৮. চঙ্কমনদাযকত্থেরঅপদানং

৯৩. ‘‘অত্থদস্সিস্স মুনিনো, লোকজেট্ঠস্স তাদিনো;

ইট্ঠকাহি চিনিত্ৰান, চঙ্কমং কারযিং অহং.

৯৪. ‘‘উচ্চতো পঞ্চরতনং, চঙ্কমং সাধুমাপিতং;

আযামতো হত্থসতং, ভাৰনীয্যং মনোরমং.

৯৫. ‘‘পটিগ্গহেসি ভগৰা, অত্থদস্সী নরুত্তমো;

হত্থেন পুলিনং গয্হ, ইমা গাথা অভাসথ.

৯৬. ‘‘‘ইমিনা পুলিনদানেন, চঙ্কমং সুকতেন চ;

সত্তরতনসম্পন্নং, পুলিনং অনুভোস্সতি.

৯৭. ‘‘‘তীণি কপ্পানি দেৰেসু, দেৰরজ্জং করিস্সতি;

অনুভোস্সতি সম্পত্তিং, অচ্ছরাহি পুরক্খতো.

৯৮. ‘‘‘মনুস্সলোকমাগন্ত্ৰা, রাজা রট্ঠে ভৰিস্সতি;

তিক্খত্তুং চক্কৰত্তী চ, মহিযা সো ভৰিস্সতি’.

৯৯. ‘‘অট্ঠারসে কপ্পসতে, যং কম্মমকরিং তদা;

দুগ্গতিং নাভিজানামি, চঙ্কমস্স ইদং ফলং.

১০০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চঙ্কমনদাযকো থেরো ইমা গাথাযো অভাসিত্থাতি.

চঙ্কমনদাযকত্থেরস্সাপদানং অট্ঠমং.