১০. উদেনত্থেরঅপদানং

৩৩০. ‘‘হিমৰন্তস্সাৰিদূরে, পদুমো নাম পব্বতো;

অস্সমো সুকতো ময্হং, পণ্ণসালা সুমাপিতা.

৩৩১. ‘‘নদিযো সন্দরে তত্থ, সুপতিত্থা মনোরমা;

অচ্ছোদকা সীতজলা, সন্দরে নদিযো সদা.

৩৩২. ‘‘পাঠীনা পাৰুসা মচ্ছা, বলজা মুঞ্জরোহিতা;

সোভেন্তা নদিযো এতে, ৰসন্তি নদিযা সদা.

৩৩৩. ‘‘অম্বজম্বূহি সঞ্ছন্না, করেরিতিলকা তথা;

উদ্দালকা পাটলিযো, সোভেন্তি মম অস্সমং.

৩৩৪. ‘‘অঙ্কোলকা বিম্বিজালা, মাযাকারী চ পুপ্ফিতা;

গন্ধেন উপৰাযন্তা, সোভেন্তি মম অস্সমং.

৩৩৫. ‘‘অতিমুত্তা সত্তলিকা, নাগা সালা চ পুপ্ফিতা;

দিব্বগন্ধং সম্পৰন্তা, সোভেন্তি মম অস্সমং.

৩৩৬. ‘‘কোসম্বা সল়লা নীপা, অট্ঠঙ্গাপি চ পুপ্ফিতা [অট্ঠঙ্গা চ সুপুপ্ফিতা (সী.), কট্ঠঙ্গা চ সুপুপ্ফিতা (পী.)];

দিব্বগন্ধং সম্পৰন্তা, সোভেন্তি মম অস্সমং.

৩৩৭. ‘‘হরীতকা আমলকা, অম্বজম্বুৰিভীতকা;

কোলা ভল্লাতকা বিল্লা, ফলানি বহু অস্সমে.

৩৩৮. ‘‘কলম্বা কন্দলী তত্থ, পুপ্ফন্তি মম অস্সমে;

দিব্বগন্ধং [দিব্বগন্ধা (সী. স্যা. পী.) এৰং পরত্থপি] সম্পৰন্তা, সোভেন্তি মম অস্সমং.

৩৩৯. ‘‘অসোকপিণ্ডিৰারী চ [অসোকপিণ্ডী চ ৰরী (সী. স্যা.), অসোকপিণ্ডী চ ৰারী (পী.)], নিম্বরুক্খা চ পুপ্ফিতা;

দিব্বগন্ধং সম্পৰন্তা, সোভেন্তি মম অস্সমং.

৩৪০. ‘‘পুন্নাগা গিরিপুন্নাগা, তিমিরা তত্থ পুপ্ফিতা;

দিব্বগন্ধং সম্পৰন্তা, সোভেন্তি মম অস্সমং.

৩৪১. ‘‘নিগ্গুণ্ডী সিরিনিগ্গুণ্ডী, চম্পরুক্খেত্থ পুপ্ফিতা;

দিব্বগন্ধং সম্পৰন্তা, সোভেন্তি মম অস্সমং.

৩৪২. ‘‘অৰিদূরে পোক্খরণী, চক্কৰাকূপকূজিতা;

মন্দালকেহি সঞ্ছন্না, পদুমুপ্পলকেহি চ.

৩৪৩. ‘‘অচ্ছোদকা সীতজলা, সুপতিত্থা মনোরমা;

অচ্ছা ফলিকসমানা, সোভেন্তি মম অস্সমং.

৩৪৪. ‘‘পদুমা পুপ্ফরে তত্থ, পুণ্ডরীকা চ উপ্পলা;

মন্দালকেহি সঞ্ছন্না, সোভেন্তি মম অস্সমং.

৩৪৫. ‘‘পাঠীনা পাৰুসা মচ্ছা, বলজা মুঞ্জরোহিতা;

ৰিচরন্তাৰ তে তত্থ, সোভেন্তি মম অস্সমং.

৩৪৬. ‘‘কুম্ভীলা সুসুমারা চ, কচ্ছপা চ গহা বহূ;

ওগহা অজগরা চ, সোভেন্তি মম অস্সমং.

৩৪৭. ‘‘পারেৰতা রৰিহংসা, চক্কৰাকা নদীচরা;

দিন্দিভা সাল়িকা চেত্থ, সোভেন্তি মম অস্সমং.

৩৪৮. ‘‘নযিতা অম্বগন্ধী চ, কেতকা তত্থ পুপ্ফিতা;

দিব্বগন্ধং সম্পৰন্তা, সোভেন্তি মম অস্সমং.

৩৪৯. ‘‘সীহা ব্যগ্ঘা চ দীপী চ, অচ্ছকোকতরচ্ছকা;

অনুসঞ্চরন্তা পৰনে, সোভেন্তি মম অস্সমং.

৩৫০. ‘‘জটাভারেন ভরিতা, অজিনুত্তরৰাসনা;

অনুসঞ্চরন্তা পৰনে, সোভেন্তি মম অস্সমং.

৩৫১. ‘‘অজিনানিধরা এতে, নিপকা সন্তৰুত্তিনো;

অপ্পাহারাৰ তে সব্বে, সোভেন্তি মম অস্সমং.

৩৫২. ‘‘খারিভারং গহেত্ৰান, অজ্ঝোগয্হ ৰনং তদা;

মূলফলানি ভুঞ্জন্তা, ৰসন্তি অস্সমে তদা.

৩৫৩. ‘‘ন তে দারুং আহরন্তি, উদকং পাদধোৰনং;

সব্বেসং আনুভাৰেন, সযমেৰাহরীযতি.

