৮. তোদেয্যত্থেরঅপদানং

২২৪. ‘‘রাজা অজিতঞ্জযো [রাজাসি ৰিজযো (সী. অট্ঠ.), রাজা ৰিজিতজযো (স্যা.)] নাম, কেতুমতীপুরুত্তমে;

সূরো ৰিক্কমসম্পন্নো, পুরমজ্ঝাৰসী তদা.

২২৫. ‘‘তস্স রঞ্ঞো পমত্তস্স, অটৰিযো সমুট্ঠহুং;

ওতারা [উত্তরা (স্যা.), ওচরা (পী.)] তুণ্ডিকা চেৰ, রট্ঠং ৰিদ্ধংসযুং তদা.

২২৬. ‘‘পচ্চন্তে কুপিতে খিপ্পং, সন্নিপাতেসিরিন্দমো;

ভটে চেৰ বলত্থে চ, অরিং নিগ্গাহযি তদা.

২২৭. ‘‘হত্থারোহা অনীকট্ঠা, সূরা চ চম্মযোধিনো;

ধনুগ্গহা চ উগ্গা চ, সব্বে সন্নিপতুং তদা.

২২৮. ‘‘আল়ারিকা চ কপ্পকা, ন্হাপকা মালকারকা;

সূরা ৰিজিতসঙ্গামা, সব্বে সন্নিপতুং তদা.

২২৯. ‘‘খগ্গহত্থা চ পুরিসা, চাপহত্থা চ ৰম্মিনো;

লুদ্দা ৰিজিতসঙ্গামা, সব্বে সন্নিপতুং তদা.

২৩০. ‘‘তিধাপভিন্না মাতঙ্গা, কুঞ্জরা সট্ঠিহাযনা;

সুৰণ্ণকচ্ছালঙ্কারা, সব্বে সন্নিপতুং তদা.

২৩১. ‘‘খমা সীতস্স উণ্হস্স, উক্কারুহরণস্স চ;

যোধাজীৰা কতকম্মা, সব্বে সন্নিপতুং তদা.

২৩২. ‘‘সঙ্খসদ্দং ভেরিসদ্দং, অথো উতুজ [উদ্ধৰ (সী.), উদ্দট (স্যা.)] সদ্দকং;

এতেহি তে হাসযন্তা, সব্বে সন্নিপতুং তদা.

২৩৩. ‘‘তিসূলকোন্তিমন্তেহি [তিসূলকোন্তমন্তেহি (সী.), কৰচেহি তোমরেহি (সী.), ধনূহি তোমরেহি (স্যা.)] চ;

কোট্টেন্তানং নিপাতেন্তা [কোট্টযন্তা নিৰত্তেন্তা (স্যা.)], সব্বে সন্নিপতুং তদা.

২৩৪. ‘‘কিমেৰাতিনিসামেত্ৰা [কৰচানিৰাসেত্ৰা (স্যা.)], সরাজা অজিতঞ্জযো [অজিনং জিনো (সী.), অজিতঞ্জিনো (স্যা.)];

সট্ঠি পাণসহস্সানি, সূলে উত্তাসযিং তদা.

২৩৫. ‘‘সদ্দং মানুসকাকংসু, অহো রাজা অধম্মিকো;

নিরযে পচ্চমানস্স, কদা অন্তো ভৰিস্সতি.

২৩৬. ‘‘সযনেহং তুৰট্টেন্তো, পস্সামি নিরযে তদা;

ন সুপামি দিৰারত্তিং, সূলেন তজ্জযন্তি মং.

২৩৭. ‘‘কিং পমাদেন রজ্জেন, ৰাহনেন বলেন চ;

ন তে পহোন্তি ধারেতুং, তাপযন্তি [তাসযন্তি (সী. স্যা.)] মমং সদা.

২৩৮. ‘‘কিং মে পুত্তেহি দারেহি, রজ্জেন সকলেন চ;

যংনূন পব্বজেয্যাহং, গতিমগ্গং ৰিসোধযে.

২৩৯. ‘‘সট্ঠি নাগসহস্সানি, সব্বালঙ্কারভূসিতে;

সুৰণ্ণকচ্ছে মাতঙ্গে, হেমকপ্পনৰাসসে.

