১. একপদুমিযত্থেরঅপদানং

১. ‘‘পদুমুত্তরো নাম জিনো, সব্বধম্মান পারগূ;

ভৰাভৰে ৰিভাৰেন্তো, তারেসি জনতং বহুং.

২. ‘‘হংসরাজা তদা হোমি, দিজানং পৰরো অহং;

জাতস্সরং সমোগয্হ, কীল়ামি হংসকীল়িতং.

৩. ‘‘পদুমুত্তরো লোকৰিদূ, আহুতীনং পটিগ্গহো;

জাতস্সরস্স উপরি, আগচ্ছি তাৰদে জিনো.

৪. ‘‘দিস্ৰানহং দেৰদেৰং, সযম্ভুং লোকনাযকং;

ৰণ্টে ছেত্ৰান পদুমং, সতপত্তং মনোরমং.

৫. ‘‘মুখতুণ্ডেন পগ্গয্হ, পসন্নো লোকনাযকে [ৰিপ্পসন্নেন চেতসা (স্যা.)];

উক্খিপিত্ৰান গগণে [উক্খিপিত্ৰা নলাটেন (ক.)], বুদ্ধসেট্ঠং অপূজযিং.

৬. ‘‘পদুমুত্তরো লোকৰিদূ, আহুতীনং পটিগ্গহো;

অন্তলিক্খে ঠিতো সত্থা, অকা মে অনুমোদনং.

৭. ‘‘‘ইমিনা একপদুমেন, চেতনাপণিধীহি চ;

কপ্পানং সতসহস্সং, ৰিনিপাতং ন গচ্ছসি’.

৮. ‘‘ইদং ৰত্ৰান সম্বুদ্ধো, জলজুত্তমনামকো;

মম কম্মং পকিত্তেত্ৰা, অগমা যেন পত্থিতং.

৯. ‘‘সতসহস্সিতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

১০. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা একপদুমিযো থেরো ইমা গাথাযো অভাসিত্থাতি.

একপদুমিযত্থেরস্সাপদানং পঠমং.