৯. জতুকণ্ণিত্থেরঅপদানং

২৭৬. ‘‘নগরে হংসৰতিযা, সেট্ঠিপুত্তো অহোসহং;

সমপ্পিতো কামগুণে, পরিচারেমহং তদা.

২৭৭. ‘‘ততো [তযো (সী.)] পাসাদমারুয্হ, মহাভোগে ৰলঞ্জকো [উব্বিদ্ধা গেহলুঞ্জকা (ক.), উব্বিদ্ধাগেহলঞ্ছকা (সী.)];

তত্থ নচ্চেহি গীতেহি, পরিচারেমহং তদা.

২৭৮. ‘‘তূরিযা আহতা ময্হং, সম্মতাল়সমাহিতা;

নচ্চন্তা [রঞ্জন্তী (স্যা.), রজ্জন্তা (ক.)] ইত্থিযো সব্বা, হরন্তিযেৰ মে মনো.

২৭৯. ‘‘চেলাপিকা [চেলাৰকা (স্যা.), ৰেলামিকা (পী.)] লামণিকা [ৰামনিকা (স্যা. পী.)], কুঞ্জৰাসী তিমজ্ঝিকা [কুঞ্জৰা সীহিমজ্ঝিতা (স্যা.), কুজ্জা ৰা সীহিমজ্ঝিকা (পী.)];

লঙ্ঘিকা সোকজ্ঝাযী চ, পরিৰারেন্তি মং সদা.

২৮০. ‘‘ৰেতাল়িনো কুম্ভথূনী, নটা চ নচ্চকা বহূ;

নটকা নাটকা চেৰ, পরিৰারেন্তি মং সদা.

২৮১. ‘‘কপ্পকা ন্হাপকা সূদা, মালাকারা সুপাসকা [সুমাপকা (সী. স্যা.)];

জল্লা মল্লা চ তে সব্বে, পরিৰারেন্তি মং সদা.

২৮২. ‘‘এতেসু কীল়মানেসু, সিক্খিতে কতুপাসনে;

রত্তিন্দিৰং ন জানামি, ইন্দোৰ তিদসঙ্গণে.

২৮৩. ‘‘অদ্ধিকা পথিকা সব্বে, যাচকা ৰরকা বহূ;

উপগচ্ছন্তি তে নিচ্চং, ভিক্খযন্তা মমং ঘরং.

২৮৪. ‘‘সমণা ব্রাহ্মণা চেৰ, পুঞ্ঞক্খেত্তা অনুত্তরা;

ৰড্ঢযন্তা মমং পুঞ্ঞং, আগচ্ছন্তি মমং ঘরং.

২৮৫. ‘‘পটগা [পটকা (সী. স্যা.), পদকা (পী.)] লটুকা [লটকা (সী.)] সব্বে, নিগণ্ঠা পুপ্ফসাটকা;

তেদণ্ডিকা একসিখা, আগচ্ছন্তি মমং ঘরং.

২৮৬. ‘‘আজীৰকা ৰিলুত্তাৰী, গোধম্মা দেৰধম্মিকা;

রজোজল্লধরা এতে, আগচ্ছন্তি মমং ঘরং.

২৮৭. ‘‘পরিত্তকা সন্তিপত্তা [পরিৰত্তকা সিদ্ধিপত্তা (সী. স্যা. পী.)], কোধপুগ্গনিকা [কোণ্ডপুগ্গণিকা (সী.), কোণ্ডপুগ্গলিকা (পী.)] বহূ;

তপস্সী ৰনচারী চ, আগচ্ছন্তি মমং ঘরং.

২৮৮. ‘‘ওড্ডকা দমিল়া চেৰ, সাকুল়া মলৰাল়কা [মলযালকা (সী. স্যা. পী.)];

সৰরা যোনকা চেৰ, আগচ্ছন্তি মমং ঘরং.

২৮৯. ‘‘অন্ধকা মুণ্ডকা সব্বে, কোটলা হনুৰিন্দকা [কোলকা সানুৰিন্দকা (সী. পী.)];

আরাৰচীনরট্ঠা চ, আগচ্ছন্তি মমং ঘরং.

২৯০. ‘‘অলসন্দকা [অলসন্তা (ক.)] পল্লৰকা, ধম্মরা নিগ্গমানুসা [বব্বরা ভগ্গকারুসা (সী.)];

গেহিকা [রোহিতা (সী.), বাহিকা (পী.)] চেতপুত্তা চ, আগচ্ছন্তি মমং ঘরং.