২৪০. ‘‘আরূল়্হে গামণীযেহি, তোমরঙ্কুসপাণিভি;

সঙ্গামাৰচরে ঠানে, অনপেক্খো ৰিহাযহং;

সককম্মেন সন্তত্তো, নিক্খমিং অনগারিযং.

২৪১. ‘‘সট্ঠি অস্সসহস্সানি, সব্বালঙ্কারভূসিতে;

আজানীযেৰ জাতিযা, সিন্ধৰে সীঘৰাহনে.

২৪২. ‘‘আরূল়্হে গামণীযেহি, চাপহত্থেহি ৰম্মিভি;

পহারেত্ৰান [পহাযিত্ৰান (সী. পী.), ছড্ডযিত্ৰান (স্যা.)] তে সব্বে, নিক্খমিং অনগারিযং.

২৪৩. ‘‘সট্ঠি রথসহস্সানি, সব্বালঙ্কারভূসিতে;

দীপে অথোপি ৰেযগ্ঘে, সন্নদ্ধে উস্সিতদ্ধজে;

তে সব্বে পরিহারেত্ৰা [পরিৰজ্জেত্ৰা (স্যা.), পরিহাযিত্ৰা (পী.)], পব্বজিং অনগারিযং.

২৪৪. ‘‘সট্ঠি ধেনুসহস্সানি, সব্বা কংসূপধারণা;

তাযোপি [গাৰিযো (স্যা.), ধেনুযো (ক.)] ছড্ডযিত্ৰান, পব্বজিং অনগারিযং.

২৪৫. ‘‘সট্ঠি ইত্থিসহস্সানি, সব্বালঙ্কারভূসিতা;

ৰিচিত্তৰত্থাভরণা, আমুক্কমণিকুণ্ডলা.

২৪৬. ‘‘অল়ারপম্হা হসুলা, সুসঞ্ঞা তনুমজ্ঝিমা;

তা হিত্ৰা কন্দমানাযো, পব্বজিং অনগারিযং.

২৪৭. ‘‘সট্ঠি গামসহস্সানি, পরিপুণ্ণানি সব্বসো;

ছড্ডযিত্ৰান তং রজ্জং, পব্বজিং অনগারিযং.

২৪৮. ‘‘নগরা নিক্খমিত্ৰান, হিমৰন্তমুপাগমিং;

ভাগীরথীনদীতীরে, অস্সমং মাপযিং অহং.

২৪৯. ‘‘পণ্ণসালং করিত্ৰান, অগ্যাগারং অকাসহং;

আরদ্ধৰীরিযো পহিতত্তো, ৰসামি অস্সমে অহং.

২৫০. ‘‘মণ্ডপে রুক্খমূলে ৰা, সুঞ্ঞাগারে চ ঝাযতো;

ন তু ৰিজ্জতি তাসো মে, ন পস্সে ভযভেরৰং.

২৫১. ‘‘সুমেধো নাম সম্বুদ্ধো, অগ্গো কারুণিকো মুনি;

ঞাণালোকেন জোতন্তো, লোকে উপ্পজ্জি তাৰদে.

২৫২. ‘‘মম অস্সমসামন্তা, যক্খো আসি মহিদ্ধিকো;

বুদ্ধসেট্ঠম্হি উপ্পন্নে, আরোচেসি মমং তদা.

২৫৩. ‘‘বুদ্ধো লোকে সমুপ্পন্নো, সুমেধো নাম চক্খুমা;

তারেতি জনতং সব্বং, তম্পি সো তারযিস্সতি.

২৫৪. ‘‘যক্খস্স ৰচনং সুত্ৰা, সংৰিগ্গো আসি তাৰদে;

বুদ্ধো বুদ্ধোতি চিন্তেন্তো, অস্সমং পটিসামযিং.

২৫৫. ‘‘অগ্গিদারুঞ্চ ছড্ডেত্ৰা, সংসামেত্ৰান সন্থতং;

অস্সমং অভিৰন্দিত্ৰা, নিক্খমিং ৰিপিনা অহং.

২৫৬. ‘‘ততো চন্দনমাদায, গামা গামং পুরা পুরং;

দেৰদেৰং গৰেসন্তো, উপগচ্ছিং ৰিনাযকং.

