৯. সুভদ্দত্থেরঅপদানং

১০১. ‘‘পদুমুত্তরো লোকৰিদূ, আহুতীনং পটিগ্গহো;

জনতং উদ্ধরিত্ৰান, নিব্বাযতি মহাযসো.

১০২. ‘‘নিব্বাযন্তে চ সম্বুদ্ধে, দসসহস্সি কম্পথ;

জনকাযো মহা আসি, দেৰা সন্নিপতুং তদা.

১০৩. ‘‘চন্দনং পূরযিত্ৰান, তগরামল্লিকাহি চ;

হট্ঠো হট্ঠেন চিত্তেন, আরোপযিং [আলেপেসিং (সী.), আরোপেসিং (স্যা.)] নরুত্তমং.

১০৪. ‘‘মম সঙ্কপ্পমঞ্ঞায, সত্থা লোকে অনুত্তরো;

নিপন্নকোৰ সম্বুদ্ধো, ইমা গাথা অভাসথ.

১০৫. ‘‘‘যো মে পচ্ছিমকে কালে, গন্ধমালেন [গন্ধমল্লেন (স্যা. ক.) নপুংসকেকত্তং মনসিকাতব্বং] ছাদযি;

তমহং কিত্তযিস্সামি, সুণাথ মম ভাসতো.

১০৬. ‘‘‘ইতো চুতো অযং পোসো, তুসিতকাযং গমিস্সতি;

তত্থ রজ্জং করিত্ৰান, নিম্মানং সো গমিস্সতি.

১০৭. ‘‘‘এতেনেৰ উপাযেন, দত্ৰা মালং [মল্যং (সী.), মল্লং (স্যা. ক.)] ৰরুত্তমং;

সককম্মাভিরদ্ধো সো, সম্পত্তিং অনুভোস্সতি.

১০৮. ‘‘‘পুনাপি তুসিতে কাযে, নিব্বত্তিস্সতিযং নরো;

তম্হা কাযা চৰিত্ৰান, মনুস্সত্তং গমিস্সতি.

১০৯. ‘‘‘সক্যপুত্তো মহানাগো, অগ্গো লোকে সদেৰকে;

বোধযিত্ৰা বহূ সত্তে, নিব্বাযিস্সতি চক্খুমা.

১১০. ‘‘‘তদা সোপগতো সন্তো, সুক্কমূলেন চোদিতো;

উপসঙ্কম্ম সম্বুদ্ধং, পঞ্হং পুচ্ছিস্সতি তদা.

১১১. ‘‘‘হাসযিত্ৰান সম্বুদ্ধো, সব্বঞ্ঞূ লোকনাযকো;

পুঞ্ঞকম্মং পরিঞ্ঞায, সচ্চানি ৰিৰরিস্সতি.

১১২. ‘‘‘আরদ্ধো চ অযং পঞ্হো, তুট্ঠো একগ্গমানসো;

সত্থারং অভিৰাদেত্ৰা, পব্বজ্জং যাচযিস্সতি.

১১৩. ‘‘‘পসন্নমানসং দিস্ৰা, সককম্মেন তোসিতং;

পব্বাজেস্সতি সো বুদ্ধো, অগ্গমগ্গস্স কোৰিদো.

১১৪. ‘‘‘ৰাযমিত্ৰানযং পোসো, সম্মাসম্বুদ্ধসাসনে;

সব্বাসৰে পরিঞ্ঞায, নিব্বাযিস্সতিনাসৰো’.

পঞ্চমভাণৰারং.

১১৫. ‘‘পুব্বকম্মেন সংযুত্তো, একগ্গো সুসমাহিতো;

বুদ্ধস্স ওরসো পুত্তো, ধম্মজোম্হি সুনিম্মিতো.

১১৬. ‘‘ধম্মরাজং উপগম্ম, অপুচ্ছিং পঞ্হমুত্তমং;

কথযন্তো চ মে পঞ্হং, ধম্মসোতং উপানযি.

১১৭. ‘‘তস্সাহং ধম্মমঞ্ঞায, ৰিহাসিং সাসনে রতো;

সব্বাসৰে পরিঞ্ঞায, ৰিহরামি অনাসৰো.

১১৮. ‘‘সতসহস্সিতো কপ্পে, জলজুত্তমনাযকো;

নিব্বাযি অনুপাদানো, দীপোৰ তেলসঙ্খযা.

১১৯. ‘‘সত্তযোজনিকং আসি, থূপঞ্চ রতনামযং;

ধজং তত্থ অপূজেসিং, সব্বভদ্দং মনোরমং.

১২০. ‘‘কস্সপস্স চ বুদ্ধস্স, তিস্সো নামগ্গসাৰকো;

পুত্তো মে ওরসো আসি, দাযাদো জিনসাসনে.

১২১. ‘‘তস্স হীনেন মনসা, ৰাচং ভাসিং অভদ্দকং;

তেন কম্মৰিপাকেন, পচ্ছা মে আসি ভদ্দকং [পচ্ছিমে অদ্দসং জিনং (সী.)].

১২২. ‘‘উপৰত্তনে সালৰনে, পচ্ছিমে সযনে মুনি;

পব্বাজেসি মহাৰীরো, হিতো কারুণিকো জিনো.

১২৩. ‘‘অজ্জেৰ দানি পব্বজ্জা, অজ্জেৰ উপসম্পদা;

অজ্জেৰ পরিনিব্বানং, সম্মুখা দ্ৰিপদুত্তমে.

১২৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুভদ্দো থেরো ইমা গাথাযো অভাসিত্থাতি.

সুভদ্দত্থেরস্সাপদানং নৰমং.