২৯১. ‘‘মাধুরকা কোসলকা, কলিঙ্গা [কাসিকা (সী.)] হত্থিপোরিকা;

ইসিণ্ডা মক্কলা চেৰ, আগচ্ছন্তি মমং ঘরং.

২৯২. ‘‘চেলাৰকা আরব্ভা [অরম্মা (সী. পী.)] চ, ওঘুল়্হা [ওক্কলা (সী.)] মেঘলা বহূ;

খুদ্দকা সুদ্দকা চেৰ, আগচ্ছন্তি মমং ঘরং.

২৯৩. ‘‘রোহণা সিন্ধৰা চেৰ, চিতকা এককণ্ণিকা;

সুরট্ঠা অপরন্তা চ, আগচ্ছন্তি মমং ঘরং.

২৯৪. ‘‘সুপ্পারকা কুমারা [কিকুমারা (সী. পী.)] চ, মল্লসোৰণ্ণভূমিকা [মলযা সোণ্ণভূমিকা (সী. স্যা. পী.)];

ৰজ্জীতঙ্গা [ৰজ্জী তারা (সী.), ৰজ্জীহারা (স্যা. পী.)] চ তে সব্বে, আগচ্ছন্তি মমং ঘরং.

২৯৫. ‘‘নল়কারা পেসকারা, চম্মকারা চ তচ্ছকা;

কম্মারা কুম্ভকারা চ, আগচ্ছন্তি মমং ঘরং.

২৯৬. ‘‘মণিকারা লোহকারা, সোণ্ণকারা চ দুস্সিকা;

তিপুকারা চ তে সব্বে, আগচ্ছন্তি মমং ঘরং.

২৯৭. ‘‘উসুকারা ভমকারা, পেসকারা চ গন্ধিকা;

রজকা তুন্নৰাযা চ, আগচ্ছন্তি মমং ঘরং.

২৯৮. ‘‘তেলিকা কট্ঠহারা চ, উদহারা চ পেস্সিকা;

সূপিকা সূপরক্খা চ, আগচ্ছন্তি মমং ঘরং.

২৯৯. ‘‘দোৰারিকা অনীকট্ঠা, বন্ধিকা [ৰন্দিকা (সী.), গন্থিকা (স্যা.), সন্দিকা (পী.)] পুপ্ফছড্ডকা;

হত্থারুহা হত্থিপালা, আগচ্ছন্তি মমং ঘরং.

৩০০. ‘‘আনন্দস্স মহারঞ্ঞো [আনন্দস্স নাম রঞ্ঞো (স্যা.), অরিন্দমনাম রঞ্ঞো (পী.)], মমত্থস্স [পমত্তস্স (সী. পী.), সমগ্গস্স (স্যা.)] অদাসহং;

সত্তৰণ্ণেন রতনেন, ঊনত্থং [ঊনত্তং (সী. স্যা. পী.)] পূরযামহং.

৩০১. ‘‘যে মযা কিত্তিতা সব্বে, নানাৰণ্ণা বহূ জনা;

তেসাহং চিত্তমঞ্ঞায, তপ্পযিং রতনেনহং.

৩০২. ‘‘ৰগ্গূসু ভাসমানাসু, ৰজ্জমানাসু ভেরিসু;

সঙ্খেসু ধমযন্তেসু, সকগেহে রমামহং.

৩০৩. ‘‘ভগৰা তম্হি সমযে, পদুমুত্তরনাযকো;

ৰসীসতসহস্সেহি, পরিক্খীণাসৰেহি সো.

৩০৪. ‘‘ভিক্খূহি সহিতো ৰীথিং, পটিপজ্জিত্থ চক্খুমা;

ওভাসেন্তো দিসা সব্বা, দীপরুক্খোৰ জোততি.

৩০৫. ‘‘ৰজ্জন্তি ভেরিযো সব্বা, গচ্ছন্তে লোকনাযকে;

পভা নিদ্ধাৰতে তস্স, সতরংসীৰ উগ্গতো.

৩০৬. ‘‘কৰাটন্তরিকাযাপি, পৰিট্ঠেন চ রস্মিনা;

অন্তোঘরেসু ৰিপুলো, আলোকো আসি তাৰদে.

৩০৭. ‘‘পভং দিস্ৰান বুদ্ধস্স, পারিসজ্জে অৰোচহং;

নিস্সংসযং বুদ্ধসেট্ঠো, ইমং ৰীথিমুপাগতো.

