৪. কুণ্ডধানৰগ্গো

১. কুণ্ডধানত্থেরঅপদানং

১. ‘‘সত্তাহং পটিসল্লীনং, সযম্ভুং অগ্গপুগ্গলং;

পসন্নচিত্তো সুমনো, বুদ্ধসেট্ঠং উপট্ঠহিং.

২. ‘‘ৰুট্ঠিতং কালমঞ্ঞায, পদুমুত্তরং মহামুনিং;

মহন্তিং কদলীকণ্ণিং, গহেত্ৰা উপগচ্ছহং.

৩. ‘‘পটিগ্গহেত্ৰা [পটিগ্গহেসি (স্যা. ক.)] ভগৰা, সব্বঞ্ঞূ [তং ফলং (সী.)] লোকনাযকো;

মম চিত্তং পসাদেন্তো, পরিভুঞ্জি মহামুনি.

৪. ‘‘পরিভুঞ্জিত্ৰা সম্বুদ্ধো, সত্থৰাহো অনুত্তরো;

সকাসনে নিসীদিত্ৰা, ইমা গাথা অভাসথ.

৫. ‘‘‘যে চ সন্তি সমিতারো [যে ৰসন্তি সমেতারো (সী.)], যক্খা ইমম্হি পব্বতে;

অরঞ্ঞে ভূতভব্যানি [ভূতগণা সব্বে (স্যা.)], সুণন্তু ৰচনং মম’.

৬. ‘‘যো সো বুদ্ধং উপট্ঠাসি, মিগরাজংৰ কেসরিং [মিগরাজাৰ কেসরী (সী.)];

তমহং কিত্তযিস্সামি, সুণাথ মম ভাসতো.

৭. ‘‘‘একাদসঞ্চক্খত্তুং, সো [সোযমেকাদসক্খত্তুং (সী.)] দেৰরাজা ভৰিস্সতি;

চতুতিংসতিক্খত্তুঞ্চ, চক্কৰত্তী ভৰিস্সতি.

৮. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৯. ‘‘‘অক্কোসিত্ৰান সমণে, সীলৰন্তে অনাসৰে;

পাপকম্মৰিপাকেন, নামধেয্যং লভিস্সতি [ভৰিস্সতি (ক.)].

১০. ‘‘‘তস্স ধম্মেসু দাযাদো, ওরসো ধম্মনিম্মিতো;

কুণ্ডধানোতি নামেন, সাৰকো সো ভৰিস্সতি’.

১১. ‘‘পৰিৰেকমনুযুত্তো, ঝাযী ঝানরতো অহং;

তোসযিত্ৰান সত্থারং, ৰিহরামি অনাসৰো.

১২. ‘‘সাৰকেহি [সাৰকগ্গেহি (সী.)] পরিৰুতো, ভিক্খুসঙ্ঘপুরক্খতো;

ভিক্খুসঙ্ঘে নিসীদিত্ৰা, সলাকং গাহযী জিনো.

১৩. ‘‘একংসং চীৰরং কত্ৰা, ৰন্দিত্ৰা লোকনাযকং;

ৰদতং ৰরস্স পুরতো, পঠমং অগ্গহেসহং.

১৪. ‘‘তেন কম্মেন ভগৰা, দসসহস্সীকম্পকো;

ভিক্খুসঙ্ঘে নিসীদিত্ৰা, অগ্গট্ঠানে ঠপেসি মং.

১৫. ‘‘ৰীরিযং মে ধুরধোরয্হং, যোগক্খেমাধিৰাহনং;

ধারেমি অন্তিমং দেহং, সম্মাসম্বুদ্ধসাসনে.

১৬. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা কুণ্ডধানো থেরো ইমা গাথাযো অভাসিত্থাতি.

কুণ্ডধানত্থেরস্সাপদানং পঠমং.

২. সাগতত্থেরঅপদানং

১৭. ‘‘সোভিতো নাম নামেন, অহোসিং ব্রাহ্মণো তদা;

পুরক্খতো সসিস্সেহি, আরামং অগমাসহং.

