰিহারো পদুস্সীতি, ৰাতরোগেহি পীল়িতো [ৰাচাযাভিসুপীল়িতো (স্যা. পী.), ৰাতরোগী সুপীল়িতো (ক.)].

৩৫৭. ‘‘সঙ্কারকূটা আহিত্ৰা, সুসানা রথিকাহি চ;

ততো সঙ্ঘাটিং করিত্ৰা, ধারযিং লূখচীৰরং.

৩৫৮. ‘‘মহাভিসক্কো তস্মিং মে, গুণে তুট্ঠো ৰিনাযকো;

লূখচীৰরধারীনং, এতদগ্গে ঠপেসি মং.

৩৫৯. ‘‘পুঞ্ঞপাপপরিক্খীণো, সব্বরোগৰিৰজ্জিতো;

সিখীৰ অনুপাদানো, নিব্বাযিস্সমনাসৰো.

৩৬০. ‘‘কিলেসা ঝাপিতা ময্হং…পে… ৰিহরামি অনাসৰো.

৩৬১. ‘‘স্ৰাগতং ৰত মে আসি…পে… কতং বুদ্ধস্স সাসনং.

৩৬২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মোঘরাজা থেরো ইমা গাথাযো

অভাসিত্থাতি.

মোঘরাজত্থেরস্সাপদানং দসমং.

কচ্চাযনৰগ্গো চতুপঞ্ঞাসমো.