৭. হেমকত্থেরঅপদানং

১৮৩. ‘‘পব্ভারকূটং নিস্সায, অনোমো নাম তাপসো;

অস্সমং সুকতং কত্ৰা, পণ্ণসালে ৰসী তদা.

১৮৪. ‘‘সিদ্ধং তস্স তপো কম্মং, সিদ্ধিপত্তো সকে বলে;

সকসামঞ্ঞৰিক্কন্তো, আতাপী নিপকো মুনি.

১৮৫. ‘‘ৰিসারদো সসমযে, পরৰাদে চ কোৰিদো;

পট্ঠো ভূমন্তলিক্খম্হি, উপ্পাতম্হি চ কোৰিদো.

১৮৬. ‘‘ৰীতসোকো নিরারম্ভো, অপ্পাহারো অলোলুপো;

লাভালাভেন সন্তুট্ঠো, ঝাযী ঝানরতো মুনি.

১৮৭. ‘‘পিযদস্সী নাম সম্বুদ্ধো, অগ্গো কারুণিকো মুনি;

সত্তে তারেতুকামো সো, করুণায ফরী তদা.

১৮৮. ‘‘বোধনেয্যং জনং দিস্ৰা, পিযদস্সী মহামুনি;

চক্কৰাল়সহস্সম্পি, গন্ত্ৰা ওৰদতে মুনি.

১৮৯. ‘‘মমুদ্ধরিতুকামো সো, মমস্সমমুপাগমি;

ন দিট্ঠো মে জিনো পুব্বে, ন সুতোপি চ কস্সচি.

১৯০. ‘‘উপ্পাতা সুপিনা ময্হং, লক্খণা সুপ্পকাসিতা;

পট্ঠো ভূমন্তলিক্খম্হি, নক্খত্তপদকোৰিদো.

১৯১. ‘‘সোহং বুদ্ধস্স সুত্ৰান, তত্থ চিত্তং পসাদযিং;

তিট্ঠন্তো [ভুঞ্জন্তো (সী. পী. ক.)] ৰা নিসিন্নো ৰা, সরামি নিচ্চকালিকং.

১৯২. ‘‘মযি এৰং সরন্তম্হি, ভগৰাপি অনুস্সরি;

বুদ্ধং অনুস্সরন্তস্স, পীতি মে হোতি তাৰদে.

১৯৩. ‘‘কালঞ্চ পুনরাগম্ম, উপেসি মং মহামুনি;

সম্পত্তেপি ন জানামি, অযং বুদ্ধো মহামুনি.

১৯৪. ‘‘অনুকম্পকো কারুণিকো, পিযদস্সী মহামুনি;

সঞ্জানাপেসি অত্তানং, ‘অহং বুদ্ধো সদেৰকে’.

১৯৫. ‘‘সঞ্জানিত্ৰান সম্বুদ্ধং, পিযদস্সিং মহামুনিং;

সকং চিত্তং পসাদেত্ৰা, ইদং ৰচনমব্রৰিং.

১৯৬. ‘‘‘অঞ্ঞে [সব্বে (স্যা.)] পীঠে চ পল্লঙ্কে, আসন্দীসু নিসীদরে;

তুৰম্পি সব্বদস্সাৰী, নিসীদ রতনাসনে’.

১৯৭. ‘‘সব্বরতনমযং পীঠং, নিম্মিনিত্ৰান তাৰদে;

পিযদস্সিস্স মুনিনো, অদাসিং ইদ্ধিনিম্মিতং.

১৯৮. ‘‘রতনে চ নিসিন্নস্স, পীঠকে ইদ্ধিনিম্মিতে;

কুম্ভমত্তং জম্বুফলং, অদাসিং তাৰদে অহং.

১৯৯. ‘‘মম হাসং জনেত্ৰান, পরিভুঞ্জি মহামুনি;

তদা চিত্তং পসাদেত্ৰা, সত্থারং অভিৰাদযিং.

২০০. ‘‘পিযদস্সী তু ভগৰা, লোকজেট্ঠো নরাসভো;

রতনাসনমাসীনো, ইমা গাথা অভাসথ.

২০১. ‘‘‘যো মে রতনমযং পীঠং, অমতঞ্চ ফলং অদা;

তমহং কিত্তযিস্সামি, সুণাথ মম ভাসতো.

২০২. ‘‘‘সত্তসত্ততি কপ্পানি, দেৰলোকে রমিস্সতি;

পঞ্চসত্ততিক্খত্তুঞ্চ, চক্কৰত্তী ভৰিস্সতি.