১৮. ‘‘ভগৰা তম্হি সমযে, ভিক্খুসঙ্ঘপুরক্খতো;

আরামদ্ৰারা নিক্খম্ম, অট্ঠাসি পুরিসুত্তমো.

১৯. ‘‘তমদ্দসাসিং সম্বুদ্ধং, দন্তং দন্তপুরক্খতং;

সকং চিত্তং পসাদেত্ৰা, সন্থৰিং লোকনাযকং.

২০. ‘‘যে কেচি পাদপা সব্বে, মহিযা তে ৰিরূহরে;

বুদ্ধিমন্তো তথা সত্তা, রুহন্তি জিনসাসনে.

২১. ‘‘সত্থৰাহোসি সপ্পঞ্ঞো, মহেসি বহুকে জনে;

ৰিপথা উদ্ধরিত্ৰান, পথং আচিক্খসে তুৰং.

২২. ‘‘দন্তো দন্তপরিকিণ্ণো [পুরক্খতো (স্যা.)], ঝাযী ঝানরতেহি চ;

আতাপী পহিতত্তেহি, উপসন্তেহি তাদিভি.

২৩. ‘‘অলঙ্কতো পরিসাহি, পুঞ্ঞঞাণেহি সোভতি;

পভা নিদ্ধাৰতে তুয্হং, সূরিযোদযনে যথা.

২৪. ‘‘পসন্নচিত্তং দিস্ৰান, মহেসী পদুমুত্তরো;

ভিক্খুসঙ্ঘে ঠিতো সত্থা, ইমা গাথা অভাসথ.

২৫. ‘‘‘যো সো হাসং জনেত্ৰান, মমং কিত্তেসি ব্রাহ্মণো;

কপ্পানং সতসহস্সং, দেৰলোকে রমিস্সতি.

২৬. ‘‘‘তুসিতা হি চৰিত্ৰান, সুক্কমূলেন চোদিতো;

গোতমস্স ভগৰতো, সাসনে পব্বজিস্সতি.

২৭. ‘‘‘তেন কম্মেন সুকতেন, অরহত্তং [তুট্ঠহট্ঠং (স্যা. ক.)] লভিস্সতি;

সাগতো নাম নামেন, হেস্সতি সত্থু সাৰকো’.

২৮. ‘‘পব্বজিত্ৰান কাযেন, পাপকম্মং ৰিৰজ্জযিং;

ৰচীদুচ্চরিতং হিত্ৰা, আজীৰং পরিসোধযিং.

২৯. ‘‘এৰং ৰিহরমানোহং, তেজোধাতূসু কোৰিদো;

সব্বাসৰে পরিঞ্ঞায, ৰিহরামি অনাসৰো.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সাগতো থেরো ইমা গাথাযো অভাসিত্থাতি.

সাগতত্থেরস্সাপদানং দুতিযং.

৩. মহাকচ্চানত্থেরঅপদানং

৩১. ‘‘পদুমুত্তরনাথস্স, পদুমং নাম চেতিযং;

সিলাসনং [সীহাসনং (ক.)] কারযিত্ৰা, সুৰণ্ণেনাভিলেপযিং.

৩২. ‘‘রতনামযছত্তঞ্চ, পগ্গয্হ ৰাল়বীজনিং [ৰাল়বীজনী (সী. স্যা.)];

বুদ্ধস্স অভিরোপেসিং, লোকবন্ধুস্স তাদিনো.

৩৩. ‘‘যাৰতা দেৰতা ভুম্মা [ভূমা (ক.)], সব্বে সন্নিপতুং তদা;

রতনামযছত্তানং, ৰিপাকং কথযিস্সতি.

৩৪. ‘‘তঞ্চ সব্বং সুণিস্সাম, কথযন্তস্স সত্থুনো;

ভিয্যো হাসং জনেয্যাম, সম্মাসম্বুদ্ধসাসনে.