৩০৮. ‘‘খিপ্পং ওরুয্হ পাসাদা, অগমিং অন্তরাপণং;

সম্বুদ্ধং অভিৰাদেত্ৰা, ইদং ৰচনমব্রৰিং.

৩০৯. ‘‘‘অনুকম্পতু মে বুদ্ধো, জলজুত্তমনাযকো;

ৰসীসতসহস্সেহি, অধিৰাসেসি সো মুনি’.

৩১০. ‘‘নিমন্তেত্ৰান সম্বুদ্ধং, অভিনেসিং সকং ঘরং;

তত্থ অন্নেন পানেন, সন্তপ্পেসিং মহামুনিং.

৩১১. ‘‘ভুত্তাৰিং কালমঞ্ঞায, বুদ্ধসেট্ঠস্স তাদিনো;

সতঙ্গিকেন তূরিযেন, বুদ্ধসেট্ঠং উপট্ঠহিং.

৩১২. ‘‘পদুমুত্তরো লোকৰিদূ, আহুতীনং পটিগ্গহো;

অন্তোঘরে নিসীদিত্ৰা, ইমা গাথা অভাসথ.

৩১৩. ‘‘‘যো মং তূরিযেহুপট্ঠাসি, অন্নপানঞ্চদাসি মে;

তমহং কিত্তযিস্সামি, সুণাথ মম ভাসতো.

৩১৪. ‘‘‘পহূতভক্খো হুত্ৰান, সহিরঞ্ঞো সভোজনো;

চতুদীপে একরজ্জং, কারযিস্সতিযং নরো.

৩১৫. ‘‘‘পঞ্চসীলে সমাদায, দসকম্মপথে ততো;

সমাদায পৰত্তেন্তো, পরিসং সিক্খাপযিস্সতি.

৩১৬. ‘‘‘তূরিযসতসহস্সানি, ভেরিযো সমলঙ্কতা;

ৰজ্জযিস্সন্তিমং নিচ্চং, উপট্ঠানস্সিদং ফলং.

৩১৭. ‘‘‘তিংসকপ্পসহস্সানি, দেৰলোকে রমিস্সতি;

চতুসট্ঠিক্খত্তুং দেৰিন্দো, দেৰরজ্জং করিস্সতি.

৩১৮. ‘‘‘চতুসট্ঠিক্খত্তুং রাজা, চক্কৰত্তী ভৰিস্সতি;

পদেসরজ্জং ৰিপুলং, গণনাতো অসঙ্খিযং.

৩১৯. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৩২০. ‘‘‘উপপজ্জতি যং যোনিং, দেৰত্তং অথ মানুসং;

অনূনভোগো হুত্ৰান, মনুস্সত্তং গমিস্সতি.

৩২১. ‘‘‘অজ্ঝাযকো ভৰিত্ৰান, তিণ্ণং ৰেদান পারগূ;

উত্তমত্থং গৰেসন্তো, চরিস্সতি মহিং ইমং.

৩২২. ‘‘‘সো পচ্ছা পব্বজিত্ৰান, সুক্কমূলেন চোদিতো;

গোতমস্স ভগৰতো, সাসনেভিরমিস্সতি.

৩২৩. ‘‘‘আরাধযিত্ৰান সম্বুদ্ধং, গোতমং সক্যপুঙ্গৰং;

কিলেসে ঝাপযিত্ৰান, অরহাযং ভৰিস্সতি’.

৩২৪. ‘‘ৰিপিনে ব্যগ্ঘরাজাৰ, মিগরাজাৰ কেসরী;

অভীতো ৰিহরামজ্জ, সক্যপুত্তস্স সাসনে.

৩২৫. ‘‘দেৰলোকে মনুস্সে ৰা, দলিদ্দে দুগ্গতিম্হি ৰা;

নিব্বত্তিং মে ন পস্সামি, উপট্ঠানস্সিদং ফলং.

৩২৬. ‘‘ৰিৰেকমনুযুত্তোম্হি, উপসন্তো নিরূপধি;

নাগোৰ বন্ধনং ছেত্ৰা, ৰিহরামি অনাসৰো.

৩২৭. ‘‘কিলেসা ঝাপিতা ময্হং…পে… ৰিহরামি অনাসৰো.

৩২৮. ‘‘স্ৰাগতং ৰত মে আসি…পে… কতং বুদ্ধস্স সাসনং.

৩২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা জতুকণ্ণিত্থেরো ইমা গাথাযো অভাসিত্থাতি.

জতুকণ্ণিত্থেরস্সাপদানং নৰমং.