১. ভাগিনেয্যুপালিত্থেরঅপদানং

১. ‘‘খীণাসৰসহস্সেহি, পরিৰুতো [পরেতো (ক. অট্ঠ)] লোকনাযকো;

ৰিৰেকমনুযুত্তো সো, গচ্ছতে পটিসল্লিতুং.

২. ‘‘অজিনেন নিৰত্থোহং, তিদণ্ডপরিধারকো;

ভিক্খুসঙ্ঘপরিব্যূল়্হং, অদ্দসং লোকনাযকং.

৩. ‘‘একংসং অজিনং কত্ৰা, সিরে কত্ৰান অঞ্জলিং;

সম্বুদ্ধং অভিৰাদেত্ৰা, সন্থৰিং লোকনাযকং.

৪. ‘‘যথাণ্ডজা চ সংসেদা, ওপপাতী জলাবুজা;

কাকাদিপক্খিনো সব্বে, অন্তলিক্খচরা সদা.

৫. ‘‘যে কেচি পাণভূতত্থি, সঞ্ঞিনো ৰা অসঞ্ঞিনো;

সব্বে তে তৰ ঞাণম্হি, অন্তো হোন্তি সমোগধা.

৬. ‘‘গন্ধা চ পব্বতেয্যা যে, হিমৰন্তনগুত্তমে;

সব্বে তে তৰ সীলম্হি, কলাযপি ন যুজ্জরে.

৭. ‘‘মোহন্ধকারপক্খন্দো, অযং লোকো সদেৰকো;

তৰ ঞাণম্হি জোতন্তে, অন্ধকারা ৰিধংসিতা.

৮. ‘‘যথা অত্থঙ্গতে সূরিযে, হোন্তি সত্তা তমোগতা;

এৰং বুদ্ধে অনুপ্পন্নে, হোতি লোকো তমোগতো.

৯. ‘‘যথোদযন্তো আদিচ্চো, ৰিনোদেতি তমং সদা;

তথেৰ ত্ৰং বুদ্ধসেট্ঠ, ৰিদ্ধংসেসি তমং সদা.

১০. ‘‘পধানপহিতত্তোসি, বুদ্ধো লোকে সদেৰকে;

তৰ কম্মাভিরদ্ধেন, তোসেসি জনতং বহুং.

১১. ‘‘তং সব্বং অনুমোদিত্ৰা, পদুমুত্তরো মহামুনি;

নভং অব্ভুগ্গমী ধীরো, হংসরাজাৰ অম্বরে.

১২. ‘‘অব্ভুগ্গন্ত্ৰান সম্বুদ্ধো, মহেসি পদুমুত্তরো;

অন্তলিক্খে ঠিতো সত্থা, ইমা গাথা অভাসথ.

১৩. ‘‘যেনিদং থৰিতং ঞাণং, ওপম্মেহি সমাযুতং;

তমহং কিত্তযিস্সামি, সুণাথ মম ভাসতো.

১৪. ‘‘‘অট্ঠারসঞ্চ খত্তুং সো, দেৰরাজা ভৰিস্সতি;

পথব্যা রজ্জং তিসতং, ৰসুধং আৰসিস্সতি.

১৫. ‘‘‘পঞ্চৰীসতিক্খত্তুঞ্চ, চক্কৰত্তী ভৰিস্সতি;

পদেসরজ্জং ৰিপুলং, গণনাতো অসঙ্খিযং.

১৬. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১৭. ‘‘‘তুসিতা হি চৰিত্ৰান, সুক্কমূলেন চোদিতো;

হীনোৰ জাতিযা সন্তো, উপালি নাম হেস্সতি.

১৮. ‘‘‘সো পচ্ছা পব্বজিত্ৰান, ৰিরাজেত্ৰান পাপকং;

সব্বাসৰে পরিঞ্ঞায, নিব্বাযিস্সতিনাসৰো.

১৯. ‘‘‘তুট্ঠো চ গোতমো বুদ্ধো, সক্যপুত্তো মহাযসো;

ৰিনযাধিগতং তস্স, এতদগ্গে ঠপেস্সতি’.

২০. ‘‘সদ্ধাযাহং পব্বজিতো, কতকিচ্চো অনাসৰো;

সব্বাসৰে পরিঞ্ঞায, ৰিহরামি অনাসৰো.

২১. ‘‘ভগৰা চানুকম্পী মং, ৰিনযেহং ৰিসারদো;

সককম্মাভিরদ্ধো চ, ৰিহরামি অনাসৰো.

২২. ‘‘সংৰুতো পাতিমোক্খম্হি, ইন্দ্রিযেসু চ পঞ্চসু;

ধারেমি ৰিনযং সব্বং, কেৰলং রতনাকরং [রতনগ্ঘরং (ক.)].

২৩. ‘‘মমঞ্চ গুণমঞ্ঞায, সত্থা লোকে অনুত্তরো;

ভিক্খুসঙ্ঘে নিসীদিত্ৰা, এতদগ্গে ঠপেসি মং.

২৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা উপালিথেরো ইমা গাথাযো অভাসিত্থাতি.

ভাগিনেয্যুপালিত্থেরস্সাপদানং পঠমং.