৩৫. ‘‘হেমাসনে নিসীদিত্ৰা, সযম্ভূ অগ্গপুগ্গলো;

ভিক্খুসঙ্ঘপরিব্যূল়্হো [পরিব্বূল়্হো (সী.)], ইমা গাথা অভাসথ.

৩৬. ‘‘‘যেনিদং আসনং দিন্নং, সোৰণ্ণং রতনামযং;

তমহং কিত্তযিস্সামি, সুণাথ মম ভাসতো.

৩৭. ‘‘‘তিংসকপ্পানি দেৰিন্দো, দেৰরজ্জং করিস্সতি;

সমন্তা যোজনসতং, আভাযাভিভৰিস্সতি.

৩৮. ‘‘‘মনুস্সলোকমাগন্ত্ৰা, চক্কৰত্তী ভৰিস্সতি;

পভস্সরোতি নামেন, উগ্গতেজো ভৰিস্সতি.

৩৯. ‘‘‘দিৰা ৰা যদি ৰা রত্তিং, সতরংসীৰ উগ্গতো;

সমন্তা অট্ঠরতনং, উজ্জোতিস্সতি খত্তিযো.

৪০. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৪১. ‘‘‘তুসিতা হি চৰিত্ৰান, সুক্কমূলেন চোদিতো;

কচ্চানো নাম নামেন, ব্রহ্মবন্ধু ভৰিস্সতি.

৪২. ‘‘‘সো পচ্ছা পব্বজিত্ৰান, অরহা হেস্সতিনাসৰো;

গোতমো লোকপজ্জোতো, অগ্গট্ঠানে ঠপেস্সতি.

৪৩. ‘‘‘সংখিত্তপুচ্ছিতং [সংখিত্তং পুচ্ছিতং (স্যা. ক.)] পঞ্হং, ৰিত্থারেন কথেস্সতি;

কথযন্তো চ তং পঞ্হং, অজ্ঝাসযং [অজ্ঝাসং (সী.), অব্ভাসং (ক.)] পূরযিস্সতি’.

৪৪. ‘‘অড্ঢে কুলে অভিজাতো, ব্রাহ্মণো মন্তপারগূ;

ওহায ধনধঞ্ঞানি, পব্বজিং অনগারিযং.

৪৫. ‘‘সংখিত্তেনপি পুচ্ছন্তে, ৰিত্থারেন কথেমহং;

অজ্ঝাসযং তেসং পূরেমি, তোসেমি দ্ৰিপদুত্তমং.

৪৬. ‘‘তোসিতো মে মহাৰীরো, সযম্ভূ অগ্গপুগ্গলো;

ভিক্খুসঙ্ঘে নিসীদিত্ৰা, এতদগ্গে ঠপেসি মং.

৪৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মহাকচ্চানো থেরো ইমা গাথাযো অভাসিত্থাতি.

মহাকচ্চানত্থেরস্সাপদানং ততিযং.

৪. কাল়ুদাযিত্থেরঅপদানং

৪৮. ‘‘পদুমুত্তরবুদ্ধস্স, লোকজেট্ঠস্স তাদিনো;

অদ্ধানং পটিপন্নস্স, চরতো চারিকং তদা.

৪৯. ‘‘সুফুল্লং পদুমং গয্হ, উপ্পলং মল্লিকঞ্চহং;

পরমন্নং গহেত্ৰান, অদাসিং সত্থুনো অহং.

৫০. ‘‘পরিভুঞ্জি মহাৰীরো, পরমন্নং সুভোজনং;

তঞ্চ পুপ্ফং গহেত্ৰান, জনস্স সম্পদস্সযি.

৫১. ‘‘ইট্ঠং কন্তং [কন্তযিদং (স্যা.)], পিযং লোকে, জলজং পুপ্ফমুত্তমং;

সুদুক্করং কতং তেন, যো মে পুপ্ফং অদাসিদং.

৫২. ‘‘যো পুপ্ফমভিরোপেসি, পরমন্নঞ্চদাসি মে;

তমহং কিত্তযিস্সামি, সুণাথ মম ভাসতো.

