১০. কপ্পরুক্খিযত্থেরঅপদানং

১০৮. ‘‘সিদ্ধত্থস্স ভগৰতো, থূপসেট্ঠস্স সম্মুখা;

ৰিচিত্তদুস্সে লগেত্ৰা [লগ্গেত্ৰা (সী. স্যা.)], কপ্পরুক্খং ঠপেসহং.

১০৯. ‘‘যং যং যোনুপপজ্জামি, দেৰত্তং অথ মানুসং;

সোভযন্তো মম দ্ৰারং, কপ্পরুক্খো পতিট্ঠতি.

১১০. ‘‘অহঞ্চ পরিসা চেৰ, যে কেচি মম ৰস্সিতা [নিস্সিতা (সী.)];

তম্হা দুস্সং গহেত্ৰান, নিৰাসেম মযং সদা [তদা (স্যা.)].

১১১. ‘‘চতুন্নৰুতিতো কপ্পে, যং রুক্খং ঠপযিং অহং;

দুগ্গতিং নাভিজানামি, কপ্পরুক্খস্সিদং ফলং.

১১২. ‘‘ইতো চ সত্তমে কপ্পে, সুচেল়া অট্ঠ খত্তিযা;

সত্তরতনসম্পন্না, চক্কৰত্তী মহব্বলা.

১১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কপ্পরুক্খিযো থেরো ইমা গাথাযো অভাসিত্থাতি.

কপ্পরুক্খিযত্থেরস্সাপদানং দসমং.

কুণ্ডধানৰগ্গো চতুত্থো.