৪. সন্নিট্ঠাপকত্থেরঅপদানং

৭০. ‘‘অরঞ্ঞে কুটিকং কত্ৰা, ৰসামি পব্বতন্তরে;

লাভালাভেন সন্তুট্ঠো, যসেন অযসেন চ.

৭১. ‘‘পদুমুত্তরো লোকৰিদূ, আহুতীনং পটিগ্গহো;

ৰসীসতসহস্সেহি [ভিক্খুসতসহস্সেহি (স্যা.)], আগচ্ছি মম সন্তিকং.

৭২. ‘‘উপাগতং মহানাগং [মহাৰীরং (সী.)], জলজুত্তমনামকং;

তিণসন্থরং [তিণত্থরং (ক.)] পঞ্ঞাপেত্ৰা, অদাসিং সত্থুনো অহং.

৭৩. ‘‘পসন্নচিত্তো সুমনো, আমণ্ডং পানীযঞ্চহং;

অদাসিং উজুভূতস্স, ৰিপ্পসন্নেন চেতসা.

৭৪. ‘‘সতসহস্সিতো কপ্পে [সতসহস্সে ইতো কপ্পে (সী.)], যং দানমদদিং তদা;

দুগ্গতিং নাভিজানামি, আমণ্ডস্স ইদং ফলং.

৭৫. ‘‘একতালীসকপ্পম্হি, একো আসিং অরিন্দমো;

সত্তরতনসম্পন্নো, চক্কৰত্তী মহব্বলো.

৭৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সন্নিট্ঠাপকো [সন্নিধাপকো (সী.)] থেরো ইমা গাথাযো অভাসিত্থাতি.

সন্নিট্ঠাপকত্থেরস্সাপদানং চতুত্থং.