২০৩. ‘‘‘দ্ৰত্তিংসক্খত্তুং দেৰিন্দো, দেৰরজ্জং করিস্সতি;

পদেসরজ্জং ৰিপুলং, গণনাতো অসঙ্খিযং.

২০৪. ‘‘‘সোণ্ণমযং রূপিমযং, পল্লঙ্কং সুকতং বহুং;

লোহিতঙ্গমযঞ্চেৰ, লচ্ছতি রতনামযং.

২০৫. ‘‘‘চঙ্কমন্তম্পি মনুজং, পুঞ্ঞকম্মসমঙ্গিনং;

পল্লঙ্কানি অনেকানি, পরিৰারেস্সরে তদা.

২০৬. ‘‘‘কূটাগারা চ পাসাদা, সযনঞ্চ মহারহং;

ইমস্স চিত্তমঞ্ঞায, নিব্বত্তিস্সন্তি তাৰদে.

২০৭. ‘‘‘সট্ঠি নাগসহস্সানি, সব্বালঙ্কারভূসিতা;

সুৰণ্ণকচ্ছা মাতঙ্গা, হেমকপ্পনৰাসসা [হেমকপ্পনিৰাসনা (সী. স্যা.), হেমকপ্পনিৰাসসা (ক.)].

২০৮. ‘‘‘আরূল়্হা গামণীযেহি, তোমরঙ্কুসপাণিভি;

ইমং পরিচরিস্সন্তি, রত্নপীঠস্সিদং ফলং.

২০৯. ‘‘‘সট্ঠি অস্সসহস্সানি, সব্বালঙ্কারভূসিতা;

আজানীযাৰ জাতিযা, সিন্ধৰা সীঘৰাহিনো.

২১০. ‘‘‘আরূল়্হা গামণীযেহি, ইল্লিযাচাপধারিভি;

তেপিমং পরিচরিস্সন্তি, রত্নপীঠস্সিদং ফলং.

২১১. ‘‘‘সট্ঠি রথসহস্সানি, সব্বালঙ্কারভূসিতা;

দীপা অথোপি ৰেযগ্ঘা, সন্নদ্ধা উস্সিতদ্ধজা.

২১২. ‘‘‘আরূল়্হা গামণীযেহি, চাপহত্থেহি ৰম্মিভি;

পরিৰারেস্সন্তিমং নিচ্চং, রত্নপীঠস্সিদং ফলং.

২১৩. ‘‘‘সট্ঠি ধেনুসহস্সানি, দোহঞ্ঞা পুঙ্গৰূসভে;

ৰচ্ছকে জনযিস্সন্তি, রত্নপীঠস্সিদং ফলং.

২১৪. ‘‘‘সোল়সিত্থিসহস্সানি, সব্বালঙ্কারভূসিতা;

ৰিচিত্তৰত্থাভরণা, আমুক্কমণিকুণ্ডলা.

২১৫. ‘‘‘অল়ারপম্হা হসুলা, সুসঞ্ঞা তনুমজ্ঝিমা;

পরিৰারেস্সন্তিমং নিচ্চং, রত্নপীঠস্সিদং ফলং.

২১৬. ‘‘‘অট্ঠারসে কপ্পসতে, গোতমো নাম চক্খুমা;

তমন্ধকারং ৰিধমিত্ৰা, বুদ্ধো লোকে ভৰিস্সতি.

২১৭. ‘‘‘তস্স দস্সনমাগম্ম, পব্বজিস্সতিকিঞ্চনো;

তোসযিত্ৰান সত্থারং, সাসনেভিরমিস্সতি.

২১৮. ‘‘‘তস্স ধম্মং সুণিত্ৰান, কিলেসে ঘাতযিস্সতি;

সব্বাসৰে পরিঞ্ঞায, নিব্বাযিস্সতিনাসৰো’.

২১৯. ‘‘ৰীরিযং মে ধুরধোরয্হং, যোগক্খেমাধিৰাহনং;

উত্তমত্থং পত্থযন্তো, সাসনে ৰিহরামহং.

২২০. ‘‘ইদং পচ্ছিমকং ময্হং, চরিমো ৰত্ততে ভৰো;

সব্বাসৰা পরিক্খীণা, নত্থি দানি পুনব্ভৰো.

২২১. ‘‘কিলেসা ঝাপিতা ময্হং…পে… ৰিহরামি অনাসৰো.

২২২. ‘‘স্ৰাগতং ৰত মে আসি…পে… কতং বুদ্ধস্স সাসনং.

২২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা হেমকো থেরো ইমা গাথাযো অভাসিত্থাতি;

হেমকত্থেরস্সাপদানং সত্তমং.

সত্তরসমং ভাণৰারং.