৫৩. ‘‘‘দস অট্ঠ চক্খত্তুং [দস চট্ঠক্খত্তুং (সী.), দসমট্ঠক্খত্তুং (স্যা.)] সো, দেৰরজ্জং করিস্সতি;

উপ্পলং পদুমঞ্চাপি, মল্লিকঞ্চ তদুত্তরি.

৫৪. ‘‘‘অস্স পুঞ্ঞৰিপাকেন, দিব্বগন্ধসমাযুতং;

আকাসে ছদনং কত্ৰা, ধারযিস্সতি তাৰদে.

৫৫. ‘‘‘পঞ্চৰীসতিক্খত্তুঞ্চ, চক্কৰত্তী ভৰিস্সতি;

পথব্যা রজ্জং পঞ্চসতং, ৰসুধং আৰসিস্সতি.

৫৬. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন [নামেন (সী. স্যা. ক.)], সত্থা লোকে ভৰিস্সতি.

৫৭. ‘‘‘সককম্মাভিরদ্ধো সো, সুক্কমূলেন চোদিতো;

সক্যানং নন্দিজননো, ঞাতিবন্ধু ভৰিস্সতি.

৫৮. ‘‘‘সো পচ্ছা পব্বজিত্ৰান, সুক্কমূলেন চোদিতো;

সব্বাসৰে পরিঞ্ঞায, নিব্বাযিস্সতিনাসৰো.

৫৯. ‘‘‘পটিসম্ভিদমনুপ্পত্তং, কতকিচ্চমনাসৰং;

গোতমো লোকবন্ধু তং [সো (সী.)], এতদগ্গে ঠপেস্সতি.

৬০. ‘‘‘পধানপহিতত্তো সো, উপসন্তো নিরূপধি;

উদাযী নাম নামেন, হেস্সতি সত্থু সাৰকো’.

৬১. ‘‘রাগো দোসো চ মোহো চ, মানো মক্খো চ ধংসিতো;

সব্বাসৰে পরিঞ্ঞায, ৰিহরামি অনাসৰো.

৬২. ‘‘তোসযিঞ্চাপি সম্বুদ্ধং, আতাপী নিপকো অহং;

পসাদিতো [পমোদিতো (সী.)] চ সম্বুদ্ধো, এতদগ্গে ঠপেসি মং.

৬৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কাল়ুদাযী থেরো ইমা গাথাযো অভাসিত্থাতি;

কাল়ুদাযীথেরস্সাপদানং চতুত্থং.

৫. মোঘরাজত্থেরঅপদানং

৬৪. ‘‘অত্থদস্সী তু ভগৰা, সযম্ভূ অপরাজিতো;

ভিক্খুসঙ্ঘপরিব্যূল়্হো, রথিযং পটিপজ্জথ.

৬৫. ‘‘সিস্সেহি সম্পরিৰুতো, ঘরম্হা অভিনিক্খমিং;

নিক্খমিত্ৰানহং তত্থ, অদ্দসং লোকনাযকং.

৬৬. ‘‘অভিৰাদিয সম্বুদ্ধং, সিরে কত্ৰান অঞ্জলিং;

সকং চিত্তং পসাদেত্ৰা, সন্থৰিং লোকনাযকং.

৬৭. ‘‘যাৰতা রূপিনো সত্তা, অরূপী ৰা অসঞ্ঞিনো;

সব্বে তে তৰ ঞাণম্হি, অন্তো হোন্তি সমোগধা.

৬৮. ‘‘সুখুমচ্ছিকজালেন, উদকং যো পরিক্খিপে;

যে কেচি উদকে পাণা, অন্তোজালে ভৰন্তি তে.

৬৯. ‘‘যেসঞ্চ চেতনা অত্থি, রূপিনো চ অরূপিনো;

সব্বে তে তৰ ঞাণম্হি, অন্তো হোন্তি সমোগধা.

৭০. ‘‘সমুদ্ধরসিমং লোকং, অন্ধকারসমাকুলং;