২. সোণকোল়িৰিসত্থেরঅপদানং

২৫. ‘‘অনোমদস্সিস্স মুনিনো, লোকজেট্ঠস্স তাদিনো;

সুধায লেপনং কত্ৰা, চঙ্কমং কারযিং অহং.

২৬. ‘‘নানাৰণেহি পুপ্ফেহি, চঙ্কমং সন্থরিং অহং;

আকাসে ৰিতানং কত্ৰা, ভোজযিং বুদ্ধমুত্তমং.

২৭. ‘‘অঞ্জলিং পগ্গহেত্ৰান, অভিৰাদেত্ৰান সুব্বতং [পুপ্ফকং (ক.)];

দীঘসালং ভগৰতো, নিয্যাদেসিমহং তদা.

২৮. ‘‘মম সঙ্কপ্পমঞ্ঞায, সত্থা লোকে অনুত্তরো;

পটিগ্গহেসি ভগৰা, অনুকম্পায চক্খুমা.

২৯. ‘‘পটিগ্গহেত্ৰান সম্বুদ্ধো, দক্খিণেয্যো সদেৰকে;

ভিক্খুসঙ্ঘে নিসীদিত্ৰা, ইমা গাথা অভাসথ.

৩০. ‘‘‘যো সো হট্ঠেন চিত্তেন, দীঘসালং অদাসি [অকাসি (সী.)] মে;

তমহং কিত্তযিস্সামি, সুণাথ মম ভাসতো.

৩১. ‘‘‘ইমস্স মচ্চুকালম্হি, পুঞ্ঞকম্মসমঙ্গিনো;

সহস্সযুত্তস্সরথো, উপট্ঠিস্সতি তাৰদে.

৩২. ‘‘‘তেন যানেনযং পোসো, দেৰলোকং গমিস্সতি;

অনুমোদিস্সরে দেৰা, সম্পত্তে কুসলব্ভৰে [কুসলে ভৰে (সী. স্যা.)].

৩৩. ‘‘‘মহারহং ব্যম্হং সেট্ঠং, রতনমত্তিকলেপনং;

কূটাগারৰরূপেতং, ব্যম্হং অজ্ঝাৰসিস্সতি.

৩৪. ‘‘‘তিংসকপ্পসহস্সানি, দেৰলোকে রমিস্সতি;

পঞ্চৰীসতি কপ্পানি, দেৰরাজা ভৰিস্সতি.

৩৫. ‘‘‘সত্তসত্ততিক্খত্তুঞ্চ, চক্কৰত্তী ভৰিস্সতি;

যসোধরসনামা [যসেধরা সমানা (সী.)] তে, সব্বেপি একনামকা.

৩৬. ‘‘‘দ্ৰে সম্পত্তী অনুভোত্ৰা, ৰড্ঢেত্ৰা [চিনিত্ৰা (স্যা.)] পুঞ্ঞসঞ্চযং;

অট্ঠৰীসতিকপ্পম্হি, চক্কৰত্তী ভৰিস্সতি.

৩৭. ‘‘‘তত্রাপি ব্যম্হং পৰরং, ৰিস্সকম্মেন মাপিতং;

দসসদ্দাৰিৰিত্তং তং, পুরমজ্ঝাৰসিস্সতি.

৩৮. ‘‘‘অপরিমেয্যে ইতো কপ্পে, ভূমিপালো মহিদ্ধিকো;

ওক্কাকো নাম নামেন, রাজা রট্ঠে ভৰিস্সতি.

৩৯. ‘‘‘সোল়সিত্থিসহস্সানং, সব্বাসং পৰরা চ সা [পৰরাৰ যা (স্যা.), পৰরা পিযা (?)];

অভিজাতা খত্তিযানী, নৰ পুত্তে জনেস্সতি.

৪০. ‘‘‘নৰ পুত্তে জনেত্ৰান, খত্তিযানী মরিস্সতি;

তরুণী চ পিযা কঞ্ঞা, মহেসিত্তং করিস্সতি.

৪১. ‘‘‘ওক্কাকং তোসযিত্ৰান, ৰরং কঞ্ঞা লভিস্সতি;

ৰরং লদ্ধান সা কঞ্ঞা, পুত্তে পব্বাজযিস্সতি.

৪২. ‘‘‘পব্বাজিতা চ তে সব্বে, গমিস্সন্তি নগুত্তমং;

জাতিভেদভযা সব্বে, ভগিনীহি ৰসিস্সরে [সংৰসিস্সরে (সী.)].

৪৩. ‘‘‘একা চ কঞ্ঞা ব্যাধীহি, ভৰিস্সতি পরিক্খতা [পুরক্খতা (স্যা. ক.)];

মা নো জাতি পভিজ্জীতি, নিখণিস্সন্তি খত্তিযা.

৪৪. ‘‘‘খত্তিযো নীহরিত্ৰান, তায সদ্ধিং ৰসিস্সতি;

ভৰিস্সতি তদা ভেদো, ওক্কাককুলসম্ভৰো.

৪৫. ‘‘‘তেসং পজা ভৰিস্সন্তি, কোল়িযা নাম জাতিযা;

তত্থ মানুসকং ভোগং, অনুভোস্সতিনপ্পকং.

৪৬. ‘‘‘তম্হা কাযা চৰিত্ৰান, দেৰলোকং গমিস্সতি;

তত্রাপি পৰরং ব্যম্হং, লভিস্সতি মনোরমং.

৪৭. ‘‘‘দেৰলোকা চৰিত্ৰান, সুক্কমূলেন চোদিতো;

আগন্ত্ৰান মনুস্সত্তং, সোণো নাম ভৰিস্সতি.

৪৮. ‘‘‘আরদ্ধৰীরিযো পহিতত্তো, পদহং সত্থু সাসনে;

সব্বাসৰে পরিঞ্ঞায, নিব্বাযিস্সতিনাসৰো.

৪৯. ‘‘‘অনন্তদস্সী ভগৰা, গোতমো সক্যপুঙ্গৰো;

ৰিসেসঞ্ঞূ মহাৰীরো, অগ্গট্ঠানে ঠপেস্সতি’.

৫০. ‘‘ৰুট্ঠম্হি দেৰে চতুরঙ্গুলম্হি, তিণে অনিলেরিতঅঙ্গণম্হি;

ঠত্ৰান যোগস্স পযুত্ততাদিনো, ততোত্তরিং পারমতা ন ৰিজ্জতি.

৫১. ‘‘উত্তমে দমথে দন্তো, চিত্তং মে সুপণীহিতং;

ভারো মে ওহিতো সব্বো, নিব্বুতোম্হি অনাসৰো.

৫২. ‘‘অঙ্গীরসো মহানাগো, অভিজাতোৰ কেসরী;

ভিক্খুসঙ্ঘে নিসীদিত্ৰা, এতদগ্গে ঠপেসি মং.

৫৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সোণো কোল়িৰিসো [কোল়িযৰেস্সো (সী. স্যা.), কোটিকণ্ণো (ক.)] থেরো ইমা গাথাযো অভাসিত্থাতি.

সোণকোল়িৰিসত্থেরস্সাপদানং দুতিযং.