৫. পঞ্চহত্থিযত্থেরঅপদানং

৭৭. ‘‘সুমেধো নাম সম্বুদ্ধো, গচ্ছতে অন্তরাপণে;

ওক্খিত্তচক্খু [খিত্তচক্খু (ক. সী. ক.)] মিতভাণী, সতিমা সংৰুতিন্দ্রিযো.

৭৮. ‘‘পঞ্চ উপ্পলহত্থানি, আৰেল়ত্থং অহংসু মে;

তেন বুদ্ধং অপূজেসিং, পসন্নো সেহি পাণিভি.

৭৯. ‘‘আরোপিতা চ তে পুপ্ফা, ছদনং অস্সু সত্থুনো;

সমাধিংসু [সংসাৰিংসু (সী.)] মহানাগং, সিস্সা আচরিযং যথা.

৮০. ‘‘তিংসকপ্পসহস্সম্হি, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৮১. ‘‘ইতো ৰীসকপ্পসতে, অহেসুং পঞ্চ খত্তিযা;

হত্থিযা নাম নামেন, চক্কৰত্তী মহব্বলা.

৮২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পঞ্চহত্থিযো থেরো ইমা গাথাযো অভাসিত্থাতি.

পঞ্চহত্থিযত্থেরস্সাপদানং পঞ্চমং.