২৫৭. ‘‘ভগৰা তম্হি সমযে, সুমেধো লোকনাযকো;

চতুসচ্চং পকাসেন্তো, বোধেতি জনতং বহুং.

২৫৮. ‘‘অঞ্জলিং পগ্গহেত্ৰান, সীসে কত্ৰান চন্দনং;

সম্বুদ্ধং অভিৰাদেত্ৰা, ইমা গাথা অভাসহং.

২৫৯. ‘‘‘ৰস্সিকে পুপ্ফমানম্হি, সন্তিকে উপৰাযতি;

ত্ৰং ৰীর গুণগন্ধেন, দিসা সব্বা পৰাযসি.

২৬০. ‘‘‘চম্পকে নাগৰনিকে, অতিমুত্তককেতকে;

সালেসু পুপ্ফমানেসু, অনুৰাতং পৰাযতি.

২৬১. ‘‘‘তৰ গন্ধং সুণিত্ৰান, হিমৰন্তা ইধাগমিং;

পূজেমি তং মহাৰীর, লোকজেট্ঠ মহাযস’.

২৬২. ‘‘ৰরচন্দনেনানুলিম্পিং, সুমেধং লোকনাযকং;

সকং চিত্তং পসাদেত্ৰা, তুণ্হী অট্ঠাসি তাৰদে.

২৬৩. ‘‘সুমেধো নাম ভগৰা, লোকজেট্ঠো নরাসভো;

ভিক্খুসঙ্ঘে নিসীদিত্ৰা, ইমা গাথা অভাসথ.

২৬৪. ‘‘‘যো মে গুণে পকিত্তেসি, চন্দনঞ্চ অপূজযি;

তমহং কিত্তযিস্সামি, সুণাথ মম ভাসতো.

২৬৫. ‘‘‘আদেয্যৰাক্যৰচনো, ব্রহ্মা উজু পতাপৰা;

পঞ্চৰীসতিকপ্পানি, সপ্পভাসো ভৰিস্সতি.

২৬৬. ‘‘‘ছব্বীসতিকপ্পসতে, দেৰলোকে রমিস্সতি;

সহস্সক্খত্তুং রাজা চ, চক্কৰত্তী ভৰিস্সতি.

২৬৭. ‘‘‘তেত্তিংসক্খত্তুং দেৰিন্দো, দেৰরজ্জং করিস্সতি;

পদেসরজ্জং ৰিপুলং, গণনাতো অসঙ্খিযং.

২৬৮. ‘‘‘ততো চুতোযং মনুজো, মনুস্সত্তং গমিস্সতি;

পুঞ্ঞকম্মেন সংযুত্তো, ব্রহ্মবন্ধু ভৰিস্সতি.

২৬৯. ‘‘‘অজ্ঝাযকো মন্তধরো, তিণ্ণং ৰেদান পারগূ;

তিলক্খণেন সম্পন্নো, বাৰরী নাম ব্রাহ্মণো.

২৭০. ‘‘‘তস্স সিস্সো ভৰিত্ৰান, হেস্সতি মন্তপারগূ;

উপগন্ত্ৰান সম্বুদ্ধং, গোতমং সক্যপুঙ্গৰং.

২৭১. ‘‘‘পুচ্ছিত্ৰা নিপুণে পঞ্হে, ভাৰযিত্ৰান অঞ্জসং [হাসযিত্ৰান মানসং (স্যা.), ভাৰযিত্ৰান সঞ্চযং (ক.)];

সব্বাসৰে পরিঞ্ঞায, ৰিহরিস্সতিনাসৰো’.

২৭২. ‘‘তিৰিধগ্গি নিব্বুতা ময্হং, ভৰা সব্বে সমূহতা;

সব্বাসৰে পরিঞ্ঞায, ৰিহরামি অনাসৰো.

২৭৩. ‘‘কিলেসা ঝাপিতা ময্হং…পে… ৰিহরামি অনাসৰো.

২৭৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

২৭৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তোদেয্যো থেরো ইমা গাথাযো অভাসিত্থাতি.

তোদেয্যত্থেরস্সাপদানং অট্ঠমং.