৩৫৪. ‘‘চুল্লাসীতিসহস্সানি, ইসযেত্থ সমাগতা;

সব্বেৰ ঝাযিনো এতে, উত্তমত্থগৰেসকা.

৩৫৫. ‘‘তপস্সিনো ব্রহ্মচারী, চোদেন্তা অপ্পনাৰ তে;

অম্বরাৰচরা সব্বে, ৰসন্তি অস্সমে তদা.

৩৫৬. ‘‘পঞ্চাহং সন্নিপতন্তি, একগ্গা সন্তৰুত্তিনো;

অঞ্ঞোঞ্ঞং অভিৰাদেত্ৰা, পক্কমন্তি দিসামুখা.

৩৫৭. ‘‘পদুমুত্তরো নাম জিনো, সব্বধম্মান পারগূ;

তমন্ধকারং ৰিধমং, উপ্পজ্জি তাৰদে জিনো.

৩৫৮. ‘‘মম অস্সমসামন্তা, যক্খো আসি মহিদ্ধিকো;

সো মে সংসিত্থ সম্বুদ্ধং, জলজুত্তমনাযকং.

৩৫৯. ‘‘এস বুদ্ধো সমুপ্পন্নো, পদুমুত্তরো মহামুনি;

খিপ্পং গন্ত্ৰান সম্বুদ্ধং, পযিরূপাস মারিস.

৩৬০. ‘‘যক্খস্স ৰচনং সুত্ৰা, ৰিপ্পসন্নেন চেতসা;

অস্সমং সংসামেত্ৰান, নিক্খমিং ৰিপিনা তদা.

৩৬১. ‘‘চেল়েৰ ডয্হমানম্হি, নিক্খমিত্ৰান অস্সমা;

একরত্তিং নিৰাসেত্ৰা [নিৰসিত্ৰা (সী.), নিৰাসেন (?)], উপগচ্ছিং ৰিনাযকং.

৩৬২. ‘‘পদুমুত্তরো লোকৰিদূ, আহুতীনং পটিগ্গহো;

চতুসচ্চং পকাসেন্তো, দেসেসি অমতং পদং.

৩৬৩. ‘‘সুফুল্লং পদুমং গয্হ, উপগন্ত্ৰা মহেসিনো;

পসন্নচিত্তো সুমনো, বুদ্ধস্স অভিরোপযিং.

৩৬৪. ‘‘পূজযিত্ৰান সম্বুদ্ধং, জলজুত্তমনাযকং;

একংসং অজিনং কত্ৰা, সন্থৰিং লোকনাযকং.

৩৬৫. ‘‘যেন ঞাণেন সম্বুদ্ধো, ৰসতীহ অনাসৰো;

তং ঞাণং কিত্তযিস্সামি, সুণাথ মম ভাসতো.

৩৬৬. ‘‘‘সংসারসোতং ছিন্দিত্ৰা, তারেসি সব্বপাণিনং;

তৰ ধম্মং সুণিত্ৰান, তণ্হাসোতং তরন্তি তে.

৩৬৭. ‘‘‘তুৰং সত্থা চ কেতু চ, ধজো যূপো চ পাণিনং;

পরাযণো পতিট্ঠা চ, দীপো চ দ্ৰিপদুত্তম [দিপদুত্তম (সী. স্যা. পী.)].

৩৬৮. ‘‘‘যাৰতা গণিনো লোকে, সত্থৰাহা পৰুচ্চরে;

তুৰং অগ্গোসি সব্বঞ্ঞু, তৰ অন্তোগধাৰ তে.

৩৬৯. ‘‘‘তৰ ঞাণেন সব্বঞ্ঞু, তারেসি জনতং বহুং;

তৰ দস্সনমাগম্ম, দুক্খস্সন্তং করিস্সরে.

৩৭০. ‘‘‘যে কেচিমে গন্ধজাতা, লোকে ৰাযন্তি চক্খুম;

তৰ গন্ধসমো নত্থি, পুঞ্ঞক্খেত্তে মহামুনে’.

৩৭১. ‘‘‘তিরচ্ছানযোনিং নিরযং, পরিমোচেসি [পরিমোচেহি (স্যা. ক.)] চক্খুম;

অসঙ্খতং পদং সন্তং, দেসেসি [দেসেহি (স্যা. ক.)] ত্ৰং মহামুনে’.

৩৭২. ‘‘পদুমুত্তরো লোকৰিদূ, আহুতীনং পটিগ্গহো;

ভিক্খুসঙ্ঘে নিসীদিত্ৰা, ইমা গাথা অভাসথ.

৩৭৩. ‘‘‘যো মে ঞাণং অপূজেসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

৩৭৪. ‘‘‘তিংসকপ্পসহস্সানি, দেৰলোকে রমিস্সতি;

সহস্সক্খত্তুং রাজা চ, চক্কৰত্তী ভৰিস্সতি’.

৩৭৫. ‘‘সুলদ্ধলাভং লদ্ধোম্হি, তোসযিত্ৰান সুব্বতং;

সব্বাসৰে পরিঞ্ঞায, ৰিহরামি অনাসৰো.

৩৭৬. ‘‘কিলেসা ঝাপিতা ময্হং…পে… ৰিহরামি অনাসৰো.

৩৭৭. ‘‘স্ৰাগতং ৰত মে আসি…পে… কতং বুদ্ধস্স সাসনং.

৩৭৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদেনো থেরো ইমা গাথাযো অভাসিত্থাতি.

উদেনত্থেরস্সাপদানং দসমং.

মেত্তেয্যৰগ্গো একচত্তালীসমো.